عظيمة يا مصر .. يا أرض اللوا

واضح ان الكيماويات اللى فى الأكل والشرب عملت تأثير جامد على المصريين
اللى كانوا زمان كلهم شهامة وضمير ونخوة وشجاعة ومجدعة
بقى عادى ان الناس تتسرق فى الميكروباصات والاتوبيسات
وبقى عادى ان محدش يمسك السارق
وبقى عادى ان محدش يقف جمب المسروق
بقى عادى انه يشهدهم على السرقة محدش يرضى يشهد معاه
على الرغم من ان الحرامى اصلا ضعيف يعنى لو الناس اجتمعت عليه
مش هيقدر يعمللهم حاجة
بقى عادى كمان ان الحرامى يرمى الراجل المسروق من العربية يقع على عجلة عربية ماشية
يعنى كان ممكن يتقتل .. قدام الناس كل دة
وهو يعنى لو كان اتقتل كانت الناس هتصحصح من الغيبوبة اللى هى فيها ؟؟؟
مع اننا فى رمضان ..
بس مش هتفرق كتير لان اللى بيحصل فى غير رمضان بئا لازم يحصل فى رمضان

وحسبى الله ونعم الوكيل

مش فى الشعب المصرى .. لا
ولا فى المسئولين عن رعيتهم .. لا

فى الكيماويات...........................

النوع فى شهادة الميلاد : ذكر

عينى عليك يا زمن بقيت ماشى بالشقلوب البنات بقوا رجالة والرجالة بقوا ...؟؟؟؟

لقب راجل بقى يطلق على قلة قليلة جدااا

أنا شايفة ان دى ظاهرة بجد صدقونى هى ظاهرة اصبحت منتشرة جدا بشكل مخيف .. ان معظم شباب اليومين دول معندهمش شخصية غير على أنفسهم أو ما ملكت أيمانهم اللى هما اما زوجاتهم أو اللى مرتبطين بيهم انما معندوش شخصية حتى انه يدافع عن حياته من التدمير .

المشكله ان كل شاب من دول لما بييجى يخطب تلاقيه داخل على العروسة دخلة مستر X على العصابة كدة

شخصية ايه وكلام ايه

تلاقيه قاعد ملو هدومه طول بعرض

تشوفوه تقولوا فارس الأحلام اهوه اللى هياخدها على الحصان الابيض فى زمن مفيهوش حصنة

بيشعلقها فى حباله الدايبة ولا يبان عليه

ولما مامته تغمزله بعينيها يقوم بتنفيذ المراد أيا كان

انا طول عمرى اعرف ان البنت هى اللى دايما ضعيفة وبتسمع كلام مامتها ودة كان سبب الخلافات زمان بين الزوج والزوجة

انما اول مرة فى حياتى اسمع عن راجل بيسمع كلام مامته فى خراب بيته

محدش فينا مختلف فى ان سماع كلام الام واجب وضرورى ولا حتى انا مختلفة فى كدة

بس فى أمهات عندها التدمير هواية

هل يصح انه يسمع كلامها فى خراب بيته وتشريد ابنه؟؟؟؟؟

تعددت القصص والنهاية واحدة :

بنت اتجوزت وخلفت واطلقت وبعد ما انجبت طفل بعد سنة واحدة لمجرد ان الأم الفاضلة قالت لابنها طلقها يا ( فلان) .

الزوج وهو واقف الحقيقة مأخرش طلب قالها انتى طالق

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

مش حتى يستنى يشوف فى ايه ولا يحاول يصلح لو فى خطأ من اى ناحية زى مالبشر بتعمل علشان الطفل البرئ حتى بلاش علشان العشرة

واحدة اتطلقت علشان مسمتش بنتها على اسم حماتها

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

يرضى ربنا دة

واحدة اتطلقت علشان حماتها معذباها فى الشغل ولما قامت الزوجة بضرب ابنها عقابا على حاجة عملها حماتها قالتلها سيبى الواد ردت الزوجة من قهرها و قعدت تبكى وقالتلها سيبينى فى حالى حرام عليكى

ممكن تكون كلمة تقيلة على الحما بس الناس بتزعل وبتصطلح تانى عادى يعنى

واحدة حماتها بتدخل فى شئونها الخاصة هى وزوجها لدرجة ان الحما بتأمر ابنها امتى يروح لمراته وامتى ميروحش ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

وطبعا الزوجة بتغضب كتير عند ابوها بيوصل الحال بيها انها تقعد عند والدها سنة كاملة وعند زوجها شهر واحد وهكذا الا ان توفت الحما

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

العينات كتيرة جدا من الحموات الفاتنات دى ومن الزوجات المطلقات بلا ذنب ومن الأطفال المشردين بين ام مطلقة واب ضعيف مش قادر يدافع عنهم

