السبت، 25 أبريل، 2009

نطالب بإلغاء القانون ...

ضع علامة √ فى المربع 
فى جريدة الأهرام عدد امبارح الجمعة 24/ 4/ 2009 فى بريد الجمعة قريت موضوع بعنوان ( القانون القاتل) و بجانبه رسالة عن موضوع سابق اسمه ( قبلة الوداع) ..
الموضوعين دول بيتكلموا عن الناس اللى بيعدوا الشارع فى أمان الله وفجأة تيجى عربية سواقها أعمى تطسهم ويموتوا فى الحال...
المشكلة بئا مش فى إن سواقها أعمى وأهوج بس ... دة فى إن كمان السواق لما يتمسك و بيروح القسم بياخدوا أقواله و500 جنيه غرامة للجثة الهامدة اللى جاب أجلها واللى بمعنى أصح تمنها عند الحكومة 500 جنيه مش مهم بئا حرقة القلوب والنار اللى بتولع فى الأهالى والجنون اللى بيصيبهم لما يتصل بيهم واحد يقولهم تعالوا اتعرفوا على ابنكم فى المشرحة .... الابن اللى كان رايح يشترى حاجة ولا البنت اللى رايحة الجامعة وبتعدى الشارع زى الناس ولا.. ولا ... ( ما أرخص المصرى فى بلده) ...
يعنى لو المبلغ دة كان كبير وسعر الانسان كان غالى زى ما ربنا مغليه مش كان دلوقت كل واحد بياخد باله ويحاذر ألف مرة قبل مايتجرأ ويزهق روح انسان ؟
الموضوعين دول فكرونى بقصة زى دى بردو قصة ولدين فى خامسة ابتدائى وهما مروحين بيعدوا الشارع طستهم عربية كان راكبها شاب من بتوع اليومين دول الى فاكرين ان هما الوحيدين اللى بيركبوا عربيات ولازم يدوسوا كل من هو ماشى على رجليه
المهم ان ولد مات فى الحال والتانى أصيب اللى مات بئا والدته جاتلها هيستريا كل متكلم حد فى التليفون أو حد يزورها تقوله محمد مات يا فلان ، محمد مات يا فلانة .......
ومتروك لكم توقع وتخيل اللى زيها عامل ازاى
أخيرا وليس آخرا صاحب موضوع ( القانون القاتل ) اللى هو خال المجنى عليه قال على اقتراح يكاد يكون هو الصح ، قال :
" عزيزى .... قل لهم إن الكل يسير ويقتل فى الشارع وثمنه 500 جنيه إذن نطالب بإلغاء القانون وكل من يقتل إنسانا فى الشارع يلقى عليه رزمة من الجنيهات ويمشى بكل نفس راضية"
وأنا رأيي من رأيه .... طالما مفيش فايدة

هناك 40 تعليقًا:

norahaty يقول...

السلام عليكم ورحمة
الله تعالى وبركاته
لا حول ولا قوة الا بالله
يبقى لما يتعمل فينا مالايعمل
بالدول العربية والاجنبية مش
غريب ولا عادى بدال بلدنا رخصتنا كده؟حسبنا الله ونعم الوكيل.

أحمـــــــــــــد أبو العلا يقول...

شوفي يانونا

رخصونا فرخصنا
باعونا ومحدش اشترى
رمونا على الأسفلت ومبقاش لينا ديه

بعيدا عن عقدة الخواجه, نشوف البني آدمين بيعملوا ايه؟
لما حادثه تحصل تيجي الشرطه تبص على كاميرات المراقبه وتعاين سرعه العربيه وتعاين المكان اللي عدا منه الضحيه وتقول مين اللي غلطان
والعقوبه بتكون واضحه وصريحه

بس احنا هنا بنقول يلا مش مشكله
كلب وراح
قيه منه كتير

500 جنيه دول كفايه ويزيدوا كمان عن قيمة الأنسان في مصرنا الحبيبه

وعمار يامصر

مامة مازن يقول...

اختى نونا
فعلا كلنا عارفين ان الانسان هنا بقى ارخص حاجة
وصدقينى كلامك وجع قلبى جدا لانى حاساه جدا
وخال الولد ده عنده حق طلع منه الكلام اللى ملايين بيفكرو فيه

بدراوى يقول...

