الجمعة، 1 مايو، 2009

تحديث..... .. لما يبئا حاميها مولع فيها

ضع علامة √ فى المربع 

الامتحانات على الأبواب أهيه من يوم الأحد هنبدأ امتحانات التخلفات وبعدها عدل امتحانات آخر السنة ويمكن لفترة طويلة مقدرش ادخل المدونة دعواتكوا بس ربنا يعدى الأيام دى على خير أحسن بتبئا أيام ميعلم بيها الا ربنا
ونتقابل على خير

---------------------------------------------------------------------


مش قادرة افهم يا حضرات ازاى المسئولين يسمحوا بكدة

لما تكون مديرة مدينة كلية بنات ماتنفعش تاخد المنصب دة ...


تاخده لييييه؟؟؟

بنات المدينة اشتكوا كذا مرة من المديرة اللى بتقوم بعمل أشياء غير مشروعة مع بنات


المدينة والشكوى كانت بتمر مرور الكرام على المسئولين عن المدينة والكلية التابعة ليها


والجامعة على بعضهاممكن نقول ان المسئولين مش عارفين ياخدوا ضدها قرار لعدم وجود


الشهود بشكل رسمى لأن المديرة بتهدد البنات والموظفين ان اللى هينطق هتطلع عليه ان هو


اللى كدة مش هى ...دة حرام ولا حلال

ولما بعض الموظفات شافوها كذا مرة فى وضع مخل مع بعض البنات الملازمين ليها بشكل


مستمر انقسموا لقسمين بعضهم اعتبر كأن شيئا لم يكن وقالوا ( وانا مالى) والبعض الآخر


ضغطت عليهم لغاية لما سابوا الشغل وقعدوا فى بيوتهم

بلاش الموظفات اللى اتظلمت وبلاش البنات اللى خايفه على مستقبلها ولا خايفة تتشرد بعد


متزنق عليها وتطلع من المدينة

المسئولين ساكتين ليه مع ان ريحتها فاحت وفاحت

لما يكون البنات خايفين يشهدوا عليها لتتبلى عليهم وتسوأ سمعهتم

فين الأمان هنا

دول بنات يا عالم

كل اللى له بنات يتقى ربنا ولما يشوف وضع زى دة ينطق

حسبى الله ونعم الوكيل....

هناك 41 تعليقًا:

بدراوى يقول...

ازاى الكلام ده
احنا وصلنا لكدة
و فين بقى المسئولين
اللى بيقتحموا بقوات الأمن المدينة عشان يقفشوا عيل اخوانى مع اختلافى مع الأخوان

و يأخذوه و هو نايم فى سريره
فين الأمن و الإحترام
!!!

nona يقول...

بدراوى

مفيش أمان ومفيش أمن ومفيش احترام
الدنيا خلاص بقت تخوف


شكرا ليك

Soul.o0o.Whisper يقول...

بصى لما كل واحدة خايفة على نفسها
أكيد هتقعد ساكتة

انما لما تبئا الشكوى جماعية فى نفس الوقت


مش معقول هيقولوا كلهم وحشين و هى اللى حلوة


ماهو أكيد لما الظلم يحس بجبروتة و سطوته
هيتفرعن فيها


ياريت بجد الكل يقف لها وقفة واحدة
و كمان يصروا فى شكوتهم

و ربنا مش هيسيب ظالم يستبد بظلمه
بس إحنا ناخد بالاسباب



دمتى بود

Sweet Violet يقول...

ماهى دى مشكلتنا ان كل واحد بيبقى خايف ينطق علشان المظلوم فى البلد دى بيبقى ظالم

لكن لو اتمحى الخوف منا و بقينا ايد واحده هنعرف نتغلب على الظلم ده

و زى ما سووول قالت لو الشكوى بقت جماعية هتقف هى عند حدها و هيتم التصرف

----
ربنا معاك فى الامتحانات و ترجعى بالف سلامه

Tamer Nabil يقول...

السلام عليكم

فين المسئولين

اية الظلم والافترى دة

حسبى الله ونعم الوكيل

تحياتى

مامة مازن يقول...

