الاثنين، 19 يناير 2015

جابت نتيجة ^_^

فاكرين الموضوع دة اللى كتبت عنه من حوالى سنة كدة :


ناس كتير حاولت تطبقه و كانت دى قصة منهم سرقتها من الفيس بوك :

كان فيه خطوة اقترحتها ( نهى ) .. ان احسن طريقة للتقليل من ظاهرة اطفال الشوارع و الحفاظ عليهم مش اننا ناخدهم نعلمهم حرفة و نشغلهم .. لاننا ممكن نشغلهم و بطريقة نقدر نغلب بيها سيطرة اهاليهم عليهم
و كانت الفكرة هي ان اي طفل يقف قدامك و يطلب فلوس .. بدل ما تديله.. تقوله : ﻻ . هاتلي حاجة اشتريها منك و هديك مقابلها ضعف تمنها . انما تشحت بدون مقابل لا
و بدأت (نهى) فعلا بالتنفيذ و لقت استجابة من الاطفال و ممكن كمان يطلبوا منها تقف تستناهم على ما يجيبوا حاجة هي تشتريها منهم .. و فعلا تقف تستناهم و ماتمشيش مهما كانت مستعجلة لحد ما الطفل يجيب علبة مناديل او لبان مثلا تشتريهم منه
و بدأ كل المؤمنين بالفكرة في اتباع فكرة و خطوة ( نهى )
من كام شهر ولد في ميدان القومية طلب منى فلوس .. و بما انى لسه ماشية على الخطوة اللي مقتنعه جدا بيها . طلبت منه يبيعلي حاجة و هديله ضعف تمنها ... تردد فترة و بعدين راح جاب علبه مناديل و ادهالي و كانت كل نظراته بتقول بقرف ( الله يخربيوتكم ) 
قابلته تاني قدام سوبر ماركت و طلب فلوس .. قولتله ﻻ ادخل اشتري حاجة و انا هاخدها منك بفلوس اكتر من اللي اشترتها بيها
رفض و بعتلي صاحبه قولتله نفس الكلام .. راح خد من الولد فلوس و دخل اشترى بيها مناديل و باعهالي و خد تمنها بالزيادة و اداهم للولد صاحبه
انهاردة كانت اول نقطة نجاح عملي اشوفها بعيني ..
نفس الولد ده في نفس المكان انهارده كان شايل كيسة كبيرة فيها مناديل كتير و بأنواع مختلفة و ماشي يبيع فيهم
و بيسأل الزبون كمان عاوز اي نوع و بريحة ايه  بهرني
و بهرني اكتر لما و هو بيبيع اطفال وقفوا يشحتوا .. وقف يوصفلهم انهم يجيبوا مناديل زي دي او اي حاجة تتباع علشان الناس تديكم فلوس و تكسبوا احسن ...

ـــــــــــــــــــــــــــــــــــــــــــــــــــــــــــــــ
لسه فيه أمل.. 

الجمعة، 9 يناير 2015

قلبى وحده لا يكفى



 رأيتها صدفة و قد تثاقلت هموم الدنيا فوق كتفيها الصغيرتين , و جعد الحزن وجهها الذى اختفت ملامحه من شدة الألم , تحبس دموعها فى عينيها اللتين انغلقتا من شدة الحزن . 
  فتاة فى منتصف العشرينات من عمرها كانت تقف بمفردها وحيدة وسط جموع من الناس و المارة أمام قسم الشرطة , بجوارها سيارة نقل كبيرة تمتلئ باثاث منزلى يتسم بالبريق وكأن لم يستخدمه أحد . 
شعُرْت لأول وهلة أنه جاء من محل بيعه الى يديها مباشرة . و إذا برجل يقف فوق السيارة و يُلقى بالأشياء على الأرض و كان عليها ان تلملمها كما لملمت مشاعرها الحزينة و كما  تلملم حظها العاثر لتخبئه فى قلبها حتى لا يراه أحد فى عينيها . كانت تحمل الأشياء من على الأرض لتضعها فى سيارة نقل أخرى كبيرة .
انها تتسلم اثاث منزل الزوجية بعدما حكم لها القاضى بالطلاق . لكن لماذا تقف بمفردها ؟ اين والديها أو إخوتها ؟ هل هى يتيمة و تركها رجال عائلتها تواجه قرار طلاقها بمفردها ؟ هل عليها أن تقبل بالعيش فى ظل زواج عاثر حتى تتجنب هذا الموقف ؟ 
كم تفتت قلبى حزناً عليكى , أياً كانت ظروف طلاقك فلا جدال فى أنكِ تعيشين اقسى لحظات حياتك..
....فجأة ....
نظرت إلىّ و لامست عينىّ عينيها و كأنها تسمع حوارى مع نفسي رغم بعد المسافة بيننا و كأنها تشعر بروح حولها تربت على كتفيها وتقول لها...
 ( لست بمفردك , قلبى معك ولو أنه وحده لا يكفى ) .
 ثم قامت بفتح باب سيارة النقل و ركبت بجوار السائق و رحلت فى صمت
...................
قصة حقيقية

الجمعة، 21 فبراير 2014

حاجة لله

التدوينة الثالثة من ايفنت ( حملة التدوين ) ـــــــــــــــــــــــــــــــــــــــــــــــــــــــــــــــــــــــــــــــــــــــ

ا : و النبى يا ابلة حاجة لله
     و النبى يا ابلة

ب :معاك ايه اشتريه ؟

ا : ازاى ؟

ب : يعنى معاك مناديل أو لبان أو أى حاجة اشتريها منك

ا : ممعاييش

ب : طيب و انا مش هديك فلوس كدة ، لومعاك حاجة كنت اشتريتها منك

ا : طيب ليه ؟

ب : علشان التسول مش حاجة حلوة ، دى عادة وحشة ، بيع أى حاجة و أنا اشتريها منك ( بضعف ) التمن ، لكن التسول غلط

ا : طيب أنا معايا جنيه ، أروح اشترى مناديل من البقال و تشتريه منى ؟

ب : موافقة

ا : بس تقفى تستنينى ، ولا هتمشى ؟

ب : واقفة مستنياك

ا : بجد ؟

ب : والله هستناك هنا فى الحتة دى

ا ( بعد شراء المناديل ) : اشتريه بقا منى

ب : و آآآآدى تمن العلبة مرتين

ـــــــــــــــــــــــــــــــــــــــــــــــــــــــــــــــــــــــــــــــــــــ

دة كان الحوار اللى دار بينى و بين أول طفل شوارع إتبعت معاه الموضوع دة ( و بالصدفة البحتة ) مكنتش مرتبة ان دة يحصل بس رد فعل الولد خلى الموضوع يوصل لكدة لما راح يشترى المناديل .....
و اتبعت الموضوع دة مع أكتر من طفل بعد كدة و كلهم بلا استثناء راحوا اشتروا المناديل بعد ما أكدوا عليا متحركش من مكانى ^___^