الثلاثاء، 5 مايو 2009

أكيد أكيد انا اللى غلط .....

وانا رايحة الجامعة النهاردة الصبح مشى ( أصلها جنبنا مش بعيدة) لقيت مجموعة طلبة شكلهم صغيرين عبارة عن ولد و3 بنات ماشيين عمالين يهزروا بالأيادى مع ببعض ويضحكوا وكان فى ولد واقف بيوزع اعلانات عن مكتبة .. الاعلانات دى عبارة عن استيكرات من اللى بتلزق..
المهم ان المجموعة دى خدوا شوية استيكرات من دى كتير وعمالين يلعبوا بيها .. واتفاجئت ان الولد اللى معاهم بيروح هابد البنت من دول على ضهرها وفجأة تلاقى الاستيكر لازق على بلوزتها او طرحتها حسب ما إيده جت يعنى ..

مفيش خطوتين لقيت الولد دة بيجرى وراح لازق الاستيكر على ضهر واحدة واقفة شكلها كدة مستنية مواصلة لانها مخدتش بالها ان الولد خبطها على ضهرها اصلا..

انا طبعا كالعادة بتستفزنى المواقف دى .. روحت شايلة الاستيكر وقولتله : انت مش هتحترم نفسك بئا؟
وروحت مدياها الاستيكر وقولتلها كان حاطه على ضهرك
لقيت الولد بيقولى دى زميلتى
قولتله زميلتك تحط ايدك عليها كدة عادى .. عادى؟
قالى على فكرة انا خبطها بس
بصيتله من فوق لتحت ومشيت

البنت منطقتش كلمه واحدة من اول الموقف بس انا لاحظت ان انا لما اديتها الاستيكر خدته ولزقته للولد على ايده
يعنى فعلا كانت زميلته

بس ينفع؟؟؟؟؟؟؟؟
ينفع ان الولد يهزر مع البنت يحط ايده عليها؟
وعادى كدة؟

المهم وصلت لباب الجامعة لقيت بنت وولد تانين طبعا ماسكين فى ايد بعض وعمالين يفعصوا فى ايد بعض لدرجة ان الولد لما ساب ايديها علشان يعدل القميص شدت ايده ومسكتها ( تقريبا خايفة تعدى الطريق لوحدها)
كل دة والأمن واقف والرجالة والبنات رايحين جايين
يعنى مش طريق فاضى مثلا علشان نقول انهم مكسوفين من الناس
لا دة قدام كل الناس بجاحة مفيش بعد كدة
والأدهى من كدة ان البنت عاملة متدينة ولابسة اسدال

البنات ايه اللى جرالها معدتش بتتكسف ليه؟؟
والولاد معدش عندهم نخوة ليه؟؟؟
راح فين الحياء؟؟؟

يكونش الأكل اللى كله كيماويات أثر على الأخلاق؟
ولا يمكن عوادم السيارات ؟
ولا يمكن الكهربا الزيادة فى المخ نتيجة عن استخدام الموبايل والكمبيوتر ؟

ماهى كل الحاجات دى اكيد بتأثر بردو

ولا يمكن انا اللى متخلفة عن الركب
وانا اللى رجعية
وانا اللى اتربيت غلط

اكيد الشباب مبسوطين ومنشكحين ان البنات أزالت كل الحواجز اللى بينهم وسمحتله يحط ايده عليها
ويقعد يفعص فى ايد البنية ياعينى

لا حول ولا قوة الا بالله

هناك 54 تعليقًا:

Mysara يقول...

احم.. أكيد الشباب منشكح :))

طبعاً الكلام واضح وبنشوف أكتر من كده في الجامعة كمان، وكالعادة اليو تيوب مليان بلاوي!!!

في رأيي المشكلة في تلت حاجات، وهذه الثلاث الأشياء يمكن دمجها باختصار في نقطة واحدة وهى: أن ما يحدث لنا غزو ثقافي تربوي..

غزو يسيطر على عقولنا بدأ منذ أيام تحرير المراة وخلعها لحجابها ونغمة الفيمينست المعتادة، ثم تدرج الأمر كما شاء له الله إلى أن وصل إلى الحال الذي نحن عليه للأسف..