نونا كيف حالك
ان شاء الله فترة الامتحانات الصعبة دى تعدى على خير
ولن اضيف شيئا جديدا على تعليقى فى البوست قبل تحديثه
وحسبنا الله ونعم الوكيل

رؤية يقول...

للاسف النماذج القذرة دى - وعذرا للفظ - بقيت مالية الدنيا وهم دول اللى بيعملوا اللى هم عاوزينوا واصحاب الحق للاسف بيخافوا

_________

ربنا معاكى فى ازمة الامتحانات
تحياتى

هانى زينهم يقول...

فى كل البنات دول ما فيش واحدة قالت لمامتها ومامتها بلغت حد فى المخروبة اللى احنا فيها دى ؟! ولا اب حمش راح مسك الولية دى من شعرها عمل فيها زى ما بتعمل فى بنات الناس ؟! تصدقى الواحد دمه غلى . ايه البلد دى ؟؟ هو احنا فى مصر ؟!

nona يقول...

Soul.o0o.Whisper

انا نفسى يعملوا زى مبتقولى كدة بس معرفش هى مهدداهم بإيه علشان يوصل بيهم الحال للسكوت دة
انا سمعت ان هى مخوفاهم

ربنا ينتقم منها ومن أمثالها ومن اللى ساكتين عليها

nona يقول...

Sweet Violet
الله يسلمك يا سكر

انتى صح الظالم بيتحول بقدرة قادر لمظلوم ومدان
علشان كدة الكل بيخاف

nona يقول...

تامر
انا نفسى بسأل فين المسؤلين
فييييييييييييييييين

اذا كنت انا ياللى سمعت بس دمى فار امال اللى شافوا ومتأكدين فين من دة كله

nona يقول...

مامة مازن
شكرا ليكى يا قمر وربنا يخليكى ليا

الواحد اصلا مبقاش لاقى حاجة يقولها
تسلمى يارب

nona يقول...

رؤية
فعلا الدنيا اتملت من النوعية دى وربنا يسترها علينا

وشكرا ليكى ياقمر دعواتك

nona يقول...

أستاذ هانى
المشكلة ان الكل عارف والكل بيتكلم فى الموضوع والدنيا كلها عارفة بس الشهود خايفين يبلغوا فيها ليه معرفش؟؟؟؟؟؟؟

والمسئولين ساكتين ليه بردو معرفش؟؟؟؟؟؟؟؟؟؟

nona يقول...

وبعدين يا جماعة
ما هى لو مشيت من مدينة البنات دى هتروح مدينة بنات تانية
مهو الوضع ماشى كدة
لما يكون فى ادارى مش كويس مع الموظفين يودوه ادارى يقرف موظفين تانيين
ولما يكون دكتور مش محترم مع البنات بيمشوه يودوه كلية بنات بردو بس تانية يعنى

وهكذا الى ان تقوم القيامة ونخلص بئا

صوت من مصر يقول...

حسبى الله ونعم الوكيل

بسنت صلاح الدين يقول...

الحقيقه حاجه مقلقه لما تبقى مربيه اجيال و اللى بتحافظ عليهم فى الغربه و اهلهم نايمين مطمنين فى بيوتهم ان بناتهم فى امان تبقى بالشكل ده،يعنى معقول وصلت لكده،الحقيقهعن تجربه المدن الجامعيه فيها حاجات كتير سلبيه بس كان اهم عنصر فيها، يعنى وضع محتاج وقفه البنات دول امانه ، و ياريت يحاولوا مع رئيس الجامعه بالخصوص ده، مدونتك رائعه وربنا معاكى فى الامتحانات وان شاء الله متابعاكى

nona يقول...

صوت من مصر
شكرا لمرورك
وحسبى الله ونعم الوكيل

nona يقول...

بسنت
أنا عن نفسى أول مرة اسمع عن مشاكل المدن الجامعية
بس ان شاء الله ليها يوم تنكشف فيه وهيكون على ايدى بإذن الله

انتى الأجمل يا قمر
انا زورت مدونتك وضفتها عندى جميلة ودمها خفيف

شكرا ليكى

nona يقول...

