فى بيت واحد

فى مناقشة حادة بين أحمد و أخوه الأصغر جابر :

أحمد : اوعى تروح هناك انا بحذرك

الأم : فى ايه يابنى بتكلم أخوك كدة ليه

أحمد : قوليله يا ماما مينزلش التحرير الجو هناك متكهرب

الأم : اسمع كلام اخوك يا حبيبى هو أدرى منك

جابر : ماهو الشرطة لو تبطل تضرب فى الثوار و تقف معاهم شوية مش هيحصل قتل و دم

أحمد : دول مش ثوار دول بلطجية ,, دول مش عارفين هما عايزين ايه

جابر : عايزين الجيش يتدخل ,,  الشرطة هى اللى بلطجية و دم الثوار مغرقها

أحمد : انت فاكر الجيش هيحميهم دة رئيسهم ألعن من مبارك صدقنى

جابر : انت مبتحبش الجيش و بينكوا و بينه عداوة علشان كدة بتقول الكلام دة

أحمد : طيب بكرة تشوف

جابر يهتف غيظاً فى أخوه : الجيش و الشعب ايد واحدة .. الجيش و الشعب ايد واحدة

الأم : بس بقا كفاية خناق .. اسكت يا جابر و اسمع كلام اخوك .. ( ثم تتحدث بإستجداء) وانت يا احمد بلاش تروح شغلك النهاردة علشان خاطرى

أحمد : مينفعش يا ماما دة شغلى

الأم بحزن : ماشى يابنى ربنا يحفظك و يستر طريقك

أحمد لم يكن يخبر أهله بيوميات عمله فكان يحب ان يحتفظ بها بحُلوها و مُرها حتى لا يجعل أهله يقلقون عليه

 

عماد الأخ الأكبر يتصل على والدته ليطمئن عليها :

الأم : أخبار الدنيا عندكوا ايه؟

عماد : كويسة يا ست الكل متقلقيش انتوا عاملين ايه

الام : ربنا يستر يابنى الدنيا مولعة

عماد : يارب يا امى ... انا يمكن اجيلكوا قريب

الام بسعادة : خلاص خدت اجازة ؟

عماد مرتبك : ايه !! اه .. اه فعلا

المشهد فى ميدان التحرير يزداد سوءً

صورة ثابتة من داخل الميدان

الثوار يحتشدون و تتصدر فى الصفوف الأولى قلوب غاضبة لا تعرف الخوف و تسير فى اتجاه الشرطة بشارع محمد محمود

الشرطة تقف مترقبة حاملة أسلحتها و تنتظر إشارة الضرب

الجيش يحاول منع الثوار و لكن الحشود هائلة و قد صُمَت الآذان ,, فيقف صامتا

و فجأة .................

تحركت الصورة

الثوار ينطلقون بكل قوتهم ... اُطلقت النيران عليهم .. اخترقهم الجيش بدباباته و احتدمت الاشتباكات و اقتربت الوجوه ...

 

يا له من قدر , فهل تحدث مثل هذه الأشياء لكل الناس ام انه اختص بالأخوة الثلاثة

جابر يتصدر جموع الثوار بينما أحمد فى جانب الشرطة يطلق الرصاص  و عماد فى جانب الجيش يرصد الموقف

كلُّ ينفذ ما يمليه عليه قادته ..

 

و لكن جابر هو الوحيد الذى نفذ ما أملته عليه مصر

 

النهضة من أجلك انت

الكبير لازم يتظبط علشان يظبط
و لاانتوا فاكرين انه بياخد الفلوس يحطها وديعة فى ال HSBC

ايه يا ناس ؟ اييييييييييييه
فاكرين الريس دة سوبر مان ..
الراجل جاى و البلد خربانة بقالها 30 سنة
ادوله فرصة و اتنين و تلاتة و اربعة و خمسة و ......... الى ما لا نهاية
الراجل من يوم ما مسك وهو بيندب حظه انه جه بلد زى دى أساسا
يعنى كتر خيره .. دة الرئيس المنتخب عارفين يعنى ايه المنتخب يا متعلمين يا بتوع المدارس ؟؟؟
يعنى جاى غصب عنه
و بعدين فيها ايه يعنى ما ابنه خريج امبارح يتعين فى المطار بمبلغ و قدره
ماهو الراجل بيبدأ بنفسه اهو .. و بعد كدة هيشوفنا بحاجة
هو مش طباخ السم بيدوقه الاول ؟؟؟
عشان بس ميجيش حد يقول حاجة .. الراجل بيجرب فى نفسه اهو
عيب بقا عيييييب عليكوا

و ايه يعنى اما واحد يموت و لا اتنين حتى ولا اى عدد
ايه اللى وداهم هناك ؟؟
و طالما اللى مات مش اخوان يبقا مش شهيد
يعنى فى داهية

ايه يعنى اما بتاع البطاطا الطفل البرئ دة مات
ايه اللى يزعل فى كدة ؟؟ اهو ارتاح من الدنيا و من المرار اللى هنشوفه
و بردو مش شهيد .. ها .. اخبطوا دماغكوا فى أقرب سور

و عاملين هيصة علشان ال 3 ارغفة
بالذمة مش مكسوفين على دمكوا و انتوا معترضين على ال 3 ارغفة
عيب كدة الدول التانية تقول علينا طفسين
كُل و اشكر

لا و ال ايه معترضين على الغلاء اللى حصل بعد ما قالوا نعم للدستور
امال البلد هتقف على رجلها ازاى يعنى
مش انت تدفع فى السلع الاول .. و بعدين ناخد اللى دفعته نديهولك مرتب الشهر
و لا انتوا عايزين الحكومة تدفع من جيبها
و بعدين يعنى ما الريس بدأ من عنده اهو و بيشترى الحاجة بالغلا

و مسكتوا لهشام قنديل ع الكلمة اللى قالها
انتوا ناس فاضية على فكرة
يعنى الراجل غلطان انه بينصح الستات؟؟
مغلطش يعنى
طب بالعند فيكوا بقا
الندوة الجاية  هتبقا قعدة ستات
وهيتكلم عن طريقة عمل الكوسة باللحمة المفرومة
و الحلو قرع عسلى