أعتقد أن المشكلة الأساسية تكمن في البنات - هذا ليس تحيزاً عنصرياً اكمني رجل - فقد حدث لعقولهن مسح غريب لكل القيم التي كنا نتغنى بها سابقاً.. إلا من رحم ربي بالطبع...

طبعاً الرجل عليه جزء من المسئولية لكني كما قالوا.. المال السايب يعلم السرقة.. وبالمثل.. لو ولد لقى البنت سايبة نفسها كده أكيد مش هيتأخر عن إشباع رغباته كلها.. وهو معذور وإن كان مخطئاً بكل تأكيد...

نحن في زمن اختلط فيه الحابل بالنابل، وأصبح الزواج شيئاً جديراً بالذكر في الأساطير.. لذا فالشاب معذور حين يرى ما يرى.. فيفعل ما يفعل.. لو وجد الفتاة تصده أو تنهره.. لما فعل هذا من جديد... وربما للأبد..

الأب والأم المسئولان رقم واحد عن كل هذا..

السينما أيضاً لها دور كبير في كل ذلك الفساد..

خلاصة القول.. نحتاج إلى أمهات على تربية فاضلة.. يربين لنا بناتنا كما تربين.. هذا وحده قد يصلح مجتمعنا من جديد...

أسف للإطالة..

تحياتي...

بلاش فضايح يقول...

ههههههههههههههههههههههههههههههه

بس كلامك كله صح والله
فعلا لو فى بنات ترفض مش هيبئا فى ولد يعمل كدة

بس الظاهر ان الأحوال بتزيد سوء والظاهر كمان ان مفيش حل ومش هيحصل تغيير
والظاهر اوى بئا ان احنا لازم عنينا تاخد على كدة من غير نرفزة ولا زعل
عااااااااااادى

شكرا ليك

بسنت صلاح الدين يقول...

انتى لسه واخده بالك؟ طيب ده كله بره الجامعه انا عايزاكى تشوفى اللى بيحصل جوه و قال ايه اسمه الحرم الجامعى،يعنى حاجه ليها احترامها، الولاد بيلعبوا المنديل ولاد على بنات و هيصه ،و كانه فرح ابن العمده،و لا عيد الحب،بتتقلب الجامعه بقدره قادر للجنينه اللى البوكس مبيدخلش فيها بوشه ولا بضهره ،الشباب صح منشكحين بس البنات عيب يعنى،هو الحياء بقى قليل فى السوق ولا ايه؟، ياريت كل واحده تعرف ان الشباب مش هايقولوا عليها لذيذه و دمها خفيف بالعكس هايقولوا مش محترمه لأنه عمره مايقبل اخته تعمل كده

بلاش فضايح يقول...

عندك حق يا بسنت انا فعلا لسة واخدة بالى
انا حاسة انى مش عايشة فى الدنيا

اذا كان جوه حرم الجامعة كدة ومفيش خشى يبئا اللى بردة دة عاااااااااااادى

شكرا ليكى

Unknown يقول...

هو حضرتك ياريت الموضوع
سورى تفعيص فى الإيدين
انا اسف اصلاً لفظة تفعيص ديه مش بتتقال على الإيدين أصلاً

الموضوع بقى قلة حيا بنات و ولاد

انا مثلاً خريج كلية الأداب اللى اسف بيقولوا عليها كلية الكعب العالى !
بس مش قادر اقولك البنات بقى لبسهم غاية فى قلة الحيا و قلة الخشا و قلة

ده غير بقى الجنينة و بنحب بعض يا مرسى
و ديه زى اختى و لما اخلص كلية حبقى اتقدم لباباها
و طبعاً حرس الكلية مفنجل عينه على المظاهرات و التيار الإسلامى و بس
و اى حد حيبقى ليه فى السياسة
خللى الشباب يضيع يشرب مخدرات شيشة سجاير
يحب على نفسه مش مهم
لكن سياسة لا يا حبيبى حتعمللى فيها زعيم سياسى لأ و الف لأ
و بعدين يا حبيبى السياسة للعواجيز
لكن تعمل فيها الواد الحبيب و تضحك على بنات الناس ايوا هو ده الكلام
عيش سنك يا شاب
كدة تبقى حبيبى اوووى
!!!
انا مرة روحت الجامعةعندنا بعمل تغطية لإمتحانات كادر المعلمين بس طبعاً كشخص هاوى يعنى لا معايا كارنيه صحافة و لا اى اثبات
المهم امن الجامعة كلمنى و قاللى بلاش اللبش ده
روح غطى حفلة لإليسا و لا هيفاء فى مارينا
حتتبسط
!!!
---
على فكرة تدوينتك السابقة مرتبطة بهذه التدوينة