بسنت
أنا عن نفسى أول مرة اسمع عن مشاكل المدن الجامعية
بس ان شاء الله ليها يوم تنكشف فيه وهيكون على ايدى بإذن الله

انتى الأجمل يا قمر
انا زورت مدونتك وضفتها عندى جميلة ودمها خفيف

شكرا ليكى

شمس النهار يقول...

يانهار مالوش لون
يعني حاميها حراميها
السلبيه والامبالاه وصلت للمصريين لكده
خلاص مبقاش في خوف من ربنا
حتي قولت الحق اللي هنتحاسب عليها راحت
الساكت عن الحق شيطان اخرس

hamada يقول...

جروب جريدة الصباح العربي بيت المدّونين العربي
http://www.facebook.com/home.php#/group.php?gid=78080770039

nona يقول...

شمس النهار

واضح ان القيامة قربت
الناس احوالها اتغيرت والقيم عندها اختلفت الصح بئا غلط والغلط بئا صح

ربنا يسترها علينا وميجعلناش منهم

شكرا ليكى

الجواز و سنينه يقول...

فعلا بلاش فضايح
كده بجد كتير
مدونه جميله زيك و اكي هاجيها كتير

mahasen saber يقول...

فالحه يا نونتى وقابلينى لو حاجه اتغيرت

لان الطالباتجبناء وخوفات زلو واحده اتكلمت الباقى هيخرسها بجبنه
ولان رب البيت عارف وساكت فمتتوقعيش تغيير كبير يعنى ولاا من اساسه اصلا

mahasen saber يقول...

بس ايه النشاط الكبير ده شغاله بوستات ولاا بتبلغينى شكلك هتتمردى عليا
انسى براحتك جمايلى البلوجريه عليكى وانا هنسا جمايلك الفيسبوكيه عليا ونبقى خالصين
وسمعينى احلى سلام فى البلوجر بحاله لبلاش فضايح
وافرحى با دعاء ههههههههههههههههه

Mysara يقول...

مبدئياً ربنا يوفقك - ويوفقنا جميعاً- في الامتحانات..

بالنسبة لحكاية المدينة الجامعية فده مش موضوع جديد الموضوع متفشي بشكل ملفت للنظر وفي مدن الشباب أيضاً وهناك مئات الفيديوهات على اليو تيوب!!

كما قال الأصدقاء.. لن يُدحر الظلم إلا بتوحدنا وهذا - في رأيي - مستحيل تحقيقه في الوقت الحالي..

فنحن اعتدنا أن ننتظر البطل الخارق الذي سيأتي ليحل لنا مشاكلنا، دائماً نفضل أن يكون لنا قائداً نتبعه بعيداً عن معرفتنا بهذا القائد...

أي قائد والسلام!!!

تحياتي وربنا يبعد عننا الفضايح :)

blue-wave يقول...

يا نهار اسود ومنقط باسود
احنا وصلنا لكدا؟؟؟
بجد ربنا يلطف بينا

بـسـمـــة صـــــلاح يقول...

الساكت عن الحق شيطان اخرس

هي مصر كمان بقى فيها كدا دا انا قلت مفيش كدا غير في السعوديه واحنا احسن منهم

يادي النيله
كل دا بسبب قلة الدين
ربنا يحمينا ويعافينا من الناس دي والمصايب دي

حسبي الله ونعم الوكيل

اول زيارة ليا وان شاء الله مش الأخيرة

ربنا معاكي ويوفقك ويسهلك عليكي في امتحاناتك
واحنا كمان يارب

دمت بود

تحيــ بسومةــاتي(:

nona يقول...

الجواز وسنينه

شكرا لزوقك
ومش هنقدر نقول غير ربنا يعافينا

nona يقول...

محاسن
مانتى طبعا راسية على اللى المدينة فيه وراسية على البنات
خلاص حفظتيهم وحفظوكى مش 3 سنين بنشتغل هناك انا وانتى

شكلك انتى اللى هتخلصينا من شرها
هههههههههههههههههههههههههههههههه
يلا يا بطل يا همام

nona يقول...