لسنا الوحيدون ولكننا الأفضل

عندنا كل جديد
هل تبحث عن موظف أو موظفة بمواصفات سوبر مان
هل تبحث عن موظف أو موظفة فى دهاء مستر ( X )
إليكم الحل الأمثل :
الموظفة العجيبة ................
يمكنكم استخدامها فى أى وقت و لأى شئ
انها تقوم بالتزوير بشكل جيد لا يتم اكتشافه واذا اكتشفت تحلف بالله ماحصل
انها سارقة ماهرة ( بمعنى أصح تسرق الكحل من العين) ثم تبكى متظلمة
انها متمرسة فى نشر الوقيعة بين الآخرين بدهاء ومكر
إنها فتانة رفيعة المستوى وكذابة درجة أولى ( وياويلك لو اعترضت طريقها)
لديها قدرة عجيبة على التعرف على جميع من هم من أصحاب الذمم الميتة وشراءهم بأبخس الأثمان
وهى أيضا تستطيع أن ترمى بلاها على الآخرين بكل سهولة ويسر
وتستطيع بقدرة هائلة ان تخترق جميع القوانين دون ان يتم فصلها
كم هى عجيبة فعلا ... فالمفاجأة الكبرى..................
انها بعد كل ذلك لا تعاقب ولا تجازى ولا يتم فصلها
فهى مسنودة ولكن من مين الله وحده أعلم ( لا تسأل كثيرا ) فعرضنا هذا مغرى للغاية
كل هذا وأكثر بسعر متميز جدا
الكمية محدودة
لدينا منها اثنتان فقط هما سمسمة ونمنمة ( وما خفى كان أعظم )
فقط ارسل رسالة على الموظفة الخارقة دوت كوم
او على كوسة يا مصر دوت ايجى
أو اكتبلى فى ردك على التدوينة
فى انتظار رسائلكم

شعارنا
اللى له ضهر مينضربش على بطنه

وحسبى الله ونعم الوكيل
(( أفوض أمرى الى الله ان الله بصير بالعباد ))

أكيد أكيد انا اللى غلط .....

وانا رايحة الجامعة النهاردة الصبح مشى ( أصلها جنبنا مش بعيدة) لقيت مجموعة طلبة شكلهم صغيرين عبارة عن ولد و3 بنات ماشيين عمالين يهزروا بالأيادى مع ببعض ويضحكوا وكان فى ولد واقف بيوزع اعلانات عن مكتبة .. الاعلانات دى عبارة عن استيكرات من اللى بتلزق..
المهم ان المجموعة دى خدوا شوية استيكرات من دى كتير وعمالين يلعبوا بيها .. واتفاجئت ان الولد اللى معاهم بيروح هابد البنت من دول على ضهرها وفجأة تلاقى الاستيكر لازق على بلوزتها او طرحتها حسب ما إيده جت يعنى ..

مفيش خطوتين لقيت الولد دة بيجرى وراح لازق الاستيكر على ضهر واحدة واقفة شكلها كدة مستنية مواصلة لانها مخدتش بالها ان الولد خبطها على ضهرها اصلا..

انا طبعا كالعادة بتستفزنى المواقف دى .. روحت شايلة الاستيكر وقولتله : انت مش هتحترم نفسك بئا؟
وروحت مدياها الاستيكر وقولتلها كان حاطه على ضهرك
لقيت الولد بيقولى دى زميلتى
قولتله زميلتك تحط ايدك عليها كدة عادى .. عادى؟
قالى على فكرة انا خبطها بس
بصيتله من فوق لتحت ومشيت

البنت منطقتش كلمه واحدة من اول الموقف بس انا لاحظت ان انا لما اديتها الاستيكر خدته ولزقته للولد على ايده
يعنى فعلا كانت زميلته

بس ينفع؟؟؟؟؟؟؟؟
ينفع ان الولد يهزر مع البنت يحط ايده عليها؟
وعادى كدة؟

المهم وصلت لباب الجامعة لقيت بنت وولد تانين طبعا ماسكين فى ايد بعض وعمالين يفعصوا فى ايد بعض لدرجة ان الولد لما ساب ايديها علشان يعدل القميص شدت ايده ومسكتها ( تقريبا خايفة تعدى الطريق لوحدها)
كل دة والأمن واقف والرجالة والبنات رايحين جايين
يعنى مش طريق فاضى مثلا علشان نقول انهم مكسوفين من الناس
لا دة قدام كل الناس بجاحة مفيش بعد كدة
والأدهى من كدة ان البنت عاملة متدينة ولابسة اسدال

البنات ايه اللى جرالها معدتش بتتكسف ليه؟؟
والولاد معدش عندهم نخوة ليه؟؟؟
راح فين الحياء؟؟؟

يكونش الأكل اللى كله كيماويات أثر على الأخلاق؟
ولا يمكن عوادم السيارات ؟
ولا يمكن الكهربا الزيادة فى المخ نتيجة عن استخدام الموبايل والكمبيوتر ؟

ماهى كل الحاجات دى اكيد بتأثر بردو

ولا يمكن انا اللى متخلفة عن الركب
وانا اللى رجعية
وانا اللى اتربيت غلط

اكيد الشباب مبسوطين ومنشكحين ان البنات أزالت كل الحواجز اللى بينهم وسمحتله يحط ايده عليها
ويقعد يفعص فى ايد البنية ياعينى

لا حول ولا قوة الا بالله