مشايخ أخر الزمان

الشيخ وجدى غنيم .. انا كنت بحترمك وبحب صراحتك فى الحق لكن الواضح ان الصراحة قلبت معاك ب وقاحة , انا مش عارفة اصلا ينفع اقول عليك شيخ ولا لأ ! بالنسبالى انت دخلت فى زمرة المشايخ اللى الواحد يستغفر الله انه شافهم واللى يتقال عليهم ( اللهم لا تؤاخذنا بما فعل السفهاء منا )..

لأن الدين الاسلامى اللى المفروض انه دينك و الرسول صلى الله عليه وسلم اللى المفروض انه رسولك مكانش بيتكلم حتى ولو مع أعداءه غير بتهذيب و أخلاق 

( لتجدن أشد الناس عداوة للذين آمنوا اليهود والذين أشركوا ولتجدن أقربهم مودة للذين آمنوا الذين قالوا إنا نصارى ذلك بأن منهم قسيسين ورهبانا وأنهم لا يستكبرون ( 82 )  سورة المائدة

عن رسول الله صلى الله عليه وسلم قال ألا من ظلم معاهدا أو انتقصه أو كلفه فوق طاقته أو أخذ منه شيئا بغير طيب نفس فأنا حجيجه يوم القيامة

( ألا ) : للتنبيه ( معاهدا ) : بكسر الهاء أي ذميا أو مستأمنا ( أو انتقصه ) : أي نقص حقه وقال الطيبي : أي عابه لما في الأساس استنقصه وانتقصه عابه انتهى ( أو كلفه فوق طاقته ) : أي في أداء الجزية أو الخراج بأن أخذ ممن لا يجب عليه الجزية أو أخذ ممن يجب عليه أكثر مما يطيق ( فأنا حجيجه ) أي خصمه  

الواحد مبقاش عارف يعتذر عن مين ولا مين ... كسفتونا 

فيديو الشيخ وجدى غنيم .. خساره فيه لقب شيخ 

حب من طرف تالت

طبعا كل دولة ومنطقة وليها ثقافتها وفنها المشهورة بيه ومسلسلاتها المعروفة بطابع معين ..

يعنى مثلا الدراما الخليجية معروفة بالنكد من اول لاخر حلقة وليها زبونها بردو :)  و دايما بتتصور فى القصور ( هو مستوى معيشتهم كدة)

الدراما الهندية معروفة بالخيال المحدود و التقليد والابطال كلهم يطلعوا اخوات فى الاخر بعد التنطيط فوق العربيات والزحف تحت العجل .

اما المكسيكى بقا كل قضيته فى مسلسلاته هى البنت الجميلة اللى بيتخانق عليها شباب الحتة والحتت المجاورة و تقوم ضاربة الفستان الشفتشى ورايحة الجامعة على اساس ان دة اليونيفورم *_^ ( ماهو المشاهدين عندهم مبياخدوش بالهم)

الدراما التركى بصراحة معرفتش امسك عليها حاجة لانها متنوعة ومش حاصرة نفسها فى قصص واحدة وحياتهم بسيطة زيينا هما بس منفتحين شويتين , تلاتة , اربعة عادى ميجراش حاجة احنا اخوات

اما الدراما الكورى اكتشفت فيها اكتشاف مكنتش مكتشفاه قبل كدة , اكتشفت انها بتتمحور كلها فى الحب من طرف تالت ,

اتنين يحبوا واحدة

و الواحدة بتحب واحد منهم بس حبهم شبه مستحيل و فى صعوبات كتير تعوق الحب دة

والواحد اللى هى بتحبه فى واحدة تانية بتحبه بس الشهادة لله هو بيحبها زى اخته

والاخ الفردانى اللى بيحب البطلة طبيعى جدا ان قلبه يتكسر طول المسلسل

تقريبا ان المؤلف واحد و الممثلين واحد ( طبعا لانهم اصلا شبه بعض)

