الجمعة، 3 يوليو، 2009

يا تاج الهنا .. ياريتنى ماكنت انا

ضع علامة √ فى المربع 
شكرا لصاحب مدونة ( أعشق فى الليل ضوء القمر ) على التاج دة انا عمالة اهرب من التيجان دة حتى مامة مازن مررتلى تاج وانا لسة مستلمتوش

بس يلا بينا



من أنت ؟

انا واحدة من الشعب عايشة زى العايشين

ما الذى تفعله هنا ؟

نفسى اعمل حاجة ومش عارفة ايه هى ولا بتتعمل ازاى

إسرائيل تقصف كل جنوب ممكن بحثاً عنك أى شمال تقصد ؟

اعتقد ان ههرب متجه نحو الساحل الشمالى الأفغانى

أنت مكلف بحذف حرف من حروف اللغة العربية أيها ستختار ولماذا ؟

حرف الضاد (ض)
مبحبوش
مع ان لغتنا اسمها (اللغة الضادية)
بس بحس انه حرف مكلكع وضخم كدة

لو قدر لك أن تدخل السجن فما هى القضية التى تتمنى أن تدخل بها إليه ؟

ادخله بعد ما ادي جارتنا ام شوشو علقة متحلمش بيها
ايدى بتاكلنى

منذ متى اكتشفت نفسك ؟

لسة مكتشفتهاش
ولا شكلى هكتشفها باين عليا

على مفترق طريق الإفتتان اليمنى تقول ( إلى حلمك ) واليسرى تقول ( إلى ما لم يحلم به البشر ) أى الطرق ستسلك ؟

اكيد هتجه نحو مالم يحلم به بشر اعتقد هو دة طريق الجنة ( ما لا عين رأت ولا خطر على قلب بشر )

نحن لا نعيش حياتنا بل نتعلم فيها كيف نعيش ما تعليقك ؟

كلام صح
حياتنا كلها كفاح بحثا عن طريقة و أسلوب للعيش فيها

بجملة واحدة فقط اكتب تعريفاً لكل كلمة من الكلمات التاليه :

الوطن : مش شرط يكون بلد .. ممكن يكون أم او حبيب أو بيت اى حد تحس فيه بالأمان

الأم : حياتى من غيرها لا يمكن اتخيل حياتى
ربنا يخليها لينا

الليل : بظروفه بئا ساعات بحبه وبحس فيه بالهدوء من تعب اليوم
وساعات بخاف منه وبدعى ربنا النهار يطلع

الحب : شئ جميل خلقه ربنا للبشر بس هما استعملوه غلط

أمريكا : فتوة العالم بحس انها عاملة زى الفتوة ابو عضلات اللى محدش قادر عليه

المرأه : حبيبتى حبيبتى حبيبتى هههههههههه
انا متعصبة جداا للمرأة وبكره ظلم الرجل ليها

الصمت : مؤمنة جدا بان السكوت من ذهب بس مش دايما بعمل كدة هههههههههه

الإنترنت : على قد مميزاته الملحوظة على قد عيوبه اللى مالهاش حصر

اخترمنصباً واتخذ قراراً ؟

ييييييييييييه دة انا اتحطيت فى كل المناصب
اشى رئيس واشى وزير واشى مدير
مفلحتش فى اى منصب من دول


قيس ، عنتره ، جميل هم الذين يقولون شعراً ، وليلى وعبله وعزه " صموت " لماذا هذا التغييب للمرأه ؟

المرأة موجودة فى كل زمان ومكان افتحوا ( مولتى ) وانتوا تلاقوها حافظه نفسها ومركزها هههههههههههههههههههههه

أن تكون مطلوباً لإرتكابك جريمة خير لك من ألا تكون مطلوباً مطلقاً ؟ هل تتفق مع هذه العبارة ؟ علل ؟

لالا طبعا العكس أصح الا تكون مطلوبا مطلقا خير من ان تكون مطلوبا لارتكاب جريمة

إلى أين تمضى كلمات الحب بعد أن نقولها ؟

كلام الحب بيطلع عليه النهار يسيح

الحب مش بالكلام دة بالفعل


هل تجد علاقة بشكل أو بآخر بين المرأة وقطاع الطرق ؟

اه فى علاقة وطيدة الاتنين جبارين ومفتريين ههههههههههه

هذا فراق بينى وبينك متى ولمن تقولها ؟

لأى حد طلع ميستاهلش صداقتى وثقتى

كيف هو غداً ؟

احنا شكلنا داخلين على ايام ميعلم بيها الا ربنا

لمن تمرر التاج ؟

اعتقد ان ناس كتير اوى جالهم التاج دة
هحاول اختار ناس جديدة

E73 صاحبة مدونة معجزات

ميخو صاحب مدونة رحيق الحياة

محاسن حبيبتى صاحبة مدونة عايزة اطلق

عاشقة الأحزان صاحبة مدونة ايناس الأحزان

سفاح كرموز صاحب مدونة طرطشة أفكار

جحا المصرى صاحب مدونة جحا المصرى


هناك 52 تعليقًا:

mohamed ghalia يقول...