و كلام بقا و رغى عن جواز بنته من ابن الريس
فيها ايه؟
يعنى الواد لو متجوزش فى عز ابوه .. عمره ما هيتجوز و هيعنس
هييجى حد رخم يقول بس الشباب بيموت فى التحرير و دة رايح يجوز ابنه
هرد عليك يا رخم انت : ماهو كله علشان الشعب
لما الريس تبقا دماغه مشغوله بأولاده عمره ما هيفضالنا
و بتوع التحرير دول ايه اللى وداهم هناك؟

و ييجى حد رخم هو نفس الحد اللى فات
يقر على ال 3 ايام العمى اللى قضتهم خالتى ام احمد و زوجات قيادات الاخوان فى طابا
بطلواااا حقد بقاااااااااااااا
طب انت عارف هما راحوا ليه هناك ؟؟؟
علشان يشوفوا الطريق مظبوط ولا لآ
و علشان يظبطوا الامور فى طابا و يمهدوا الشوارع
و يقولولنا يالا تعالوا الدنيا حلوة
يعنى هما غلطانيين اللى ضحوا بنفسهم و راحوا يشوفوا الاجواء ايه هناك
قبل ما نجازف و نروح احنا؟؟؟

عالم لا بتشكر ولا بتحمد
يا ساااااااااااااااااااااااتر


ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الى من يهمه الآمر :

لو مات مننا كتير
لو متنا كلنا فدا مصر
مصر باقية
متتفتكروش انكم مخلدين
احنا كلنا راحلين
ومصر باقية
غصب عنكم

لأنى مصري ... مش هقول على مرسى ييييع

انتخبت مرسى علشان اتفرج على الثورة و هى بترجع الى الخلف من فوق منحدر لغاية ما لبست فى حيطة خرسانة
انتخبت مرسى علشان لما أعارضه يسحل حمادة
انتخبت مرسى علشان لما انزل المظاهرات يبعت عشيرته يغتصبوا البنات علشان محدش فيهم ينزل التحرير تانى
انتخبت مرسى علشان الضرايب تزيد
انتخبت مرسى علشان عجلة الانتاج تدحرج و البلطجية تزيد
انتخبت مرسى علشان السلع الغذائية تغلى
انتخبت مرسى علشان ننقسم احزاب و طوائف و ناكل فى بعض
انتخبت مرسى علشان يتقتل جيكا
انتخبت مرسى علشان يتعذب محمد الجندى
انتخبت مرسى علشان ناس تتخطف مترجعش شباب و صغيرين و حتى شرطة
انتخبت مرسى علشان يبيع قناة السويس
انتخبت مرسى علشان يطلع قتلة المتظاهرين براءة
انتخبت مرسى علشان كل مرة يعمل حوار وطنى ويضرب بيه عرض الحائط
انتخبت مرسى علشان يروح يحل مشاكل مالى و غزة و احنا لآ
انتخبت مرسى علشان ياخد باله شوية من أهله و عشيرته ,, احنا فى ستين داهية
انتخبت مرسى علشان يلحق يجوز عياله و هو ريس فى عز أبوهم ,,, و ناس بتموت فى التحرير
انتخبت مرسى علشان كل من يعارضه يبقا كافر و يهدر دمه
انتخبت مرسى علشان الانتخابات تتزور .... تانى
انتخبت مرسى علشان يقطع علينا ماية و نور
انتخبت مرسى علشان يبقا واجهتنا قدام العالم و تبقا الفضيحة عالمية
انتخبت مرسى علشان كل الشعب و الشرطة و الجيش يموتوا الا اهله و عشيرته المهم انهم بخير

بالرغم انى عارفة انك ملكش كلمة أساسا وانك مجرد عروسة ماريونيت فى ايد الجماعة .... بس
تنشك ايديا يوم مانتخبتك

خايفة ييجى يوم و اتخلى عن حبى ليكى

من سنتين ايام الثورة الاولى
 كل ما يحصل حاجة او حد يصاب او يموت
 ( كان بيجيلنا اكتئاب و حالات نفسية و انهيار عصبى و يأس و بكاء مستمر و كوابيس ) ..
بعد سنة بقينا
 ( بنزعل و نتخنق بس ) ..
 دلوقتى بقا ( ولاااااا اى اندهاش ) ..
 انا خايفة السنة الجاية
تبقا ( انشالله تطربق على الكل قبل الفجر )

انا بحبك اوى
بس خايفة ييجى يوم اتخلى عن حبى ليكى

*****************************************************

مصر تتحدث مع نفسها على الانترنت
بما ان السياسيين و المحللين و الأحزاب و المعارضين و المتحدث الرسمى و الرئيس بذات نفسه .. كلهم بيلقوا بيناتهم و كلامهم و معارضاتهم و الشجب و التنديد من على تويتر و الفيس بوك ...
طب اللى نازلين الشارع دول نازلين ليه ؟
مايتظاهروا من على الفيس و يعتصموا قدام التويتر هما كمان و يبقا كدة لا فى دم ولا ضرب ,,
و اللى ميعجبكش اعمله ريبورت .....

 

الريس شدلى مكتوب

ذات مومنت

 

لما البلد تبقا بتولع و مفيش مسئول سأل فيها

 

U Feel like

هى البلد دى ملهاش كبير ولا ايه!

 

 

 

و بعدين يقولوا الرئيس هيقول للشعب كلمة

 

U Feel like

أيوة بقا يا ريس .. اهو دة الرئيس المنتخب ولا بلاش

 

 

و بعد شوية قالوا دة رسالة على تويتر

 

U Feel like

الضغط بدأ يعلى ..

