العريس المنتظر

قصة حقيقية .

القصة دى حصلت فعلا لواحدة كانت جارتى وبنتصل عليها نتطمن فاجئتنا بالنكتة دى :))

... شاب راح يتقدم لبنت ..

الشاب : انا معايا معهد علاج طبيعى
             و معهد قراءات

             و عندى عربية
             و شقة 550 متر
             و لينا نص محلات التوحيد و النور اللى فى وسط البلد

الأب : بسم الله ماشاء الله ونعم الناس
انت فى سنة كام فى معهد القراءات

الشاب : لا انا دخلت سنة اولى ومكملتش

الاب : اه ,, مش مشكلة عموما انت معاك معهد علاج طبيعى

الشاب : الحقيقة انا خدت سنة اولى وجيت فى تانية واحد صاحبى حصلتله حادثة ومات فاتعقدت و مبقتش اروح المعهد

الاب : يعنى انت دلوقتى معاك ايه ؟

الشاب : ثانوية عامة

الاب :عموما يا ابنى احنا يهمنا الادب والاخلاق
طيب هى التوحيد والنور فعلا ليكوا النص فيها

الشاب : ايوة بس الشراكة اتفضت خلاص

الاب : طب وشقتك دى نظامها ايه؟

الشاب :هى بس ساكنة دلوقتى و اول ما بتاع اللبن اللى فيها يطلع ان شاء الله فى ٢٠١٤انا هعيش فيها انا و مراتى

الاب : طب وهتورينا الشقة امتى ان شاء الله

الشاب : يعنى ضرورى ؟

الاب : طبعا يابنى

الشاب : خلاص ماشى هدفع جنيه فى السرفيس واجى اخدكوا

الاب : ليه وفين العربية ؟


الشاب : لا دى عربية نص نقل وأخويا شغال عليها

 >>>>

اللى زى دة مينفعش يعيش ليوم الثلاثاء

!!!!!!!!!!!!!!!!!!!!!!!!!!!!!!!!!!!!!!!!!!!!!!!!

ملحوظة :
دة نفس اللى حصل لابو العروسة بعد ما سمع حوار العريس :)))

حكايات جناح مكسور ..

البنت مسيرها للجواز

احنا مش هنعيشلك

واللى متتجوزش فى صغرها مش هتتجوز أبدا

البنت ليها زهوة لما بتكبر بتروح

والراجل بيدور على الصغيرة هياخد الكبيرة يعمل بيها ايه

بيبقا عجوز و يدور على بنت فى العشرينات

والرجالة كلها زى بعضها

هما دول الموجودين ولازم ترضى بالواقع

دى مقتطفات من الكلام اللى بيتقال من الاهالى للبنات كنوع من الضغط عليها علشان ترضى بعريس

و غالبا الأم بتمثل المسئولة الاولى عن الضغط النفسى على بنتها ( دة طبعا من كتر خوفها عليها ومن ضغط الناس عليها اللى بتطلعه على بنتها)

ولان الجواز معظمه جواز صالونات فالجواز بيبقا ( بطيخة ) ...

وبإعتبار ان معظم بيوت مصر لا تخلو على الاقل من بنت واحدة هنحكى باختصار شوية حكايات حقيقية من كل بيت شوية ....

الحكاية الأولى :

( مجبورة ) هو اسم البنت فى كل حكاياتنا...

مجبورة بنت متدينة وأهلها ناس من أغنياء بلدها .. وعايشة عيشة محترمة وكريمة .. وباباها بيشتغل فى دولة خليجية ودخله جيد , لكنه اتوفى بعد فترة , جالها عرسان كتير زيها زى أى بنت منهم الشارى ومنهم الطمعان , ومن ضمن العرسان .. جالها واحد ورفضته لانه من مستوى بيئى أقل ومفيش قبول من اول يوم , بالرغم من انه يبان عليه التدين و الناس اللى جابوه بيشكروا فيه جدا , ومع هذا مجبورة رفضت وقالت مش مرتحاله , فضل الشاب دة يروح وييجى عليها لمدة سنة , وفى كل مرة مجبورة ترفضه , وفى كل مرة مامتها تقعد تتخانق معاها وتقولها دة محترم وعارف ربنا و بيحبك , و فى كل مرة تحاول الست اللى جابته انها تقنع مجبورة بيه , وانه مفيش شباب بالتدين دة دلوقتى وزبيبة الصلاة باينه عليه , و هتلاقى حد زيه فين , دة مامته منقبة وهو متدين وهيلبسوكى النقاب وهيعيشك احسن عيشة , وكان يقوم على الصلاة فرض بفرض و مواظب عليها , و بعد ضغوط كتيييرة جدا وافقت مجبورة ( وهى مجبورة ) وفضلت تبكى وتقول مش عايزاه لحد يوم الفرح , ولكن الأم من خوفها وحبها لبنتها ضغطت عليها واتجوزته ( فى محافظة تانية ) .................

بعد الجواز البنت حالها اتدهور ومحدش عارف فى ايه !! بس كانوا ملاحظين فى زيارتهم ليها ان الولد بطل يصلى .. ومفيش زبيبة صلاة !!!!! و كأنه كان راسمها .. والدته خدت عفش البنت من الشقة وباعته وقالتها تيجى تسكنى عندى... التلاجة فاضية لدرجة ان مجبورة شالت الفيشة علشان مفيش حاجة فى التلاجة ...الولد بيسب والدته بألفاظ نابية قدام الكل والأم تضحك... لما كانت مجبورة بتعترض على بعض تصرفاته كان يشدها من شعرها بهدومها ويطلع الشارع يضربها قدام الناس ...

بدأت البنت تصرف من الميراث بتاعها وتسلف اهل جوزها بالالاف خوفا من غضبهم .. انجبت طفلة .. الحياة بتزداد سوء لانه مبيشتغلش .. بعد كدة اكتشفت ان جوزها بيدخل على النت يكلم بنات مش كويسة .. بعد فترة انجبت طفل كمان .. طلع يحتفل بالمولود على سطح البيت بحشيش مع اصحابه .. اهلها كلموها انتى ساكتة ليه ؟ قالتهم ( بحزن ) ملكوش دعوة بيا ... بعد فترة اكتشفت مجبورة انه جوزها بيصطحب بنات فى شقتها اثناء سفرها لوالدتها .....

وتوقف الوضع على الطلاق ...... يا ترى تعمل ايه مجبورة ؟؟؟ تستحمل وتكمل علشان الطفلين؟؟ ولا تطلق وتآسى من نظرة المجتمع للمطلقة؟؟ ويعتبروها منحرفة وخصوصا ان فى مجتمعنا الزوجة مدانة حتى تثبت براءتها

ـــــــــــــــــــــــــــــــــــــــــــــــــــــــــــــــــــــــــــــــــــــــــ

كل ما وصلت اليه مجبورة فى الحكاية دى أكيد نصيبها لكن بسبب ضغط الأم