حلوه أوى الإجابات
ربنا يكرمك ويسعدك دايما
دمتِ فى سعادة

Me7'o يقول...

"الوطن : مش شرط يكون بلد .. ممكن يكون أم او حبيب أو بيت اى حد تحس فيه بالأمان"

حلوة قوى قوى الكلمة دى

وشكراً على التاج
ويارب يطلع مقاسى

yoyo يقول...

صباحك سكر يا نونا

كلى تاج وانت بالف خير يا قمر
معليش بقى

عجبتنى اوى اجابتك و الله
بس مش شايفة ان صعب نحذف اى حرف حتى لو مش كنا بنحبه
اللغة هتفقد معانيها و يكفى انها لغة القراءن الكريم

عجبتى جدا اجابتك دى
كيد هتجه نحو مالم يحلم به بشر اعتقد هو دة طريق الجنة ( ما لا عين رأت ولا خطر على قلب بشر )

هههههههههه مولتى هى فخر المراة يا بنتى
الواحد بيحس انه صندل يا جدعان ههههههه
بنات موز موز بقى

انا والله سعيدى باجابتك الجميلة دى اللى عرفيتنى اكتر واكتر عليكى
يالا كل تاج وانت جميلة
تحياتى
يويو

قهوة بالفانيليا - شيماء علي يقول...

:)
انا مش عارفة دي اول مرة اجي هنا و لا جيت قبل كدة :)


" الليل : بظروفه بئا ساعات بحبه وبحس فيه بالهدوء من تعب اليوم
وساعات بخاف منه وبدعى ربنا النهار يطلع "

مش عارفة انتي هنا تقريبا شملتي انواع الليل..
اللي اللي برانا و الليل اللي ممكن يكون جوانا :)
مش عارفة انا فهمتك صح و لا لأ..
:)
المهم ..
مصافحة أولى .. تحية و سلام

فتاه من الصعيد يقول...

حلوه اجاباتك وواضحه فيها شخصيتك ..... ناعمه وقويه ههههههه
اجابات رائعه بجد

Sweet Violet يقول...

عااااااااااااااااااااااااااااااا
بقى حرف الضاد مكلكع ده اول حرف من اسمى "ضد "
عاااااااااااااااااااااا

امشى يانونا انا مخمصاكى هه

و كمان فين التعصب للمرأة ده
ده انتى بتقولى انها مفترية و جبارة

v_v

nona يقول...

محمد

منورنى باول تعليق

شكرا ليك على مرورك الجميل

nona يقول...

ميخو

ههههههههههههههههههههههههه

لالا هيطلع مقاسك متقلقش
اصله فرى سايز

شكرا للمرور

nona يقول...

يويو القمر

انا معاكى انها لغتنا العربية
بس معلش بئا بلاش الحرف دة خانقنى اوى هههههههههههه

مولتى دى قناة المرأة العربية المستحية
هههههههههههههههههه

شكرا ليكى يا قمر

nona يقول...

شيماء

اهلا بيكى سواء كنتى جيتى او مجيتيش
المدونة منورة بيكى وفى انتظار تنوريها من وقت للتانى

فهمتينى صح يا شوشو

شكرا لمرورك

nona يقول...

فتاة من الصعيد

ناعمة وقوية وكلها حنية
ههههههههههههههههههههههه

شكرا لمرورك الجميل

nona يقول...

ضد التيار

معلش فاتتنى دى
ههههههههههههههههههههههههههههه

لالا كله الا خصامك يا سكر
غيرى انتى اسمك
بلاش الضاد دى
ههههههههههههههههههههه
خليها (دد التيار )
ههههههههههههههههههههههه

شكرا لمرورك يا سكر

هانى زينهم يقول...

حلوة الاجابات بس اكتر حاجة عجبتنى التعريفات اللى انتى جاوبتى عليها .

Hesham يقول...

احسنت الأسئلة والإجابات

كيــــــــــــارا يقول...

اجاباتك جميله جدا

عرفتني بيكي اكتر

عمرو يقول...

و الله يا أستاذه نونا اٍجابات لطيفه و فيها سرعة بديهه و عمق فى بعض الأمور اللى ممكن تعدى على الواحد من غير ما يلتفت لها زى مثلا العلاقه ما بين المرأه و قطاع الطرق :))
كل تاج و أنتى طيبه و تقبلى تحياتى و تقديرى ..