هانى زينهم يقول...

التدوينة دى كان هتبقى قنبلة سنة 30 انما النهاردة الامور دى بتحصل فى كل حتة . فى الجامعة والنوادى والمدارس والحجج مختلفة . مرة اختى مرة بنحب بعض مرة ده خطيبى مرة جوز عمتى كدة يعنى !!
الاصل فى الموضوع البيت وانعدام الخوف من الاهل وتكبير دماغ الاهل ورا اكل العيش . لو البنت خايفة من اهلها ما تجرؤش تفكر حتى فى حاجة زى كدة . ربنا يستر .

بلاش فضايح يقول...

بدراوى
معلش اصل انا معرفش غير تفعيص الايدين
استحملنى اصل انا بحس ساعات ان انا جاية من عالم اخر بجد

بس عندك حق والله الحرس ولا بيهمه غير السياسة والمظاهرات

مرة ايام ماكنت لسة طالبة بنت اتعاكست قدام البوابة راحت للأمن قالها وانا مالى انا مليش دعوة بالحاجات دى


كادر المعلمين هو كمان بئا من ضمن السياسة
هههههههههههههههههههههههههههههههه

بس التدوينة اللى فاتت انهى فيهم ؟؟

شكرا ليك

بلاش فضايح يقول...

أستاذ هانى
ههههههههههههههههههههههههههههههه
هههههههههههههههههههههههههههههههههه
هههههههههههههههههههههههههههههههههههه
ههههههههههههههههههههههههههههههههههههه

والله ماعارفة اقول ايه
دايما كدة رافع من معنوياتى ومحسسنى انى مختلفة عن البشر وبتفاجئ بحاجات غريبة

طيب ساعدنى بكلمتين دة انا لسة جديدة يعنى
هههههههههههههههههههههههههههههههههه

Unknown يقول...

اقصد التدوينة اللى اسمها
لما يبقى حراميها مولع فيها
---
بخصوص التدوينة ديه و كلام أستاذ هانى
عن الثلاثينيات
افتكرت الكاريكاتير ده
مناسب جداً للتدوينة
انا مقصدش طبعاً كلام حضرتك
انا اقصد الفكرة نفسها

http://drsherif.net/
index_art.php?viewkar=1&other=1&
comtype=2&otherid=121&image=
upload/683.jpg

ادم المصرى يقول...

اولا السلام عليكم

ثانيا الى انتى شفتيه ده ميجيش حاجه جمب الاشياء الغريبه الى بنشفها فى النوادى او فى الاماكن الى بتكون مغلقه شويه

انا ساكن فى المهندسين ميدان لبنان
عندنا البنات والشباب حسب المكان معندهمش اى عادات ممكن البنت تخس مؤمن او كنتاكى هيا وشب صديق مثلا جول فرند يجيبو ساندوتش ويعدو على السياره ويكلو ويهظرو تعد على حجرو يبسها مثلا فرى عادى دا شيئ فى النوادى بقه مثلا انا شغال فى نادى الزمالك هناك بقه كلو مباح دا شيئ

مثلا خرجت فى يوم كان واحشنى حديقه الحيوان كان نفسى اشوف الى فيها رحت ويارتنى مرحت على الى شفتو هناك بنات من ثانويه واعداديه وأبتدائيه كل واحد سحبا فى اديها خروف ومشيا عمال يحط ايدو عليها ويبسها عادى ولا فيه حياء لأى انسان فيهم اكنهم حيونات واحد مثلا قاعد على دكه او مش عارف بيسموها ايه وماسك واحد والكارثه تكون منقبه وحضنها وحجات كدا واشوف واحده اد مش قادر اقولك قد جدتى واعدين بيحبو فى بعض وكل شيئ بطريقه زباله واخر وساخه