و المخرج ( يونج) هو واحد بردو

والمشاهدين دايما واحد

و انا بقا دايما متعاطفة مع الطرف التالت ومتشحتفة عليه بالرغم من ان المسلسل دايما بينتهى نهاية الافلام العربى القديمة

و الطرف التالت فجأة بيتقبل الوضع و بيلبسهم الدبل و يشيل لهم العيال وهو فرحان

يا خسارة شحتفتى عليك

 

الحرافيش 2011

النهاردة وانا رايحة الزيارة الاسبوعية للسوق مع ماما ربنا ميقطعها عادة لاحظت 2 رجالة شكلهم مش مريح و كل واحد شايل شومة كبيرة فعلا وطالعين من السوق .. المهم ، وانا بنقى فى الطماطم وانا طالع عينى فى التنقية ، لقيت واحد بيقول للبياعة
( طبعا استفتحتى النهاردة؟)
ردت قالتله ( ايوة بس مش معايا فكة) ،
انا خليته مشى شوية و لأول مرة افتح حوار مع البياعين :
سألتها ( هو بياخد منكوا إتاوة ؟ )
قالتلى ( ايوة)
قلتلها ( طيب هو بيعمل ايه قصادها)
قالت ( ولا حاجة)
قالتلها ( يعنى بيوفر ايه طيب ، شمسية مثلا او مكان أو نضافة )
قالت ( ولا حاجة انا بدفعله الصبح 5 جنيه وبس ، واخر النهار واحدة بردو بتيجى وتاخد 5 جنيه )
قلتلها ( مراته؟)
قالت ( لا ، دى واحدة غريبة واسنانها مكسرة كدة لو جت هوريهالك ، وفى واحدة بتيجى تنضف الشارع بعدينا ودى بنديها بردو ) قولتلها ( طيب دى ماشى علشان بتنضف المكان بعدكوا، لكن التانيين ليه تدوهم؟)
قالت ( امال يعنى أهزأ نفسى قدام الناس )
قولتلها ( هو بيهزأ؟)
قالت ( دة بيضرب كمان ، وانا مقدرش أهزأ نفسى ولا جوزى أصله بييجى معايا وساعات أخويا ، دة المرة اللى فاتت مرضيناش نديله كان هيضربنا وأديناله فى الاخر)
قلتلها ( انتوا لو اتجمعتوا عليه كلكوا مش هيقدر يعمل كدة تانى ، دة واحد ملوش شغلانه وقال يتسلى عليكوا ، مش لو عمل زيك مثلا واشترى قفص اى فاكهة ولاّ حاجة وباعه مش كان يبقى احسن)
قالت ( هنعمل ايه بس )
وبعدين قمت بعد منقيت الطماطم بالعافية و ادايقت علشان زمن الفتونة اللى رجع تانى والظاهر عمرنا ما هنتغير ..
الى شعب مصر العظيم .. أحب أقولكوا مفيش فااااااااايدة

ودلوقتى اسيبكوا مع اغنية سمعتها فى التاكسى وانا رايحة السوق

ما يطلبه المستمعون :

http://www.youtube.com/watch?v=DNEuFOyfx2E

يأس الطريـق

سألتُ الطريق : لماذا تعبت ؟ فقال بحزن : من السائرين
أنين الحيارى ..ضجيج السكارى زحام الدموع على الراحلين
وبين الحنايا بقايا أمان وأشلاءُ حب وعمرٌ حزين

وفوق المضاجع عطر الغواني وليلٌ يعربد في الجائعين
وطفلٌ تغرب بين الليالي وضاع غريباً مع الضائعين
وشيخٌ جفاهُ زمانٌ عقيم تهاوت علي رمال السنين
وليلٌ تمزقنا راحتاهُ كأنا خلقنا لكي نستكين
وزهرٌ ترنح فوق الروابي ومات حزيناً على العاشقين
فمن ذا سيرحمُ دمع الطريق وقد صار وحلاً من السائرين
همستُ إلى الدرب : صبراً جميلاً فقال : يئستُ من الصابرين !

