الجمعة، 5 أكتوبر، 2012

واحدة فى الضياع

ضع علامة √ فى المربع 

*  لما تكون (انا ) هى آخر شخص ممكن اهتم بيه او ييجى على بالى

يبقا لازم ( انا ) تزهق

*  لما تكون ( هى) اول شخص اهتم بيه ومببطلش تفكير فيه

يبقا لازم ( هى ) متقدَرش دة و (انا) تحس بإحباط

*  لما يكون ( هو ) تانى شخص أراعيه

يبقا لازم ( هو ) ميصدقش و ( انا ) تزعل منى

*  لما يكون ( دة ) محتاج منى مجهود بس مش بديهوله لانه متعلق ب ( انا ) اللى هى آخر اهتمامتى

يبقا لازم ( دة ) يعاتبنى و ( انا ) تحس بالفشل

*  و لما يكون ( دول ) رقم تلاتة عندى و محتاجين منى اسمعهم بس و مش بعمل كدة عشان مشغولة ب ( هى ) و ( هو )

يبقا لازم ( دول ) و معاهم ( انا ) يخرجونى من حياتهم

*  و لما تكون ( دى ) محتاجالى و عايزانى اقرب منها بس مش فاضيالها ( برغم حبى الكبير ليها )علشان اهتمامى التدريجى ب ( هو) و ( هى ) و ( دول ) و ( دة )

يبقا لازم ( دى ) تكرهنى و ( انا ) واقفة فى صفها

 * ولما ( دية ) تقرب منى و تكلمنى و تستحملنى , يبقا لازم ( أنا ) تتكسف على دمها وبردو مش قادرة تعمللها حاجة

و برغم ان كل اللى فات متعلق ب ( انا ) لكن بفكر اقطع علاقتى بيها

لانها ضاغطة عليا جدا ومش عايزة تتفهم موقفى و بصراحة طاقتى محدودة

و ( انا ) طلباتها كتير ومعظمها مقدرش احققه ليها ..

عايزة تضحك من قلبها ( مع انها بتضحك كتير ع الفاضى والمليان)

وعايزة تحلم

وعايزة تتخيل

و عايزة تعيش

وعايزة تنام ( بقالها كتير بتنام اكلنيكى )

بعيون مقفولة ودماغ صاحية

و عايزة تتفائل

و عايزة تفرح

و عايزة ترتاح

وعايزة تبكى ( من غير ما حد يشوفها )

و عايزة متتصنعش الرضا وهى مش راضية

وعايزة تخطط لمستقبلها

و عايزة لما تتكسر تقول انا زعلانة .. مش تبتسم وتقول (بالعكس انا مبسوطة جدا , انتوا غاويين نكد كدة ليه )

 

طب بالذمة اجيبلها وقت و صحة منين

 هى لو مكانى هترمينى من الدور السادس

بس عموما انا هأبرم معاكى اتفاقية ( كامب نونا )

وتنص الاتفاقية على انى مسمعش حسك

ولا نَفَس

ولا اشوفك معدية قدامى حتى

والا هحدفك بكرسى السفررررررررررررررة

 


 

هناك تعليقان (2):

دعاء عويضه يقول...

:((((((

و (دي ) كمان مقصرة
و بيبان عليها انها بتاعت مصلحتها
بس و الله ( دي ) فيها اللي مكفيها و بتهرب
صحيح الهروب زاد عن حده و ساعات بيضغط على اللي حواليها و بيئذيها كمان نفسياً بسبب احساسها بيهم
بس ( دي ) مش عارفه تعمل ايه ؟؟
ترجع زي زمان مابتبطلش عياط ليل و نهار و حرقة دم من اللي حواليها جوه و بره .. ده غير انها كان بيتقلها ان انتى اقل واحده في كل حاجه
و لا تفضل زي ما بنت نفسها و خلت نفسها تساوي ( نص حاجه )

علشان كده ( دي ) بتقولك : محدش هيحس بيكي و لا هيقدرك الا لما تشوقيهم ليكي شوية

الست حشَرية يقول...

:)