معلش يا اختاه احنا بقينا فى زمن زهب فيه الحياء

وقال رسول الله صلى الله عليه وسلم

لا تقوم الساعه حتى يكون اشرف الناس من يلاقى رجل وأمره يزنون فى الطريق ويقول لهم لو فعلتم هذا خلف هذا يكون افضل وهذا يكون اشرفهم

صدق رصول الله صلى الله عليه وسلم

وانا اظن اختاه انا هذا الزمن قد أتى او فى طريقه ألينا

ويا ويلنا

وقال رسول الله صلى الله عليه وسلم سيأتى زمن على امتى من امسك على دينه فيه كمن يمسك على جمر من نار

صدق رسول الله صلى الله عليه وسلم

اللهما ارفع مقتك وغضك عنا وغفرنا وارحمنا
واهدى بناتنا وشبابنا

قلب ارهقته الاحلام يقول...

مقدرش اقول غير اني بقت مصيبه من مصايب العصر ال احنا عايشين فيه

بقت موجودة ف كل حته وف كل مكان وداخل حرم الجامعه

كل حاجه بقت مباحه عادي انا كنت ماشية طالعه من الجامعه مرة

وبيوزعوا اعلانات كده انا أخدتها ومشيت لقيت مجموعة ولاد

جايين عليه وانا مش فاهمه فيه ايه لقيت واحد مسك ايدي بالاعلان

حتي المعاكسات بقت بمد الايدين وبمنتهي السفاله ربنا يرفع غضبه ومقته عنا يارب

موضوع مهم والمفروض نكلم فيه اكتر من كده

تحياتي ليكي ياقمرر

mahasen saber يقول...

نونا متسيبى الناس فى حالها خليهم يطلعوا الكبت
طبعا بهزر بس هزار رخم شويه

شوفى يا نونا العيب مش على الناس اليى فى الشارع ولاا امن الجامعه لانهم متبعيين مبدأ حقوق الانسان والحبيبه ومبدأ انا لا ارى ولاا اسمع ولاا واخد بالى طالما حاجه متجيش على جيبى

انما العيب والعبره واليى عايزين الضرب على ايديهم وتفعيصها بس بالعصايه هما الولد والبنت والاسره اليى شغاله طناش ولاا مبالاه واهتمام باولادها

وبس با بنتى استرى عليهم ربنا ستار حليم

mahasen saber يقول...

نونا متسيبى الناس فى حالها خليهم يطلعوا الكبت
طبعا بهزر بس هزار رخم شويه

شوفى يا نونا العيب مش على الناس اليى فى الشارع ولاا امن الجامعه لانهم متبعيين مبدأ حقوق الانسان والحبيبه ومبدأ انا لا ارى ولاا اسمع ولاا واخد بالى طالما حاجه متجيش على جيبى

انما العيب والعبره واليى عايزين الضرب على ايديهم وتفعيصها بس بالعصايه هما الولد والبنت والاسره اليى شغاله طناش ولاا مبالاه واهتمام باولادها

وبس با بنتى استرى عليهم ربنا ستار حليم

mahasen saber يقول...

امال بئه يا نونا لو توغلتى فى الجامعه ورحتى الكافتريات

اللهم دمها نعمه على كل طالب وطالبه

اسكتى يا نونا اسكتى بدل ما اسكتك انا

جهزى الغدا احتمال كبير اتغدا معاكى بعد بكرا او بعد بعد بعد بكرا جهزيه بس وانا هحدد اليوم هههههههههه

عمرو يقول...

أنا كمان بألاحظ مدى الاٍستهتار و اللامبالاه اللى أصابت الشباب و البنات فى هذا السن الصغير !!
أزعم أننا على بداية كارثه ستأتى على الأخضر و اليابس بسبب سكوتنا على الغلط و سياسة الاٍستهبال و الاٍستسهال اللى أصابت المجتمع ..
بس أسمحى لى أحييكى على موقفك ..

مامة مازن يقول...

