الأربعاء، 24 فبراير 2010

أم أحمد

اتجوزت وعندها 13 سنة (سن صغير جدا على الجواز بس بتحصل)
انجبت بنت وولد .. كانت حياتها صعبة وكاناو فقراء كانت هى اللى بتشتغل وجوزها قاعد فى البيت وكانت بتصرف عليه ورغم كدة استحملت وعاشت
وبعد مرور حوالى 30 سنة من جوازها ...
سابها جوزها وراح اتجوز عليها ومن غير ميطلقها ( يعنى ظلمها)
فوضت أمرها الى الله لكن أصابها المرض
طبعا مرض + الفقر أصعب مايمكن و كان الصبر ( اصعب منهم) بس لآن الصبر مدعم بالرضا رضيت بنصيبها ..
المرض زاد عليها وجعلها طريحة الفراش و مع الوقت بدأت تصاب بالنسيان اللى بيجيلها فى فترات متفرقة .
كانوا الناس بيزوروها ويسيبولها فلوس كنوع من الصدقة والزكاة لدرجة ان من كتر زوارها بيتها كان مليان فلوس ( بشهادة الشهود) لدرجة ان اختها كانت بتحوش لجواز البنت والولد من الفلوس دى
اختها بتحكى انهم كانوا بيناموا ويصحوا الصبح يلاقوا فلوس جنبها ( زى الافلام يعنى ) لدرجة انهم كانوا شكوا ان الناس بيرمولها فلوس من الشباك بالليل
كانت بتحب الناس كلها وتفضل تدعيلهم لدرجة ان كان فى طلبة جامعة من الجيران بيلموا بعض ويروحولها ويقولولها ادعيلنا يا ( ام احمد ) ورغم عدم وعيها بيهم او بغيرهم حتى كانت دايما مبتسمة وبتدعى للكل

على الوجه الاخر جوزها اللى اتجوز عليها علشان مكنش حيلته شغلانه افتكر انه لما يتجوز واحدة تانية غنية هتصرف عليه اكتر ويرمى مراته وعياله والدنيا هتبقى احسن
لكن (ربنا اكبر منه) الفقر اشتد بيه ومراته بقت تقومه بالضرب علشان يدور على شغلانه يصرف منها
وكان بيرجع لمراته الاولى هو ومراته الجديدة وعياله الجداد علشان ياكلوا ( استغل انها مش فاكراه ولا فاكره حياتها الماضية )
ام احمد كانت بتديهم فلوس زى مكانت بتدى اللى بيجيلها ( ماهى مش فاكره )
يوم 14 رمضان اللى فات بدأت ام احمد يزيد تعبها وبدأت مشوار سكرات الموت وكانت ماسكة فى ايدها حاجة محدش عارف ايه دى مش عايزة تسيبها .. اخواتها حاولوا يفتحوا ايدها مفيش فايدة ..
وماتت ام احمد وسلمت روحها لخالقها طبعا ايدها اتفتحت لوحدها
لقيوا فلوس مايقرب من 1000 جنيه !!!!!!!
ازاى ؟ وامتى ؟ ومين اللى ادهالها ؟؟؟؟ محدش عارف
زى ميكون كانت خايفة متلاقيش فلوس تدفن بيها
مع انها محتاجتش غير ثمن الكفن اللى دفعته اختها من مالها الخاص
والست اللى غسلتها قالت : ام احمد !! لايمكن اخد منها فلوس .
والحانوتى قال : انا مش هاخد حاجة من احمد .. انا هعمل من غير حاجة.


الناس كلها جابت كل حاجة لام احمد
كنتى مخبية الفلوس فى ايدك ليه يا ام احمد ؟؟؟؟؟؟؟
كنتى بتفكرى فى ايه ساعتها؟؟؟؟؟؟
المهم راحوا المدافن بعد صلاة العشا ( بشهادة الشهود ) القمر كان زى الشمس فى السما فى عز الضهر محدش مصدق ازاى كانت المقابر منورة كدة .
فتحوا المقبرة ... قالوا للملحد نجيبلك كشاف علشان الضلمة؟
قال كشاف ايه مش شايفين التربة منورة من جوة ازاى ؟؟؟؟؟!!!!!!
دفنوا ام احمد ورجعوا البيت لقيوا أكل أشكال وألوان ...
سألوا منين دة؟
قالوا دة من بيت مال المسلمين اللى فى القرية
حتى السحور جالهم لحد عندهم يا ام احمد !!!!!!!!!!!!
كل دة نتيجة الصبر المطعم بالرضا بالقضاء والقدر ؟؟؟
ياريتنى ابقى زيك يا ام احمد ولا حتى نصك
بيقولوا عمرها ماشتكت الحاجة الوحيدة اللى كانت بتفتكرها أذى جوزها مع انها مش فاكراه ولا فاكرة شكله وكانت لما تفتكر أذاه تبكى وتقول : يعنى مفتكرليش اى حاجة عملتها معاه ....