 

 

طب لو الريس ممعهوش رصيد ممكن يرن و احنا نتصل

 

و بعد ما تقرا الرسايل

 

 

 

U Feel like

هنموت منفجرين ... هنموت منفجرين

 

 

لا تقوللى سادة ولا منقوش .. لازم تلبس الفنكوش

مشروع النهضة هو :

1- بالنسبة للكهرباء
* نظرا للضغط المستمر على الكهرباء , فقد قررنا قطع عليكوا النور كل يوم شوية على ما قُسم كدة ,, و ايه يعنى متقعدوا بالفنلات صيف شتا ,, مش بلد خربانة بقالها 30 سنة عايزينها تتكهرب فى 100 يوم ؟؟

* و بالتالى أكيد الفاتورة هتغلى , من كتر استهلاكك للكهرباء ,, و متقولش مبيحصلش احنا الحكومة أدرى بيكوا وعارفين كل حاجة ,, الا الكذذذذذذذب أحبوووووووووووش.

* اما عن الزبالة المزودة على الفاتورة ,, دى متحملوش همها هى هتفضل على الكهرباء علشان منقعدش نرغى كتير

2- بالنسبة للاقتصاد والمالية :

اللى هيقول مصر مفلسة هخزقله عينيه الاتنين .... و لذلك

* هيتم غلق المحلات من الساعة 9 و فى نهضة بتقول 10 ونهضة تانية بتقول الساعة 12 .. هنحدد و نبقا نقولكوا .. و دة كله فى مصلحة المواطن أولا و أخيرا .. علشان يقوم الصبح بدرى يصلى الفجر حاضر فى الجامع و يبقا مصحصح كدة و رايق .. هييجى واحد رخم يقوللى طب و المسيحيين .. هرد و اقوله هما كمان عندهم صلاة وقت الفجر .. عشان تعرفوا بس ان احنا بنشجع العبادات .. هيجى واحد رخم ( هو نفس الواحد ) يقوللى طب لو ماراحوش صلاتهم , اشمعنى هما يناموا و احنا لا .. هرد عليه و أقوله الاعمال بالنيات يا أخى و القاعدة معروفة قتلانا فى الجنة وقتلاهم فى النار

* و بما ان البلد مفيهاش شغل يبقا قررنا رفع الضرايب على السلع التموينية و الاستهلاكية ,, و رفع الدعم عن البنزين و العيش و الغاز

* قناة السويس مش عاجبانى ,, مبقتش بتشتغل زى الاول ,, الظاهر انها عجزت و كبرت .. علشان كدة خلينا قطر تشاركنا فيها .. واهى مصر ام الدنيا .. مفيهاش حاجة لما ست الحبايب تدى نفحة

* الشحات له نص الدنيا .. مش كدة ولا ايه !!
يعنى نلف على كل بلد شوية ناخد اللى فيه النصيب .. و اهو اللى بيعمل خير بيقعدله فى عافيته وعياله

* امال هنسد تمن تحركات الرئيس وصلوات الجمعة ازاى .. ادفعوا يا شعب لرئيسكوا
أهلى و عشيرتى >> اتبرع ولو بجنيه

3- بالنسبة للنقل :
* قررنا التخلص من كل القطارات القديمة و الاتوبيسات و المترو و الميكروباصات عن طريق عمل حوادث متتاليه بحيث تتدشدش و نخلص منها بقا .. ايوة بقا خلينا ننهض ونجيب كله جديد فى الجديد خلى الشعب يعيش ,, دة اللى هيتبقى منه طبعا .

4- بالنسبة للعلاقات الدولية :
* عزيزى شيمون بيريز , لا مؤاخذة ان كنت بقولك عزيزى كدة فى أول الكلام  , اسمحلى اقولك يا مشمش من غير تكليف ,, انت فينك من زمان يا مشمش قاطع الجوابات .. عموما أنا مستنيك انت و الصهاينة عشان معزومين عندى على الغدا .. ناويين نقسم مصر و مش هنقسمها الا لما تييجوا ,, انا عارفك يا لئيم بتحب الجناحات .. وفى نهاية الرسالة أهدى سلامى لكل صهيونى على أرض اسرائيل الحبيبة و ياترى شيمون الانسان يحب يقول ايه لشيمون الحيوان ؟

5- بالنسبة للعشوائيات :
* قررنا نهد كل البيوت العشوائية فوق اصحابها ,, واهو كدة نخلص من الفقرا و من منظر البيوت والعشش .. و نقضى على المعشوائيين .

6- البطالة :
* هنعمل اماكن مخصصة للشحاتة و التسول , كل شاب يقعد يلقط رزقه فيه و الحكومة هتقاسمه فى حصيلة اليوم .. و المكان بيتأجر بالشهر و بيتكتب عقد .. اه علشان ميجيش الشخص الرخم يقول ايه اللى يضمن حق المتسول

* كمان هنضمن للبلطجية التحرك بسهولة و السرقة بسهولة فى الشوارع لان اصلا المحلات هتقفل بدرى وهنقطع النور و مش هتسمعوا فى الشارع صريخ ابن يومين و بالتاللى البلطجى يعرف يشوف شغله بدون قلق

7- الاعلام :
الدنيا حلوة , و ماما حلوة , و ماسبيرو منور بناسه
و عشان كدة سوف يتم غلق كل القنوات الفضائية , المصرية منها و المنوفية  , اللى عايز يقول حاجة ييجى يقولها فى ماسبيرو تحت تهديد السلاح

8- السياسة :
يعنى الشعب المصرى كله ماشاء الله بقا من الزهابجة .. كلكوا بقيتوا محللين سياسيين , متخليك فى حالك انت وهو منك له لها لها لها له .. متيجى تقعد بدالى يا اخويا

اما عن ................................................................... مش فاكرة
من رقم 9 لرقم 513 مش فاكراهم الحقيقة
بس اللى فاكر حاجة يقول
واهو كله علشان مصر

و دلوقتى اسيبكوا مع اغنية ( متقولش ايه ادتنا مصر قول هندى ايه لمصر )

 

نهضة الناس السبت و الاحد .....

بعد الاحتلال الفرنسى و الانجليزى لمصر عاش فيها كل الاديان
و كنا ......

و بعد هجرة اليهود واحد ورا التانى
 بقينا ....

أما بعد الاحتلال الاخوانى لمصر و دخول الاسلام أخيرا و الدعوة بطرد المسيحين
اصبحنا ..... حسن بس

أما بقا بعد دعوة الدكتور عصام العريان
هنبقا ...... حسن و كوهين

داهية لتكون هى دى النهضة !!!!