اختى نونا قال رسول الله صلى الله عليه وسلم(الحياء شعبه من شعب الايمان)
لم يقل للرجل او للمراة لم يخصص
بل هى صفة محمودة للمسلم رجل كان او امراة
وما تحكينه كنت اراه وانا فى الجامعة سنة2000 بس الموضوع استفحل دلوقتى
طبعا واللا اللبس بتاعهم فظيع مش عارفة بتعدى قدام ابوها وامها واخوها مثلا كده ازاى
على العموم ربنا يستر ونعدى من الدنيا على خير يارب
تحياتى واحترامى لكى اختى وعلى فكره عنوان الموضوع بتقوله زيك بنات وستات كتيييييييييير قوى

simply me يقول...

اول زياره وشكلها كده مش الاخيره
عجبتنى مدونتك يا نونا
وخصوصا انها بلاش فضايح خالص مالص

انا شايفه ان البنات هما المسؤلين عن الانحلال اللى الشباب فيه ده
لانهم سابوهم يعملوا كده وبقى عادى جدا
وطبعا الشباب ماصدق

Soma يقول...

هو لسه في حد بالبراءه دي؟!!!!!
كلنا بنشوف يا بوسي بس من كتر ما بنشوف خلااااااص بقي عاددددددددي,
احنا في زمن اللي تقبض فيه علي دينها كالقابضه علي الجمر, البنات بقو كده عشان مفيش اهل بيعلمو الصح والغلط, والاهل مش بيعلمو عشان اساسا ميعرفوش


انتي مش غلط, سيبك من الناس البيئه دي انتي بتحافظي علي نفسك عشان نفسك غاليه مش لاي حد وخلاص,
ولو عايزه تعملي حاجه خلي نفسك قدوه حسنه.

تحياتي

غير معرف يقول...

منشكح ليه

واضح انك مشعارفه ان الشباب بيعاني مشاق بنت محترمة يرتبط بيها بسبب الموبايل وزمايلها في الجامعة وقرايبها في البيت اختلاط ادي لهذ الانحلال فعادي يعني

وبعدين الكورنيش ماليان والشوارع مليانة اما الشقق المفروشة حدث ولا حر

الشباب منشكح ليه

مافييش حد عاقل بيشتري حاجة رخيصة

والرخيص بيبقي يادوب علي قد سعره

فهمان طبعا

Unknown يقول...

لأ انت مش غلط لكن واه من لكن دى
موضة قديمة راحت عليها اتربيتى
على عبد الحليم فاتن حمامة
والرقة والعذوبة بتاعتهم
مش على الاغانى الصارخة
والمناظر اللى ما تسر
النفس:)
انت مش غلط
انتى صح وصح الصح كمان
لكن موديل قديم ما يمشيش الايام دى:(

رؤية يقول...

طبعا لما الواحد بيشوف منظر زى دا بيصاب بالاشئزاز وللاسف مطرين نشوف الاشكال دى فى الشارع يوميا
الفكرة فى انه الى اين ذهبت القيم والاخلاقبات
المفروض اللى بيعمل حاجة غلط ينكسف ويخجل
لكن من الواضح ان الموازين اتقلبت
بنا يرحمنا


تحياتى

بلاش فضايح يقول...

بدراوى
جميل اوى اوى الكاريكاتير دة
شكرا ليك
فهمتك
ههههههههههههههههههههههههههههههههههه
ههههههههههههههههههههههههههههههههه

بلاش فضايح يقول...

آدم المصرى

لا حول ولا قوة الا بالله
دة على كدة قصتى دى احسن شوية من اللى بيحصل
الدنيا مبقاش يتعاش فيها
الناس بقت تصرفاتها تخوف
بتحسس الواحد ان القيامة قربت

ربنا يسترها علينا

شكرا ليك

بلاش فضايح يقول...

قلب أرهقته الأحلام

على أيامى فى الجامعة مكنش بنت وولد يجرأوا يعملوا كدة مع بعض
دة حتى واحدة قريبتى حكتلى على دكتور شاف بنت وولد قاعدين بطريقة مش كويسة زعقلهم وخد أساميهم وسقطهم

أعتقد دلوقت لو حد شاف منظر زى كدة هيبتسم ويمشى

شكرا ليكى

بلاش فضايح يقول...