فاروق جويدة

كل منا قلم رصاص

في البدء، تكلم صانع قلم الرصاص الى قلم الرصاص قائلا:
”هناك خمسة امور اريدك ان تعرفها قبل ان ارسلك الى العالم. تذكرها دائما وستكون قلما ناجحا فى حياتك العملية .“

أولا
سوف تكون قادرا على عمل الكثير من الامور المتميزة ولكن فقط ان اصبحت في يد احدهم

ثانيا:

سوف تتعرض لبري مؤلم بين فترة واخرى، ولكن هذا ضروري لجعلك قلما افضل.

ثالثا:
لديك القدرة على تصحيح اي اخطاء قد ترتكبها
.
رابعا
دائما سيكون الجزء الاهم فيك هو ما في داخلك.

خامسا:
مهما كانت ظروفك فيجب عليك ان تستمر بالكتابة. وعليك ان تترك دائما خطا واضحا وراءك مهما كانت قساوة الموقف
.
وفهم القلم ما قد طُلب منه، ودخل الى علبة الاقلام تمهيدا للذهاب الى العالم بعد ان ادرك الهدف منه
.
كلٌّ منا هو كقلم رصاص
تم صنعه لغرض فريد وخاص

الداخل عندنا مفقود والخارج من هنا مولود

لفت نظرى وانا خارجة حاجة عجبتنى بجد
مبنى المحكمة الابتدائية اللى عند السجن مكتوب عليها ( ادخلوها بسلام آمنين)
بس الحقيقة معرفتش هى مين دى اللى يدخلوها بسلام آمنين المحكمة ولا السجن؟
كان نفسى اصورها واجيبها بس خوفت يمسكونى بتهمة الله اعلم بيها
قولت على ايه الطيب احسن
يعنى انتوا تشوفوها وانا اروح فى داهية
بس فعلا شكلها يضحك اصل اكيد يعنى اللى داخل هناك لا بسلام ولا آمنين
هى ينفع يتكتب عليها ( الداخل عندنا مفقود والخارج من هنا مولود) او مثلا( سكة اللى يدخل ميرجعش)

بس طبعا اولا واخيرا الحكومة تكتب اللى تكتبه
انا بهزر معاها بس ولا محدش يهزر مع الحكومة ؟؟؟

قول للزمان ارجع يا زمان.....

كنا بنزور واحدةقريبتنا عجوزة اوى وسنها كبير يمكن فى السبعينات ( ربنا يديها الصحة)
لفت نظرى كلمة قالتها ان الشوارع دلوقت مش زى الشوارع زمان كانت فاضية حتى شوفوا الأفلام القديمة؟؟؟؟
فعلا والله....
مع انى بشوف أفلام قديمة وبشوف الويل فى الشوارع مع بابا لما بيحب يركن ولا حاجة وبشوف الإشارات قد ايه بغلب علشان أعدي الشارع من العربيات

قد ايه الحياة كانت هادية ورايقة وجميلة

دى جامعة القاهرة

دى محطة الرمل

دى محطة القطر

دة بئا قصر البارون

دة الواحد لما بيشوف الصور دى بيحس بالهدوء

انما دلوقت كبارى فوق وأنفاق تحت والحياة بقت خنقة

حبيت بس تشاركونى الصور وتخيل الحياة زمان

ليه الراجل أنانى ...

الراجالة دول كائنات تفكيرها غريب والله أكيد يعنى مش كلهم علشان محدش يزعل

بس غريب اوى انه لما يحب واحده يفهمها انها الأولى والأخيرة واللى مفيش بعدها وانه من بعدها هيموت

جايز يكون هو حاسس الاحساس دة فعلا بس بعد الجواز بئا بيتغير كل شئ لان الراجل بطبعه محب للامتلاك فبمجرد ميرتبط بواحدة ميرتاحش ولا يهداله بال الا لما تكون بتاعته ويتجوزها ودى حاجة مش وحشة....