محاسن
انا اقدر انسى جمايلك عليا
دة انتى اللى خليتينى اعملها وانتى اللى مسمياها
يعنى بلاش فضايح دى تعتبر بنتك التانية
هههههههههههههههههههههههههههه

وبطلى فضايح بئا
كل متزورى المدونة لازم تقطمى فيا

سيبينى اخد فرصتى بئا وازحلقك من على السلم
ههههههههههههههههههههههههههههههههههههههههههههههههههههههه

nona يقول...

Mysara

انت بتقول ايه ؟؟؟؟؟؟؟؟؟؟؟؟؟؟
مدن الشباب كمان
يادى المصيبة
انا اول مرة اسمع عن مدن البنات
انما مدن الشباب دى كمان مصيبة منيلة بنيلة

ربنا ينتقم منهم
ربنا ينتقم منهم
ربنا ينتقم منهم

حسبى الله ونعم الوكيل

شكرالمرورك

nona يقول...

blue wave
الظاهر ان احنا لسة هنوصل لأكتر من كدة
وان مصر هتكون الرائدة و الأولى فى انيل من كدة

شكرا ليك

nona يقول...

بسمة

مصر فيها زى السعودية
يمكن لان السعودية مختفية فى مشاكلها وبلاويها مش باينة

بس انا زيك اول مرة كنت اعرف الفضايح دى من السعودية وكنت فاكرة مصر نضيفة من الانواع دى من الناس
وقولت ان السعودية لانها متزمتة دينيا فبيحصل فيها كدة
لان انا شوفت فى مدارس السعودية بلاوى بلاوى بلاوى لكن دى عدوى وماشية على الكل

شكرا لمرورك

norahaty يقول...

ياحبيبتى ولما يبقى رئيس مجلس إدارة
جهاز اد الدنيا وحرامى ومرتشى
ويتساب مرة واتنين وتلاتة
ويرجع لمنصبه يبقى ايه؟

nona يقول...

norahaty
مهى دى من ضمن المصايب شوفنا منها كتير
انا شايفة كدة ان البلد دى معدش يتعاش فيها
بس هنروح فين اكيد كل بلد فيها بلاويها

مفيش غير الاخرة

شكرا ليكى يا سكر

mahasen saber يقول...

هههههههههههههههههههه على فكره رجلى اتكسرت

وانتى وسلمك السبب هههههههههههههههه

عمرو يقول...

و بنستغرب ليه ربنا مبتلينا بالبلاوى و المصايب على كل شكل و لون ؟؟!!
لأننا شياطين خرس الحقيقه بنسكت عن الحق و بنطنش على البوظان و بنقول سيب الملك للمالك ..
طيب أدينا سيبنا الملك للمالك ..
شوفوا بقى مالك مالك حيتصرف اٍزاى .. و آدى أولها : من المتوقع وفيات بالملايين لو أنتشر وباء أنفلونزا الحلاليف فى بر مصر المحروسه ..
و البنات اللى تنقصف رقابيهم ساكتين ليه ؟؟!!
خايفين من أيه ؟؟!!
قابلين على نفسهم هذا الذل ليييييه ؟؟!!

nona يقول...

محاسن
انكسرت بس؟؟؟؟؟؟؟؟؟؟
طيب انا هاجى ازورك باتنين كيلو قشر موز استنينى

هههههههههههههههههههههههههههه

nona يقول...

أستاذ عمرو

البنات تحت تهديدها
بس انا مش عارفة هى مهدداهم بإيه
دى رفدت الموظفين اللى كشفوها وقالولها انهم مش هيسكتوا

لدرجة ان لما فى بنت اعترفت عليها قالتلها انا هقول للناس ان انتى اللى كدة
بس هلى التهديد دة يكفى انهم يسكتوا على كدة ويناموا خايفين على نفسهم بالليل
جايز يكون سبب قوى لان البنات سمعتها بتتخدش من كلمة حتى لو ظلم

ربنا يرفع عنهم وعننا الظلم
واللى هقدر عليه هعمله

شكرا ليك