محاسن محاسن محاسن
ساعات كتير ببئا مش عايزة ارد عليكى
مش علشان حاجة ابدا والله دة لآنى بحس ان البيت بيتك يعنى ومش حتاجة يعنى انى اكتبلك رد وأوجع ايدى هههههههههههههههههه

انا بئا مش هطبخ الا لما تحددى ياختى
اصل احنا غير كدة مبنطبخش ههههههههههههههههههههههههههههههههههههههههههههههههههههه

بلاش فضايح يقول...

محاسن

عندك حق العيب على كل الأطراف
طيب والحل
هنفضل كدة؟
الناس حالها بيسوء

شكرايا قمر

بلاش فضايح يقول...

أستاذ عمرو
أولا حمدالله على سلامة حضرتك ورحلة سعيدة موفقة بإذن الله

صحيح الأولاد دول فى سن صغير ويطلع منهم كدة امال الكبار هيعملوا ايه؟

دة ابن خالى فى اعدادى جاى من السعودية خام ياعينى ولما جه مصر بيقوللى كل اصحابى هنا ليهم صاحبات بنات وانا عايز ابئا زيهم

افهم فيه ان دة غلط مش عايز يفهم ازاى اصحابه عندهم وهو معندوش كأنها لعبة ولا عجلة

شكرا لمرورك جدا

بلاش فضايح يقول...

مامة مازن
بتوحشينى
أخبارك ايه
نفسى اخد ايميلك

ربنا كرم الحياء اوى وجعله شعبة من الايمان علشان صعب الوصول اليه الأيام دى

ربنا يهدى الجميع ويسترها معانا

شكرا ليكى

بلاش فضايح يقول...

bondoka
نورتى المدونة يا قمر

احنا عندنا هنا مفيش اى فضايح
دة حتى ربنا أمر بالستر
ولا انتى فيكى مش مين يكتم السر؟؟؟

انا شايفة كدة بردو
ان البنات عليها عامل أكبر
من طريقة لبسهم والدهانات اللى بيلغمطوا بيها وشهم
وساعات البنت هاى اللى بتجتذب الولد


شكرا ليك

بلاش فضايح يقول...

soma

انا بدأت اشك فى نفسى والله
بدأت احس ان انا اللى مش طبيعية ولازم اتروشن شوية عن كدة

بس الروشنة مش هتناسبنى
اعمل ايه اطق ولا اكتئب
اه يانى

شكرا ليكى يا قمر

بلاش فضايح يقول...

a few good men

اكيد منشكح طبعا
اصل علشان يصاحب بنت ويهزر معاها بالايد حاجة
وانه يتجوز ويدور على بنت محدش هزر معاها ولم تمسسها يد دى حاجة تانية

شكرا لمرورك

بلاش فضايح يقول...

norahaty
انا فعلا موضة قديمة
تصدقى انا من زمان وانا محتارة
انا ايه انا ايه؟؟؟؟

فعلا احنا اتربينا ايا الاحترام والرومانسية
دى نعمة والله

شكرا ليكى يا سكر

بلاش فضايح يقول...

رؤية

دة المناظر دى منها كتير
بس فعلا هو دة اللى بسأل عليه
راحت فين الاخلاق راح فين الحياء

شكرا ليكى يا قمر

Ahmed يقول...

nona
عاااااااااااااادي
انا ساكن جنب جامعة القاهره
ويوميا بشوف المناظر ديه
واقول يمكن مخطوبين ولا حاجه
بس حتى المخطوبين مبيعملوش كده
بعيد عنك ديه أشكال ضاله
والمصيبه بأه تلاقي الواحده من دول ولا الواحد يبصلك ببجاحه وانتي اللي تبقي مكسوفه مش هوا ولا هيا

طب فين الأهل؟ فين الأب؟ فين الأم؟ معلش أصل الصنف ده ناقص في اسوق

الأب متفتح وعادي, لكن لما الولد يقول انا عايز الحلال يمسكه الأب ويقوله البيت والفلوس والأهل واللي واللي واللي
لكن في مسألة الصداقه ده شئ ايزي موزو

والام فرحانه بالواد اللي مدوخ قلوب العذارى والبت اللي رمشها يدبح ولاد الشارع

عاااااااااااااادي
بقولك ايه
انا ضغطي علي

بلاش فضايح يقول...