مقارنة مشروعة

والله يا جماعة انا جوايا كلمتين هقولهم وخلاص واللى معايا معايا و اللى يزعل يطق ( و انا ابتديت اشوف ناس مؤيدة طقت فعلا وعملت dislike ) :)))


ليه دايما المعارضين ( فى كل الاحوال مش فى حالة الظروف الحالية بس) تلاقيهم كدة اسلوبهم محترم و مؤدبين , ودايما بيتحاشوا المشاكل و الخناق
 
اما المؤيدين ( عامة ) دايما تلاقيهم لسانهم طويل و مفيش اى احترام خالص , و بيقولوا شَكَل للبيع , و اى حد ضدهم يبقا كافر ,, و لا يعترفوا بالحرية غير لانفسهم بالرغم من انهم دايما أتباع مع ان الرسول قال ( لا تكن إمعة )

تلاقى المعارضين هاديين و كافيين خيرهم شرهم و ارستقراطيين فى معاملتهم

تبص تلاقى المؤيدين فوضويين دايما ( ليه مش عارفة)

المعارضين مظاهراتهم سلمية علطول و بيأثروا السلامة

المؤيدين دااااااااااايما نازلين بالسنج و المطاوى و السيوف و الجمال و المولوتوف

المعارض له مبررات واضحة وصريحة

المؤيد تلاقيه بيجيب كلمة من الشرق وكلمة من الغرب ومش عارف هو عايز ايه ولا فاهم حاجة

المعارض عنده سعة صدر كدة ومتفهم , و حرية الرأى مكفولة و كلنا اخوات فى الاخر.

المؤيد معندوش تفاهم , و اللى مش معاه يبقا ضده

النهاردة بما انى وقفت 3 ساعات فى الطوابير علشان الاستفتاء , سمعت قصص كتير ,,
واحدة بتحكى ان بنتها راحت الصبح للجنة و واحدة من الواقفين سألتها هتختارى ايه ؟
البنت كان المفروض متردش لكنها قالت بثقة : هقول لا طبعا
و فجأة لقيت البنت وابل من الشتايم وقلة الادب ( وكمان بتقولى طبعا يا ...............)

و احدة تانية بتقول من شوية جت واحدة بتسألها : يا أخت .. مش انتى اخوان ان شاء الله؟
يعنى بمعنى أصح انتى معانا ولا علينا

واحدة جوزها اتصل عليها بيقولها فى واحد من حزب الحرية و العدالة قاعد جوة اللجنة ..... بيعمل ايه جوة؟؟؟ دى لا حرية ولا عدالة دى اسمها فَتونة و فِردة

واحدة كمان بتقول بنت اختى بتقول لأهلها أنا بستعر منكم , قالولها ليه يابنتى , هو مين اللى رباكى و علمك احنا ولا مرسى ؟
قالتلهم متجيبوش سيرته ابدا على لسانكوا انا مفتخرش انكوا اهلى ( لمجرد انهم معارضين )

المفروض بعد كدة تبقا خطابات د/ مرسى :
ايها الاخوة المؤيدون على نمط خطب مبارك أيها الاخوة المواطنون
الاخوة المؤيدون دول بقا بيفكرونى بمرسى ابن المعلم الزناتى لما كل ما حد يبقا عايز يقول كلمة  ,, يرد مرسى عليه ( اااااااااااااااايه يادين النبى .....) من غير مايسمع ولا يفهم هو عايز ايه اصلا ,, انما هو عاجبة الكلام من غير ما يسمعه

 

رسالة الى الوالى

السيد رئيس الجمهورية د. محمد مرسى

 

السلام على من يتقى الله

اما بعد

 

اتحملنى يا ريس علشان هتكلم معاك باللغة العامية , لانى لا استطيع مضاهاتك فى اللغة العربية الفصحى .

انا مواطنة مصرية لا انتمى لاى أحزاب , لم انتخبك فى الجولة الاولى , ولكن فى الجولة الثانية لما وقف قصادك شخص غير مرغوب فيه (اكتر منك) اخترتك انت , وصدقنى يا ريس مش علشانك ( انا معرفكش ) دة علشان انا بحب مصر اكتر من نفسى .

و الفوز كان من نصيبك و حمدنا ربنا مش علشان انت كسبت لا دة علشان شفيق لم ينجح .

وكلنا عارفين ان اول فترة رئاسية هتكون من أصعب الفترات و استحملنا ... و استحملنا ... و استحملنا

وكان كل ما حد يعارضك اقنعه ان لازم نستحمل , مصر جديدة على الحرية و خربانة بقالها كتير ومش بسهولة وفى 100 يوم هتتصلح .

و استحملناك و قولنا معلش رئيس جديد بقا وبيتعلم فينا ميجراش حاجة  ان مكناش احنا نتحمله امال مين يتحمل

و استحملنا .... واستحملنا ....واستحملنا .

و وعدتنا وعود كتير و صدقناك و قولنا هييجى منه خير .

اتفرقنا , بعد ما كنا فئتين فلول و ثوار بس , فى عهدك بقينا فلول و ثوار و اسلاميين  ( وكأن المعارضين كفار ) , و لازال التقسيم جارى .......

قالوا مفيش مشروع نهضة , قلت مش مهم اهى فترة 4 سنين المهم نعدى , لسة بدرى على النهضة أصلا .

و لما حد يشتمك اقوله اعتبره أبوك يا آخى .

نصبت نفسك ديكتاتور , أقنعت نفسى ان الاعلان لاغى بمجرد عمل الدستور , الريس بيحصن قرارته من المفسدين .

طبختوا الدستور على نار عاليه ملحقش يستوى , قلت مش مشكلة هنزل من بيتنا كمواطنة مصرية اقول رأى ( لا) علشان دة دستور مصر ومستقبل , مش دستور ريس مؤقت , و هيتصلح الدستور أكيد .

و كنا مستعدين نكمل معاك المسيرة على جسر العبور للحرية لحد مانوصل لبر الامان .