عمرو يقول...

صحيح نسيت أقول لك اٍحذفى أى حرف يعجبك بس بلاش الضاد و حياتك ..
الضاااااد ؟؟!!!!

nona يقول...

أستاذ هانى

شكرا ليك جدا

nona يقول...

أستاذ هشام

شكرا للمرور

nona يقول...

كيارا القمر

شكرا ليكى يا سكر انتى الأجمل

nona يقول...

أستاذ عمرو

المرأة فيها كتير من قطاع الطرق
بياخدوا اللى حقهم واللى مش حقهم

ههههههههههههههههههههههههههههههه

هو حرف الضاد زعل ناس كتير كدة ليه
خلاص علشان خاطركوا مش هلغيه
هكلم مجمع اللغة العربية حالا
بس على الله ميكونوش شالوه

هههههههههههههههههههههههه

شكرا ليك

ادم المصرى يقول...

ربنا يهنيكى فى كل شيئ

التاج رائع بجد
واجباتك اروع

واتمنالك حياه سعيده فى الدنيا وفى الاخره

جحا المصرى يقول...

الإجابات حلوه أوى واستمتعت بيها جدا
معلش اعذرينى هحاول أجاوب قريب
صعب دلوقتى

بسنت صلاح الدين يقول...

حبيبتى وحشتينى مووووت،ايه العسل ده الاجابات تحفه،عجبنى اوى ردك بأن الحب ليس بالكلام،انما هاموت واعرف ام شوشو مزعلاكى فى ايه بس ههههههههه

اعشق فى الليل ضوء القمر يقول...

اجابات جميله
بجد

يسلم عقلك
وبلاش تجمهر وشغل انقلابات على الرجاله
هههههههه

صوت من مصر يقول...

اجاباتك جميله
بس بلاش تكونى مع المراه وخليكى مع الراجل الضعيف

مامة مازن يقول...

خياااااااااااانة يا رجالة
كده تتطنشى التاج بتاعى عااااااااااا
ماشى ماشى ربنا يسامحك(زى مازن ما بيقولى)
حلو تاجك يا نونا وتعريفك للوطن رائع
ربنا يسعدك يا دكترة

Soma يقول...

غريب اوي التاج ده بس اجاباتك جميله ودمها خفيف قوي

انا حبيتك اكتر من اجاباتك الجميله واحساسك الحلو

جامده جامده وسلميلي علي ميلودي واللي بيطلعو في الميلودي

nona يقول...

آدم المصرى

شكرا ليك جدا
ربنا يبارك فيك

nona يقول...

جحا المصرى

شكرا ليك
خد وقتك
ولا يهمك

nona يقول...

بسنت القمر
ازيك انتى اللى وحشتينى يا سكر

ام شوشو ههههههههههههههههههههههههههه

عايزين نبئا نتجمع عليها نخلص فيها القديم الجديد

هههههههههههههههههههههههههههه

nona يقول...

اعشق فى الليل ضوء القمر

ههههههههههههههههههههههههههههههه

لالا احنا خلاص بنربى ضوافرنا اهوه
عايزينكوا تجروا فى الشوارع من الخوف مننا
هههههههههههههههههههههههههه

nona يقول...

صوت من مصر

مهو الراجل الضعيف ينقط بردو
هو يعنى عدل ؟
مهو ظالم بردو بضعفه

شكرا لمرورك

nona يقول...

مامة مازن
حمدالله على سلامتك
والف مليون مبروك لأخوكى

معلش معذرة
السماح ياهل السماح

فى القريب العاجل هحل تاجك يا قمر

nona يقول...

سومة
انتى الأجمل والأحلى

( مولتى ) بتسلم عليكى ههههههههههههههههههههههههههههههههههه

شكرا ليكى يا قمر

THE illusionist يقول...

مساء الفل
انا معرفش حد هونال يعنى
بس الاجابات حلوه
والتيمبلت ده
بتاعى
ههههه
لسه مجدد المدونه من كام اسبوع
حسيت انى داخل مدونتى
والاجابات حلوه بما انى اول ممره
معرفش لو تانى كانت هتفرق ولا ايه
وان شاء الله نيجى تانى وتالت

فشكووول يقول...

نونا العزيزه
ازيك
اشكرك على التعليق فى فشكول
ما زال هذا التاج يدور فى المدونات والحمد لله انى هربت منه

بس احسن حاجه عجبتنى وضحكتنى انك بتقولى


هل تجد علاقة بشكل أو بآخر بين المرأة وقطاع الطرق ؟

اه فى علاقة وطيدة الاتنين جبارين ومفتريين ههههههههههه

وآديكى شفتى لحظه عملت فى ايه من جبروتها
تحياتى

ليكوريكا يقول...

