الخميس، 9 يوليو 2009

رغيف الموت


راحت زى أى حد تجيب عيش من الفرن علشان الفطار رغم كبرها فى السن وعدم مقدرتها على الحركة
صاحب الفرن صرخ فى وشها وقالها معندناش عيش يلا امشى
جرت أذيال الذل للقمة العيش ورجعت البيت
وعادت مرة أخرى (الساعة 2 الضهر على كلام الشهود) علشان تجيب عيش الغدا
أصر صاحب الفرن على رفضه انه يديها عيش
وشافته بيحمل الدقيق على عربية علشان يبيعه مرة تانية
زعقتله وقالتله حرام عليك انت بتبيع الدقيق ومش عايز تدينا عيش

والواضح من كلام الشهود ان الخناقة اشتدت بينهم

فقام صاحب الفرن ركب العربية وجرى بيها ورا الست دى علشان يدوسها بيها
الناس بيحكوا انها كانت عمالة تجرى قصاد العربية
والعربية بتجرى وراها

لغاية لما شيطانه أعماه وأصمه

فى الأفلام العربى والهندى الشرطة بتيجى على آخر لحظة
أنما فى الواقع المرير بتيجى بعد ما الكارثة تقع
*
*
*
*
*

قتلها ................

اه قتلها بالعربية وداس عليها



طبعا هتقولوا دة لازم يدخل السجن

لكن شاهدة عيان قالت:

يتحبس ايه يا أبلة دة مفترى وحرامى
وله معارف كتير



زمان كانت مشكلتنا فى طابور العيش
انما المشكلة تفاقمت اكتر وأصبحت فى بيع الدقيق
والجريمة اللى فى عز الضهر

مش عارفة اقول ايه
قولوا انتوا
يمكن تعبروا اكتر منى ............

هناك 25 تعليقًا:

بولا حلمي يقول...

قولي لا حول ولا قوة الا بالله
اكتر من كدا مقدرش اقوووووول
سلامي ليكي نونا :)

Mo2M3N-MiLo يقول...

نونا انا هقوللك على حاجه بجد والله العظيم كل حاجه فى البلد فى ب وسطه حته العيش عشان تجيبى 5 ارغفة عيش واسطه
يا واسطه يا واحد صايع يجبلللك حاجه من الاتنين غير كده ممكن يحصال اللف حاجه و حاجه

Unknown يقول...

بنفترى على بعض
و نهاجم افتراء الحكومة علينا
نستاهل

صوت من مصر يقول...

الله يرحمها
انا باكل فينو

mohamed ghalia يقول...

قولى
حسبنا الله ونعم الوكيل
(إنما أشكو بثى وحزنى إلى الله)

مامة مازن يقول...

نونا الجميلة الطيبة
حسبنا الله ونعم الوكيل
ربنا يتولانا برحمته
الله يرحمها برحمته الواسعة
شوفى اللينك ده
اوكى هى جايبه صور لسرقة فى مخبز برضه

http://appyplant.blogspot.com/2009/06/blog-post_22.html
مع السلامة

هانى زينهم يقول...

تعبير ايه بس ؟ حسبنا الله ونعم الوكيل فيه وفى امثاله .

عمرو يقول...

ماغيش تعليق غير أن من فوق سبع سماوات سبحانه و تعالى يقسم بعزته و جلاله أن ينصف المظلوم و لو بعد حين ..
و الحقيقه أن الظلم زاد أوى أوى فحسبنا الله و نعم الوكيل ..

Kiara يقول...

لا حول ولا قوة الا بالله ربنا شاهد وقادر علي كل شئ حسبنا اله ونعم الوكيل

لنا الله

الشعب لابد له من حكومه تشكمه يقول...

الست هى اللى غلطانه ايوه ازاى تجرات وفكرت تاكل عيش؟
تاكل بيتى فور او بسكويت لكن عيش ؟
شعب صحيح مدلع مدلع وماسك فى ديل الحكومه زى امه اللى خلفته كمان عاوزين تاكلوا عيش؟؟؟؟؟
ربنا يرحمها يارب:)

Hesham يقول...

لن اقول مثلما قالت الأمبراطورة الفرنسيه مارى انطوانيت لو ملقوش عيش ياكلو جاتو ولكن سأقول كما علمنا رسول الله حسبى الله ونعم الوكيل

بسنت صلاح الدين يقول...

ايه الشعب المقرف ده، ربنا ياخد الشعب يا شيخه اللى تاعب الحكومه وقارفها عاوزين عيش وعاوزين ميه وعاوزين تعليم،كل دى طلبات ده انتوا حاجه غريبه اوى،يابنتى العيب مش عليه،العيب على اللى نايمين فى التكييف و بياكلوا بسكويت بالقرفه ،محدش يقول اشمعنى بسكويت بالقرفه، هو انا اللى باكل؟؟حسبى الله ونعم الوكيل امال لو كانت طلبت لحمه كان حصل ايه

جحا المصرى يقول...

لا إله إلا الله
ناس بتعيش عشان حاجة وناس بتموت عشان حاجة وناس ولا بتساوى أى حاجة
ربنا يستر علينا

اعشق فى الليل ضوء القمر يقول...

يا ستير يا رب
فيه ناس بالجحود ده

يا عوز بالله أذاقه الله الشقاء و العناء و الذل و الميته المخزيه له و لأهله

الازهرى يقول...

المشكلة ليست فى هذا او ذاك كلاهما من مظاهر المشكلة
المشكلة الحقيقية فى البعد عن الدين والقيم وزيادة الفساد المضطردة للغاية
وبمعدل يفوق اى تخيل

ادعوا الله ان يهدينا جميعا الى الحق

ابو على يقول...

ايه دا هو فعلا حصل كده؟؟

مستحيل يحصل دا ف زمن ماما سوزان وخالو جمال وعلاء

ادم المصرى يقول...

لا حول ولا قوه الا بلله

akeed يقول...

حسبنا الله ونعم الوكيل

حلم بيعافر يقول...

هو فيه حاجة تتقال بعد عنوان البوست؟
ماعتقدش

سبهللة يقول...

يتحبس ايه
دة لازم يتعدم
دة قتل مع صبق الاصرار والترصد
حسبنا الله ونعم الوكيل

Dr Ahmed Said@Black Armor يقول...

حسبنا الله ونعم الوكيل
يبدو ان هذا الهوان لا نهاية له
دى اول زيارة ان شاء الله مش الاخيرة بس بجد عجيتنى المدونة
وتسلم ايدك

elsha3er يقول...

السلام عليكم

حسبنا الله ونعم الوكيل

اقل الكلام واكبره


تحياتى

احمد الشاعر

شريكة في المطعم يقول...

لا حول ولا قوة الا بالله
الله يرحمها ويغفرلها
كل واحد عنده فلوس ولا معارف
بقى يفترى على الناس الغلابة
ونسوا حساب الآخرة

بلاش فضايح يقول...

هنقول ايه بس
معنديش حاجة أقولها غير اللى انتوا كلكوا قلتوه

وحسبى الله ونعم الوكيل

شكرا للجميع ومعلش هبئا أفرد الردود فى وقت تانى
معلش استحملونى

غير معرف يقول...

إمال إزاى الحكومة تعرف تربى هذا الشعب المسكين علشان كده لازم يقف فى طابور العيش نصف يوم وأمام صاحب السلطنية بتاع الفول النصف الثانى وبكده تبقى الدار أمان والأمن مستتب والبلد نظيفة أصل إحنا فى عصر النظافة اللى المواطن فيه أنظف من الصينى بعد غسيله.