لكن اتفاجئنا انك مش عايز تاخد معاك غير فئة معينة , وسبتنا يا ريس على البر المظلم و خدتهم هما معاك لبر الامان , هم بس المستفيدين منك , وكأنها بقت بلدهم لوحدهم .

و شلت قناعك و لقيناك تشبه رئيس قديم كنا نعرفه  , و مشيت على نفس خطاه , بس الفرق انك كنت أسرع منه فى التخلى عننا .

أنا لا أتمنى رجوع مبارك

و لكن كل ما أتمناه الان

 أنك تحصله .

 

استحملناك كتير لكن كله الا الدم ............................. ياريس

 

ليه لأ ..

منقول ولا يعبر عن رأيى ولكن لمجرد الافادة  .......................................

20 سبب لرفض الدستور:

1- لا يوجد فى المسوده ما ينص على تعيين نائب للرئيس و قد كان مطلب ثورى .
2- مسموح لمزدوجى الجنسيه الترشح للرئاسة مادة (136) .
3- من حق الرئيس تعيين كل رؤساء الاجهزة الرقابية والتى من واجبها الرقابه على أعمال الحكومه والرئيس مادة (204) .
4- له حصانه برلمانية مدى الحياة لعضويته فى مجلس الشيوخ ولا توجد طريقه لمحاكمته الا التلبس مادة (130) .
5- من حق الرئيس تعيين الضباط العسكريين وعزلهم دون وضع قيد .
6- يكلف الرئيس رئيس الوزراء تشكيل الوزارة دون وضع معايير لأختيار رئيس الوزراء .
7- من حق الرئيس أعلان حالة الطوارئ بعد موافقة مجلس الوزراء ثم يعرض علي البرلمان وليس العكس .
8- من حق الرئيس حل مجلس الشعب فى حالة أعتراض البرلمان على تشكيل الحكومة مرتين متتاليتين دون قيود .
9- تدرج جميع نفقات رئاسة الجمهوريه والأجهزة الرقابية التابعه لها للميزانية العامه للدولة وتخضع لرقابة الجهاز المركزى للمحاسبات التابع للرئاسة وهو جهاز للإحصاء فقط وليس للمحاسبة .
10- يعين الرئيس ١/٤ أعضاء مجلس الشيوخ والذى من صلاحياته امكانية الاعتراض وتعطيل إى قانون صادر عن مجلس الشعب .
11- حق الرئيس ان يختار قضاة المحكمه الدستوريه المسئوله عن محاسبة الرئيس شخصياً والحكومة والبرلمان عن عدم دستورية إى قانون يتم اصداره .
12- لا ذكر لأستقلال الهيئات القضائية أوالطب الشرعى وقد كان مطلب شعبى .
13- تقليص دور الجهاز المركزى للمحاسبات لمراقبة الأموال العامه فقط وليس الخاصة وتلك كارثة مادة (206) .
14- إلغاء الأشراف القضائى الكامل على الأنتخابات وإسنادها إلى مفوضيه مع عدم وجود معايير لأختيار أعضاء المفوضيه مادة (210) .
15- الأقتراع والفرز سيقوم به تابعون للمفوضية ولا توجد آليات محدده لإختيار هؤلاء التابعون ولا تحديد من يقوم بالأختيار .
16- لم يتم ذكر من يعين محافظ البنك المركزى ولم ينص على تقديم تقرير العمل لمجلس النواب .
17- لا يجوز تغيير مواد الدستور قبل عشر سنوات مادة (220) .
18- تم الغاء ماده حظر بيع اراضى سيناء
19- تم الغاء ماده حظر تاجير قناه السويس
20- تم الغاده ماده حظر زواج الاطفال
21- السماح بعمالة الاطفال من بعد سن 6 سنوات
22- يشترط فى المترشح لعضوية مجلس النواب أن يكون حاصلا على( شهادة إتمام التعليم الأساسى على الأقل)

كلاكيت تانى مرة

 يالا يا أساتذة اجهزوا علشان نعيد المشهد ... فين الثوار

جاهزين ياأستاذ

 طب اللى هيعملوا دور الشهداء فين

نايمين جنب الصناديق حضرتك هناك

 والأمن جه ولا لسة ؟ مش شايف حد منهم يعنى

لا حضرتك جم بس ورا السور

 طيب تمام

جبت المولوتوف والغازات المسيلة زى ما قولتلك

جبنا المولوتوف بس حضرتك

وليييييييييييييييه مجبتش الغازات

مممماهو ملقيناش حضرتك بس هنتصرف

 يعنى ايه ملقتوش .. انا مش قايللك تخزن المنتهى الصلاحية ومترميهوش هنعوزه ..

طب جبت الرصاص الحى

لا محدش رضى يدينا بس جبنا بداله حجارة و طوب

فى بالذذذذذذذذذذمة رجل امن بيشيل طوب بدل الرصاص

اعمل فيكوا ايه .. كدة هتبوظولى المشهد

حسبى الله ونعم الوكيل

..........................

4

3

2

1

 Gooooooooooooo

تعيش و تفتكر يا شهيد

الذكرى الاولى لمجزرة شارع محمد محمود
19/11/2012
فى كل ذكرى لازم نرجع نمثل المشهد من الاول
الضرب والقتل و الغازات و الملوتوف
امال هتبقا ذكرى ازاى

ــــــــــــــــــــــــــــــــــــــــــــــــــــــــــــــــــــــــــ

منصور ( منهك ) : هو ايه اللى حصل

مقهور : انت مش فاكر؟

منصور ( يحاول التذكر ): كل اللى فاكره اننا كنا بنجرى من الجيش و بعدين حسيت ان حاجة دخلت فى جسمى

مقهور ( يعلم كل شئ ) : حاجة ايه ؟

منصور : مش عارف بس من بعدها دوخت و وقعت ع الارض ومش فاكر حاجة بعدها

مقهور : بعدها بقا يا سيدى جه عسكرى وشدك على الارض و رماك جنب صندوق الزبالة

منصور ( مذهول ) : أنا ؟ ليه ؟

مقهور : ماهو الحاجة اللى دخلت جسمك دى كانت رصاصة 

منصور : ااااه , علشان كدة بقا انا هنا

مقهور : اه علشان كدة انت مش معانا فى الدنيا

بدون عنوان

جتتنا أهي نَحَسِت \ مِن كَترة الأوجاع
و الموت برَغم جلالهُ
بقى يجي و يعَدي
و الناس مبتهابلوش
الماتش لَهانا
و الفقر أهو عمانا
من كُتر بَلوانا
الدَم بقى بـ قروش
أو قَد يكون أرخَص
رغم إن مَلك الموت ..