الوحش بئا ان بعد الجواز والحمل والولادة مشاعره بتختلف من ناحيتها ( طبعا ماهى مش دى اللى حبها وكان كل اهتمامها بيه لوحده) دلوقت بئا فى أطفال ربنا جاعلهم أمانة فى رقبتهم لازم تهتم بيهم وبيت لازم يكون نضيف دايما وأكل لازم يكون جاهز و هدوم لازم تكون مغسولة واذا كانت كمان بتشتغل لتحسين ظروف المعيشة وفوق دة كله زوج لازم تكون طلباته مجابة يعنى الزوج ساعات بيكون هم فوق الهم ياريته بيساعد او يخفف من طلباته علشان يرحم المسكينة اللى مش عارفه تلاقيها منين ولا منين...

الراجل فاكر انه بمجرد ميصحى الصبح بدرى ويروح شغله ويرجع الضهر ولا آخر النهار يبئا عمل معجزة من معجزات الدنيا مع ان الست بتروح شغلها زيه وترجع تكمل الوردية فى بيتها

صحيح ربنا خلق الراجل والست كل واحد له ظروف معينة وتركيب معين بس دة مش معناه الافترى بتاع بعض الرجاله انه يرمى كل الحمل علها وفى الآخر يقولها مش انتى حبيتى اللى انا اتجوزتها

وهو عنده حق مش هى ...

لأنها شايلة المسئولية كلها لوحدها وشايله همه فوق دة كله انما هو مش شايل غير مسئولية الفلوس بس واللى هى كمان شايلاها لو بتشتغل

يارجالة ارحموا ترحموا دة احنا بشر زيكوا ربنا خالقنا زينا زيكوا مش عبيد

هيجرى ايه لو ساعدت مراتك واهتميت بيها زى مانت عايزها تهتم بيك

هيجرى ايه لو ساعدتها فى تربية اولادك اللى هما مش اولادها لوحدها

اتخلى عن الأنانية شوية وحس بيها علشان هى تحس بيك وتفضى تهتم بيك

الكلام والكلام اللى عكسه ......

عمرك كدة ماقابلك حد يفضل يقول حاجات عن نفسه وبعد فترة تكتشف انه العكس تماما؟؟؟
يعنى مثلا تلاقى واحد يقول :
انا صادق جدا فى كل حاجة وعمرررررى ماحب الكذب = يطلع اكبر كداب فى العالم
انا عمرى مكنت بخيل دة انا بيقولولى يا مسرف = يطلع جلدة
مثلا يقول انا راجل دة أنا أسد = يطلع أرنب كبييير
انا الناس كلها بتحبنى علشان معاملتى الحسنة معاهم = محدش طايقه وبيدعوا عليه ( يارب يموت)
وهكذا ...حاجة غريبة جدا ليه الناس بتعمل كدة مرض نفسى دة ولا ايه؟؟
طيب الواحد يصدق الشخصيات اللى بيقابلها ولا يكدبها؟ الى ان يبان العكس وتبان صحة أقواله
المشكلة فى الناس دى ان صحة كلامهم مبتبانش غير مع العشرة الطويلة
طيب لو عروسة ياعينى وعريسها قالها كدة وصدقته تعمل ايه بعد الجواز لما تكتشفه ؟؟
الصدق بئا معدوم مش حتى نادر الوجود
دة اختفى تماما
علشان كدة ربنا ورسوله بيأكدوا على أهمية الصدق
( ولايزال الرجل يكذب حتى يكتب عند الله كذابا)

ولما كل واحد عارف نفسه انه بخيل ولا كذاب ولا اى حاجة بيتكلم ليه ميسكت ويدارى على نفسه
يادى الفضايح
(اذ بليتم فاستتروا)