الله يرحمك يا ام احمد ويرحمنا جميعا

هناك 19 تعليقًا:

mahasen saber يقول...

لا حول ولاا قوة الا بالله

ربنا يرحمها ويجازيها خير ..

شفتى ازاى ان من اصعب انواع الظلم ظلم الزوج لزوجته
ربنا بهدى كل ظالم ومفترى ويكرم كل مبتلى بالصبر

mahasen saber يقول...

على فكره يا نها دى مش فضيحه دى مأساه

بس تصدئى دى فضيحه كبيره فعلا لجوزها وجبروته وظلمه

غير معرف يقول...

في حد يبقى متجوز واحده زيها ويتجوز عليها

بجد حسستيني ان الدنيا لسه بخير

ربنا يرحمها ويغفرلها يا رب

عود احمد .... ليكي وحشه :)

AHMED SAMIR يقول...

ياااااااااااااااااااااااه
الدنيا دي فيها كتير قوي بجد
الله يرحمها

بلاش فضايح يقول...

يارب يا محاسن
يارب نبقى بس حاجة منها
نضمن اخرتنا

بلاش فضايح يقول...

فتاة من الصعيد
ازيكي يا قمراية
وحشانى خالص

الدنيا فيها خير بس مختفى
والخير اللى فيها بيبقى حالة نادرة الناس تتحاكى بيها

بلاش فضايح يقول...

احمد
اه اللى يعيش ياما يشوف فعلا فعلا
دى من اهل الجنة بس كانت منورة الدنيا

الله يرحمها
محدش مصدق ان القصة دى حقيقية

Haytham Alsayes يقول...

ربنا يرحمها
يجماعة ربنا بيرزق الدودة في الحجر مش عيرزرق ام احمد واي حد غيرها ربنا كبير
ورزاق وربنا علي الظالم
تقبل مرورى
شكرا

بسنت صلاح الدين يقول...

الله يرحمها و يحسن عاقبتها ،،، الصبر على البلاء مؤلم بس عاقبته جميله اوى اوى ،، اللهم ارزقنا الصبر و الرضا

فشكووول يقول...

السلام عليكم نونا
تحياتى

الله يرحم ام احمد
ربنا خلق الخلق ومتكفل بيهم
واولاد الحلال بيبعتهم ربنا
ويارب ترحم الجميع

تحياتى

م/ الحسيني لزومي يقول...

لله ما اخذ ولله ما اعطي وكل شئ عنده بمقدار

LuaY SakR يقول...

هو القصة اوفر شوية
ليه مافيش مصدر او تصريح انها مؤلفة؟؟؟

ملحوظة عشان الناس اللي هاترد عليا
لاحظوا اني سالت على المصر الاول وبعد كده التصريح

بلاش فضايح يقول...

هيثم
فعلا مش بعيد على ربنا ان يرزق اى حد فى اى مكان

شكرا جدا ليك

بلاش فضايح يقول...

بسنت يا قمر وحشانى مووووت

ربنا يرحمها ويرحمنا جميعا
وينتقم من الظالم

بلاش فضايح يقول...

أستاذ فشكول
ازى حضرتك يارب تكون بخير

ربنا يرزق فقراء المسلمين زى مارزق ام احمد ويرزقنا الجنة جميعا يارب

بلاش فضايح يقول...

م . الحسينى
ربنا يرحمها يارب ويرحمنا
شكرا لحضرتك

بلاش فضايح يقول...

Luay
القصة مش أوفر ولا حاجة
هى قصة حقيقية وبتحصل وبيحصل اكتر منها
لو حضرتك شوفت على المدونة انا كاتبة ان كل القصص اللى هنا حقيقة

اما عن مصدرها بردو قصة من الواقع
ومفيهاش اى حاجة زيادة عن اللى حصل

شكرا لمرورك

momken يقول...

انا فاكر انى علقت على البوست ده


تعليقى راح فين؟؟؟

انا ممكن ابلغ البوليس

بلاش فضايح يقول...

لا مش ممكن يا ممكن
لو كنت علقت كان ظهر
انت كنت ناوى ترد بس مرديتش تقريبا
ههههههه