عُمرهُ ما يسترخَص
...

بيسلبنا المَعطوب
و بيقطُف الغالي
جتتنا أهي نَحَسِت \ و لا عُدنا بنبالي !
___
:(

بقلم عزيزة على

 

 

 

نحو طفولة مشردة ... ( عفوا ) أكثر تشرد

 

 

التعليم الالزامى هو المرحلة الابتدائية فقط ,,
اذن الطفل ميمدش ايده فى شغلانة قبل 6 سنين,,

لان السن الالزامى للتعليم هو 6 سنين ,,
 يعنى ايه ميبقاش فى تجريم لعمالة الاطفال ,,
يعنى الطفل يروح يبيع مناديل فى الاشارات ويندهس تحت العربيات علشان اهله يرتاحوا ,,
يعنى الاباء القاسيين ( الفقراء والاغنياء ) هيستغلوا ابناءهم ,,
...

يعنى ابنى يروح يشتغل مكانيكى وياخدله مفك فى وشه ،
يعنى ما احلى التسول فى ظل الدستور الجديد ,,
يعنى يسيبوا المدارس أحسن لان التعليم هيعطل سوق العمل ,,
يعنى بعد ما كنا بنحاول نحمى اطفال الشوارع .. اولادنا كلنا هيبقوا فى الشارع ,,
يعنى طفولة مشردة ,, يعنى مستقبل متشرد ,,
يعنى لا

لا

لا

لا

لا

 للدستور الجديد

و راح الدم ع الفاضى

لعبة لعبناها زمان واتعلمنا منها واتطبقت فى حياتنا واكتشفنا ان احنا متعلمناش :(

بعد النطق بالحكم ,, وبعد الصدمة كالعادة ( نظرا لان احنا اتصدمنا كتير من اول الثورة لحد دلوقتى)

حسيت ان هو دة حال الثورة

بعد ماوصلت لقبل النهاية بخطوتين

التعبان نزلهاااااااااا تاااااااااانى لاول مربع :((

بعد كل التعب اللى شوفناه

والاكتئاب اللى لازمنا

والشهداء اللى وشنا منهم بقا فى الارض :(

الحرية جديدة عليا :(

للأسف كلنا خابت توقعاتنا فى الانتخابات ,, ومش عارفين ليه ؟
هل دة بسبب الجهل السياسى اللى بينتاب المتعلمين قبل الاميين؟
ولا بسبب الفقر والخوف من الجوع اكتر بسبب الحالة الاقتصادية؟
ولا بسبب الخوف الدينى اللى انتاب الاخوة الاقباط ؟
ولا بسبب الانفلات الامنى وخوف الناس وبالتالى بينتخبوا اقرب واحد يطبطب عليهم و يقولهم متخافوش هحميكوا؟
ولا بسبب انتشار الفاسدين وامنياتهم برجوع النظام السابق؟
ولا بسبب وقف الحال والناس اللى شغلها يومى قعدت فى بيوتها ؟؟ المؤمنين بشعار ( منكوا لله خربتوا البلد)
.....................
اعتقد دى كلها اسباب فى الحسبان واعتقد انها كلها اسباب متوقعة ,,
يمكن عيشتنا 30 سنة تحت ظل ( يا حيطة دارينى , و خليك ماشى جنب الحيط ) خلتنا ننتمى للحيطة ومنتكلمش ومنعترضش ,, ولما فى يوم زهقنا من القهر والظلم هدينا الحيطة ,, كنا فاكرينها هتقع الناحية التانية بس للأسف وقعت علينا ,, ولما شوفنا النور معرفناش نعمل ايه ونعدى الناحية التانية للنور ازاى !!!
مش كل المتعلمين عندهم ثقافة سياسية ,, وبالتالى لما اتحطينا فى اول استفتاء على ترقيع الدستور ,, الناس قالت (نعم) من خوفها وجهلها بالسياسة ... وفى تانى انتخابات واللى كانت ( مجلس الشعب) بعض الناس انتبه ولكنهم بردو اختاروا ( الاخوان) ايمانا من الشعب ان الاخوان هما المنقذ ونجربهم احسن من الفلول ...
وفى تالت انتخابات اثبت الشعب المصرى جدارته بأن ( العبودية اردة شعب) للأسف ....
بس انا رأيي الشخصى ان لو كان هناك توعية بقوة للناس المتعلمين والاميين مكانش الوضع وصل لكدة
لان انا اعرف ناس فقرا وحالتهم مسكينة وقالوا احنا هننتخب حمدين ,, وناس قالت ابو الفتوح ..
واعرف ناس مستفيدة من النظام السابق وناس تانية خايفة من مستقبل مصر انتخبوا شفيق
وناس تانية عجبتها لحمة الاخوان والتموين وانتخبوا مرسى
متأكدة ان فى ناس مش هتصدق ,, بس دى حرية شخصية لانى واثقة من كلامى وشفت بعينى محدش قاللى :))
........................
دلوقتى اتحطينا فى وضع صعب بين اتنين خارج اختيارتنا تماما
وكل واحد فينا له وجهة نظر
وكل واحد شايف مصر بطريقته
وكل وجهات النظر تحترم
ولكن اتمنى يكون فى توعية أكتر من كدة لكل الناس المتعلم والجاهل واللى عارف اى معلومة قانونية او سياسية يقولها
بلاش تسيبونا نجتهد احنا فى السياسة لاننا مش فاهمين حاجة ولسة جداد فى الديموقراطية
وكل اللى يعرف حد يوعيه بالفرق بين الاخوان والفلول
انا لا بميل للاخوان ولا الفلول
ولكن الحق أحق ان يتبع
ولازم بدل مانهاجم فى بعض ونقع فى بعض ,, نقنع بعض لان معظمنا حافظ مش فاهم
وانا شوفت امثلة كتير من اللى هينتخبوا شفيق ,, مش عارفين هما منخبينه ليه ,, ولا عارفين الفرق بين الفلول والاخوان
وربنا يولى الاصلح لمصر