مبروك عليكي التاج

اجاباتك لذيذه اوي

:)

الازهرى يقول...

بجد اجابات فانتازيا جدا

والحمد لله ان اسمى مش موجود انا زهقت من موضوع التاجات ده

ولو من انصار المرأة فعلا اتمنى الاقى رأيك فى الفارس الاخير عندى وبالتفصيل

mahasen saber يقول...

ههههههههههههه مين ام شوشو عشان اروح اجيب شوشو وامها ونجيلك

انا بحب اخدم بس
واعتقد دعاء هتقف موقف الحياد فى الوقت ده

اشوفك يا شوشو بتضربى يا رب ههههههههه

انا جالى ستين تاج يا حاجه لمى تيجانك لو فيها فص عقيق ولاا ماسايه صغننه كده ماشى ميضرش

ام لو
لو لو لا يبقى انتا مصيرك هيكون مصير ام شوشو

E73 يقول...

بداية آسفة على التأخير

اجاباتك جميلة جدا على التاج

ربنا يكرمك يا رب انك افتكرتيني

ههههههههه يوم ما تفتكريني تفتكريني في تاج! واااااء

ان شاء الله اجاوب عليه قريب لا تقلقي

وتسلمي على الهدية الجميلة دي

عاشقة الأحزان يقول...

السلام عليكم

وحشششششششتتتتتتتتييييييييييتنى

بجد كتيرررررررررررر

أخبارك ايه يا سكره

انا الحمد لله تمام ورجعت من السفر الحمد لله
وبجد التاج جميل قووى ربنا يزيديك ابداع يارب


معلهش بقا انا بجد جاوبت على التاج ده قبل كده
وبجد ومش بهظر

ربنا يكرمك يارب
واقبلينى اخت ليكى ونزور بعض على طول
انا ضفيتك عندى حبيبتى
ربنا يسعدك يارب ويحقق ليكى كل ما تتمنى

تحياتى
انوسه

عاشقة الأحزان يقول...

السلام عليكم

وحشششششششتتتتتتتتييييييييييتنى

بجد كتيرررررررررررر

أخبارك ايه يا سكره

انا الحمد لله تمام ورجعت من السفر الحمد لله
وبجد التاج جميل قووى ربنا يزيديك ابداع يارب


معلهش بقا انا بجد جاوبت على التاج ده قبل كده
وبجد ومش بهظر

ربنا يكرمك يارب
واقبلينى اخت ليكى ونزور بعض على طول
انا ضفيتك عندى حبيبتى
ربنا يسعدك يارب ويحقق ليكى كل ما تتمنى

تحياتى
انوسه

nona يقول...

مستر زناتى

منور فى الزيارة الاولى
وان شاء الله مش هتبئا الأخيرة

أصل اللى بييجى عندنا هنا بنمسك فيه
لازم ينتشر فى المكان هههههههه

منور

nona يقول...

عمى فشكول

انا اللى بشكر حضرتك على مرورك على مدونتى
التاج دة كاس داير على المدونين

انما المرأة ههههههههههههههههه
فعلا جبارة
الرجالة كلها عجبتها الحتة دى

شكرا ليك

nona يقول...

ليكوريكا

فينك من زمان
شكرا ليك جدا على المرور

nona يقول...

الأزهرى
ازيك

انا شوفت موضعك فى الفارس الاخير
ورديت عليك
ومتبئاش تحرمنى من ردودك

شكرا ليك

nona يقول...

محاسن ( اللى واخدة بإيدى على سلم المجد )
هههههههههههههههههههههههههههه

هتتحدى مع ام شوشو ضدى
ماشى ماشى

وبعدين هتجاوبى على التاج يعنى هتجاوبى
انا تيجانى مترجعش ابداااااااااا

nona يقول...

E73

انا دايما فاكراكى بكل الخير يا قمر
وجاوبى على التاج بسرعة هه
يلا

شكرا لمرورك يا سكر

nona يقول...

عاشقة الأحزان

حمدالله على سلامتك يا قمر
انتى كمان وحشتينى جدا

ولا يهمك من التاج
وان شاء الله احنا اخوات من غير حاجة

نورتينى يا قمر

نـــــــــــــور يقول...

انا موجوده اهو

انتى عسل على فكره

حلوة المراه وقطاع الطرق دى
يالهوى عالجبروت :)

nona يقول...

نورة

يبئا انا اللى مش موجودة بئا
ههههههههههههههههههههه

اصل انا مبقيتش ادخل كتير بردو

المهم ازيك انتى يا قمر