أحمد

انت ضغطك علي دلوقت
انا ضغطى عالى من ساعة ماعملت المدونة دى
من ساعة مابدأت اكتب عن المواضيع اللى بتلفت نظرى وبتنرفزنى انا شخصيا

وعلى رأيك عادى عادى

شكرا لمرورك

mimi يقول...

دول عيال أصلا لبط
وكل تفكيرهم عبط

والأكيدأنتي ... مش غلط

yoyo يقول...

ياخبر يا دكتورة
هو انتى مش كنتى واخدة بالك من كدا در والله فى اكتر من كدا
دا بس كان مجرد تسخين فى الاول كدا يعنى
الموضوع دا بقى عادى كدا خالص ولا كان فى حاجة اسمها عيب و حياء
مش عارفة الناس دى مش بتتكسف
و البنت مش بتعمل اى اعتبار للاخلاق ولا لدين ولا اى حد خالص
اهوا احنا اصحاب و اخوات مش فى حاجة يعنى
و الله الجامعة فيها العجب واعتقد انه مش بقت الجامعات بس حتى المدارس تقريبا كل مكان
ربنا يتولانا برحمته ويستر علينا بقى

تحياتى
يويو

فكرة من الزمن ده يقول...

يابنتي هدي اعصابك مش كده مش السيد الاستاذ ريكو قالك خلي الشعب يعيش
طيب لازم يعيش
( تقريبا خايفة تعدى ا
لطريق لوحدها)
فكرتيني بفؤاد المهندس كنتي خليه يمسكها يافوزية يمكن كانت تطرى في ايده
وهي قالت له قال ايه بيعدييييييييييييني
والله انا معاكي ان الحاجات دي اكيد من تاثير التكنولوجيا على عقول الناس
لكن مش تاثير عضوي ده تاثير فكري
تقبلي مروري وتحياتي ومساندتك في الراي

بلاش فضايح يقول...

mimi
انتى تقربى لسيد ابو حفيظة؟؟

نورتى يا قمر

بلاش فضايح يقول...

yoyo
انا تقريبا مش عايشة فى الدنيا
ربنا يسترها معانا

شكرا ليكى

بلاش فضايح يقول...

فكرة من الزمن دة

خلى الشعب يعيش

شكرا ليكى يا سكر

شمس النهار يقول...

انت مستغربه؟
ده انا بشوف بنات بتعاكس الاولاد عيني عينك كده
حياء ايه ماخلاص دي البنت المؤدبه بقت سلعه نادره

بلاش فضايح يقول...

شمس النهار
كمان
البنت هى اللى بتعاكس الولد
لا حول ولا قوة الا بالله

شكرا ليكى

Unknown يقول...

ازيك يا دكتورة
مالك استغربتى انى مررتلك التاج ليه
اصل انا حبيت امرره لناس مختلفة
دورت و قولت اشوف ناس لسة معملتش تاج
و كمان ناس تدويناتها جميلة فإخترتك منهم

و بعدين انا واخذ على خاطرى منك
عشان معلقتيش على التدوينة اللى اسمها الثقافة المصرية المايعة
الفكرة مش اى تدوينة و خلاص
انا عارف ان حضرتك مشغولة و مش حتقدرى تعلقى بإستمرار اى تدوينة
بس التدوينة ديه كان يهمنى رأيك فيها
و تدوينات أخرى طبعاً حبقى اكتبها فى نفس الموضوع ده
يمكن تدوينات تانية بتبقى شىء ظريف او فيها نوع من السخرية
لكن التدوينة ديه كات بتناقش قضية
اتمنى حضرتك تنورينى بتعليقك فيها
---
مع كل تحياتى

صوت من مصر يقول...

اسمحيلى والله عندى فى المعهد انا برفض انى اهزر بالايد مع البنت لدرجه ان الناس بتاخد منى موقف تخيلى بقى انتى

بلاش فضايح يقول...