دة كان فى يناير الماضى بداية العام ,,,,,,,

http://www.youtube.com/watch?v=2-Vijg5Zz_o

أنا اللى هتفت سلمية
لا انا صايع ولا بايع سنين عمرى اللى باقية بلاش
ولا حابب اشوف أمى قلقها عليا مبيهداش
... لا عاوز أشوفها شايلة الهم وتبكى لو تشوف الدم
ولما تتسئل عنى تقول ده ضنايا راح ولا جاش
... أنا اللى هتفت سلمية
ولا كان نفسى أشم الغاز
ولا أمسك طوبة فى إيديا
ولا خرطوشه تحرقنى
أنا اللى هتفت سلمية
مكنش فى بالى ضرب النار
ولا إنى أنضرب برصاص
ولا إن عنيا تبقى نشان لظابط مفترى قناص
أنا اللى نزلت بهتافى خلعت نظام
وحققت اللى كان فاكرينه قال أحلام
ساعتها إتشلت فوق الروس وقالوا عليا أحلى كلام
دة كان فى يناير الماضى بداية العام
ومات أيامها صاحبى فؤاد
ومات خالد ومات رامى
وراحت عين قريبى هشام
وعدى الشهر بعده الشهر
وفاتوا عليا زى الدهر
ودم الشهدا يفزعنى
ويقلق راحتى كل مانام
ساعتها لاقيتنى متكتف وقلت لابد أعود أهتف
رجعت هتفت سلمية
وقلت الدم مش للبيع
بورقة بعشرة أو ميه
فى إيدى ايه غير إنى أهتف
فضلت أهتف فضلت أهتف
---------
وقلت يا ناس ده انا اللى هتفت سلمية
قالولى لأ ونكرونى
وشفت الدم من تانى
وعاد المشهد الدامى
وده كان يوم ما مات مينا

علشان مقبلشى تانى الذل وراح يهتف
وزادت قايمة الشهدا عدد من الناس
فيه منهم صابته رصاصة أو اللى إنداس
وزادوا الحزن والقهرة
وعادوا الكرة ميت مرة
وسال الدم من تانى على جبينه وغرق عمته الحرة

ومن تانى علشان خاطرك
يسيل الدم يا طاهرة
-------------
وبعد ده كله
أنا اللى هتفت سلمية
ويسقط كل من خانوا .. ويسقط كل من هانوا ..
ويسقط كل من وقفوا في وش جيل بيتحرر ..
ويسقط كل من ضربوا .. ويسقط كل من قتلوا ..
ويسقط كل من شطبوا سطور في تاريخ بيتسطر ..
ومن تاني .. رخص دمي وسال في شوارع التحرير
معدش بينفع التبرير .. ورجعوا وقالو تستاهل
لكن عارفين ؟ .. أنا أستاهل
عشان أنا كنت متساهل
ولجل يكون في معلومكم مفيش حرية بالساهل ..
ومهما يسيحو في دمي إرادتي مش هتتكسر
فدا بلادى تروح الروح
ولا أشوفها بتتعسكر

انا ثورى اذن انا بلطجى ...

الرجالة فى التحرير

ايوة من وجهة نظرى كل الرجالة اللى بجد هما اللى نزلوا التحرير .. ممكن يكون كل واحد منهم له رأى وممكن نتفق معاه أو نختلف .. لكن مواجهة القنابل المسيلة و الخرطوش والرصاص الحى والمطاطى ميواجهوش الا الرجالة .. و اللى ماتوا مش أقل مننا , وأهاليهم مش بايعاهم و احنا اهالينا خايفة علينا يعنى .. دول رجالة بلدنا اللى مصدقنا انها طلع فيها رجالة بعد اللى ماتوا فى الحرب .. أحب اطمن كل رجالة التحرير ,, كل واحد فيكوا فارس أحلام بنات مصر (( المعرضة عن الزواج لحين ظهور راجل بكل صفات الرجولة ))