بدراوى
انا ارتبكت بس
اصل مش متعودة الاقى اسم مدونتى فى حتة
بس انت ليك جزيل الشكر طبعا

بالنسبة لتدويناتك انا اسفة بجد واسفة للكل انا مقصرة مع الكل مش معاك لوحدك

اصل انا ساعات بكون مخنوقة مش قادرة حتى ارد على التعليقات اللى على مدونتى

شكرا ليك جدا

بلاش فضايح يقول...

صوت من مصر
بتاخدمنك موقف؟؟؟؟؟؟؟؟؟؟
طالما انت صح خليك فى طريقك الى الله
واللى ياخد منك موقف ياخد انت فى الآخر عند ربنا أحسن منهم

شكرا ليك

Bola 7elmi يقول...

لقيت بنت وولد تانين طبعا ماسكين فى ايد بعض وعمالين يفعصوا فى ايد بعض لدرجة ان الولد لما ساب ايديها علشان يعدل القميص شدت ايده ومسكتها


تقدري تقولي عادي جدا جدا جدا
لما تكوني واقفه ف الجامعه .. وتلاقي بنت وولد واقفين تحت سجرة حبهم << يتهم نيله يعني
وفجأه هُب .. تلاقي البت نطط أعدة فوق سور عالي ورا الشجره ..
طبعا مش هيا اللي قفزت D:
دا السوبر راجل اللي معاها حملها ف غمضة عين أعّدها
يا حرام البنيه مش قادره تقف
نعذرها طبعا .. ولا ايه ؟!
يعني يفعص ايدها .. يحملها.. يلزقها ف الحيطه والناقص يغتصبها << والله كان لازقها ف الحيطه .. يعني هما الحماس بيبقى واخدهم اووووي بيني وبينك
ومبيخدوووش بالهم من اللي بيعملوه


وربنا يستر على عباده



دي أول مرا أجي بلوجك .. بس عجبني أوووي إسمو ,,
و بجد بلااااااااااااااااش فضايح


وسلامي ليكي

mahasen saber يقول...

يعنى افهم من كده انك هتجوعينى انا والواد ابنى ههههههههههههه
يا ناس ياليى مبتطبخوش ههههههههههه

hanielvis يقول...

يااااااااااااااااااااااااااااااااااااااااااااااااااااااااااااااااااااااااااه الحمد لله ان لسا في بنات كده الحمد لله طمنتيني اني ممكن الاي بنات كويسا واني ممكن اتجوز انا ارات بعد كتباتك و ارات منها شخصيتك و كمان اجباتك علي الاسئله انت شبهى اوى في حجات كتيره عمتن انت دمك خفيف و بنت ذي العسل

بلاش فضايح يقول...

bola
صح عاااااااااااادى
اه هما معذورين
دة احنا اللى مش طبيعين على فكرة هههههههههههههههههههههههههههههههههههههه

نورتى يا سكر بجد

بلاش فضايح يقول...

محاسن
من الآخر كدة
وانتى جاية هاتى معاكى غدا للكل
ههههههههههههههههههههههههههههههههههه

بلاش فضايح يقول...

hanielvis

البنات الكويسين كتير والحمد لله
شكرا ليك

Me7'o يقول...

""اكيد الشباب مبسوطين ومنشكحين ان البنات أزالت كل الحواجز اللى بينهم وسمحتله يحط ايده عليها
ويقعد يفعص فى ايد البنية ياعينى""

أوبجيكشن يا فندم
البنات هما اللى فرحانين إن الولاد رضيوا إن البنات تمسك إيديهم وهما اللى بيجروا الولاد على الإنحراف
والدليل

بصى كام ولد بيلبس بدى علشان يببن عضلاته والبنات تعجب بيه قصاد كام بنت بتلبس محزق وقصير علشان أبوها وأخوها اللى منزلنها من البيت يتبسطوا
طب والله أعرف راجل بيت أول ما يشوف بنته لابسة كده يروح مطبطب عليها وبايسها قبل ما تنزل

زى ما يكون بيسخنها قبل ما تدور
ههههههههههه

تحياتى