تهمتى كانت .. حب بلادى

و نزلنا يوم الجمعة
نزلنا يوم الجمعة 27 مايو علشان حاجات كتير ، علشان تسريع المحاكمات ، وعلشان اخواتنا اللى فى السجون ، وعلشان نلفت نظر المجلس العسكرى لبعض القضايا اللى سايبها تعمل فتنة من غير ما ياخد باله ، يمكن من وجهة نظرى نازلة علشان مصر ، ومن وجهة نظر اللى معترض على المظاهرات انه هو بردو قاعد علشان مصر ، المهم ان كلنا متفقين على ان اى حد بيعمل اى حاجة بتكون علشان مصر .......
و نزلنا لمكان تجمع المظاهرة فى بلدى.. عرفناهم من الأعلام اللى ماسكينها والورق اللى بيوزعوه .. اتجمعنا عليهم وبدأنا نزيد شوية بشوية .. ومشينا فى الشوارع نهتف ونجمع الناس .. ولازم طبعا يكون فيه المعترض والمؤيد .. وبعدين وقفنا فى مكان وفضلوا الشباب يهتفوا وينادوا الناس تنزل ..
كان عددنا قليل بس كان فينا كل الطوائف المسلم والمسيحى ، المتزمت والغير متزمت من الشباب والبنات ، الكبير والصغير ، اتعرفنا على بعض ولقينا ناس كان لينا مواقف خاطفة معاهم ، كان يوم جميل ...
بعد شوية كان معانا واحدة اتعرفنا عليها وجالها تليفون وفجأة قالتلى خدى كلمى ماما طمنيها ان انا معايا بنات ، فكلمت مامتها وطمنتها وبعدين قفلنا السكة لقيتها بتقوللى انا كنت مستنية عند المسجد لقيت قريبى ظابط ولابس مدنى قاللى انتى بتعملى ايه روّحى ، قالتله لا انا مش همشى هحضر المظاهرات .. ودلوقتى مامتها اتصلت علشان تقولها ان قريبها شافها واتصل على البيت وقالهم هاتوا بنتكوا من المظاهرة بدل منجيبها احنا !!!!!!!!!!!!!
بعد شوية لقينا 2 شباب رايحين جايين قصادنا ، وبعدين وقفوا على بعد و وقف معاهم راجل كبير ، وفضلوا يبصوا علينا ويشاوروا وماسكين موبايلاتهم زى ميكون بيصورونا ، فى الاول دخل الشك قلوبنا بس سكتنا ، بعدين وقفت قصادهم عربية وراح نازل منها راجل تانى وقف معاهم وبردو قعدوا يشاوروا علينا ويتكلموا ...
اتكلمنا مع بعض وصلنا لحل ان احنا نشوف شكنا فى محله ولا لأ .. احنا شكينا ان دول أمن دولة وبيراقبونا .. واحد مننا قال تعالوا نمشى قدام شوية ولو جم ورانا يبقوا فعلا بيراقبونا .. اتفقنا ومشينا خطوتين بالعدد ، بصيت فجأة لقيتهم بيمشوا ورانا صرخت و قولتلهم بصوا دول جايين ورانا .. راح واحد واقف واتجه ناحيتهم وقال انا هشوف مين دول,, بمجرد ما مشى ناحيتهم راحوا راجعين ومشيوا بسرعة و قعد يمد فى خطوته لما وصلهم ، وسلم عليهم واتكلم معاهم ، وفجأة رجع طبعا معرفناش قالوا لبعض ايه !! سألناه قال بيقولوا احنا واقفين تحت عيادة الدكتور بتاعنا ومستنينه ييجى !!! وهو صدق ...
هو فى دكتور يوم الجمعة الساعة 2 الضهر يابنى؟؟؟ ولما هو كدة مشيوا ورانا ليه؟؟؟ ورجعوا ليه لما انت روحتلهم ؟؟؟ هو انت معاهم ولا ايه؟؟؟
أمن الدولة لسة موجود ولكن تحت مسمى آخر ( الآمن الوطنى ) .. وماشى ورانا... وطبعا خوفنا كلنا و اتفقنا على أننا فخورين باللى بنعمله وكفاية ان احنا حاولنا ومش سلبيين بعد شوية اتفرقنا ورجعنا البيت .. عرفت بعد كدة ان الامن الوطنى عنده أوامر يجمع معلومات عن المتظاهرين لحين اخراج ملفاتهم وحبسهم !!!!!!!! والخبر دة حقيقى لانى عرفته من حد موثوق جدااا
و لو لقيتونى اختفيت فجأه اعرفوا انى اتمسكت بتهمة حب بلادى........

قالوا هننزل التحرير .. قلت استنوا انا وياكوا

فات اكتر من 100 يوم على ثورتنا المصرية .. ايه الجديد اللى حصل؟
غير بس الشرطة اتقمصت من الشعب والشعب قعد يصالح فيها علشان تنزل الشوارع وترجع الأمن تانى .. و فوق كل دة زادت مرتباتهم وقالوا هيثبتوا العاملين ومشوفناش حاجة .. ماشى هنديهم وقتهم ماهو مش بالساهل ,, أصل التدمير سهل جدا لكن البناء هو اللى صعب وادينا مستنيين ..
قالوا هيلغوا الحزب الوطنى .. لقينا أعضاءه عاملين زى الحشرة اللى اتقطع ديلها بس هى لسة عايشة وهتعمل ديل جديد .
قالوا هيلغوا أمن الدولة .. غيروا اسمها بس.
قالوا هيحاكموا النظام ورئيسه مشوفناش غير 15 يوم عمالة تتوزع عليهم على ذمة التحقيق .. وبعدين بدأوا يخلوا سبيل واحد واحد بشوية فلوس متساويش جزء صغير من المسروق والمنهوب من البلد دى .
قالوا مبارك لسة رئيس وتخلى فقط عن السلطة للجيش ولم يتنحى نهائيا .. قصدهم يعنى ان الجيش مستنى لما مبارك يشد حيله ويقوم ياخد السلطة تانى؟؟ دة لو كدة يبقا كلنا هناخدها جرى على أوروبا نطلب اللجوء السياسى ..
قالوا الجيش حامى الثورة .. معترضناش ,, بس اللى بيحصل دة معنها ايه؟؟؟ عايزة تفسير بس
قالوا هننزل التحرير .. قلت استنوا انا معاكوا ..
قالوا البلد خربت اشتغلوا احسن .. طب ما احنا بنشتغل وفى انتظار ناخد حقوقنا من الفاسدين .. مش شايفين نتيجة ..
دة حتى الناس زى ما هى والرشاوى زى ماهى ..
قولنا هنتغير .. لقينا الفاسدين زى ما هما
ليه التعمد بالبطئ فى محاكمة الفاسدين .. ليه مستنيين لشهر 9 علشان ننتخب رئيس مدنى جديد ,, ايه الحكمة يعنى؟؟
دلوقتى البلد بتقع لازم نلحقها .. طب ايه الصح ؟ نرجع التحرير ونستنى لما دة كله يتحقق بسرعة ؟ ولا نقعد فى بيوتنا واحنا حاسين انه بينضحك علينا ..
كأننا شوية عيال بتصرخ وهتكست بعد شوية ..
نزول التحرير مش صعب .. لكن المشكلة الكبيرة ان احنا كدة ممكن نكون بنقوم الجيش علينا .. بعد ما كان مفهمنا انه واقف معانا حتى لو مش دى الحقيقة .. نزول التحرير ممكن يستفز الجيش علينا ونعيد قصة ليبيا فى مصر
ربنا ياخد بإيدنا وإيد ابلد دى لأن الأمور اختلطت على بعضها ومبقيناش عارفين نميز الصح من الغلط

ولو الصح اننا ننزل التحرير يبقا لازم كلنا ننزل لان اللى هينزلوا دول بيعملوا كدة علشاننا وعلشان البلد مينفعش نقعد نتفرج عليهم .