دكتور نونا

المسألة ليست مسألة قانون فقط
الفكرة ان قوانين المرور لدينا و تنظيم المرور يعطى أهمية و اهتمام أكثر بصاحب السيارة و القائد
أكثر من اهتمامه بالمشاه
رغم ان المفروض ان يكون الإهتمام بالمشاه بوصفهم الطرف الأضعف فى موضوع المرور ، تخيلى عندنا فى اسكندرية يمكن بشكل يومى على كورنيش البحر بعد التوسيع ناس بتشوطهم العربيات
من تحت راس ان اماكن معينة مفيهاش انفاق تحت الأرض
يعنى انا شخصياً لما بعدى البحر لو ملقتش نفق امشى ان شاء الله محطتين ثلاثة ترام لحد ما لاقى نفق
طبعاً فيه ناس مستهترة بيلاقى النفق قدامه و يعدى البحر برده

بس مهما كان المفروض يدوا اهتمام بالمشاه اكثر من كدة

و لازم القانون يطبق على الكل و يكون قانون رادع

ربنا يرحمنا و يحسن ختامنا
و يحمينا من بطش سائقى السيارات

Sweet Violet يقول...

من اكتر من سنه لما حصلت حادثة الحاجة اللى وقفت قدام عربيه الشرطه و الظابط طلب من السواق انه يدوسها و وقتها الدنيا قامت و الناس اعترضت نزلت فتوى من الازهر تؤيد القانون ده .. يبقى منتظرة من الحكومة ايه ؟؟؟!!!!

بس بردو لازم نقول اللى لينا و اللى علينا فى بعض الاشخاص بيعملوا فيها شجيع السيما و بيعدوا رغم وجود كبرى مشاه او نفق وبيكون الطريق سريع .. يعنى مش دايما السواق فعلا بيكون غلطان ولا ايه ؟؟

اول زيارة للمدونة و ان شاء الله مش الاخيرة (:

تقبلى مرورى

الازهرى يقول...

ربما كان العيب مشتركا بيننا
فمنا من لا يحترم القانون ويتحرك ليعبر الطريق متصورا ان القضاء لن يبلغه
ولكن الاسوأ فعلا هو هذا القانون الذى اباح بالفعل الكثير من الممارسات الغريبة للشباب بسياراتهم
وما دمنا صامتين فسوف ترخص دماؤنا يوما بعد يوم

تحياتى دوما

wedad يقول...

بلدنا بقت بلد الاغنيا
الفقرا يروحولهم حته تانية
او بعد الشر يموتوا احسن لهم

Tamer Nabil يقول...

السلام عليكم

بجد حاجة تحزن

البلد عندنا عايزة تبقى نظيفة اكتر من كدة

ربنا يصلح الحال

تحياتى

nona يقول...

norahaty...
الدول العربية والأجنبية معدتش بتحترم مصر ولا المصريين زى زمان
ودة بسببنا احنا من اللى بنعمله فى بعض

شكراليكى

nona يقول...

أحمد ....
دة لما حادثة بتحصل هنا الشرطة بتحرص على انها تشوف حد واخد باله؟ ولا حد بيصور وهيفضح الدنيا ولا لأ علشان يوقفوه

شكرا ليك

انت تسال والكمبيوتر يجيب يقول...

دعوه
الأخت العزيزه
تحيه طيبه
برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام يذاع يوميا التاسعه وعشر دقائق صباحا عدا الجمعه
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا

وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
المدونه
http://netonradio.blogspot.com
الموقع
http://stop.to/cairo

nona يقول...

مامة مازن
الكلام دة يوجع قلب كل حساس وبيخاف الله انما اللى مبيتقوش ربنا فى الناس هيمر عليهم مرور الكرام

أشكرك

nona يقول...

بدراوى
عندك حق والله قوانين كتير مش متظبطة مع انها قوانين وضعية والمفروض انها لما تتحط تبئا بتتحط علشان تناسب البلد وظروفها

شكرا

nona يقول...

Sweet Violet
نورتى المدونة يا قمر

الحقيقة انا اول مرة اسمع منك قصة الست دى
قصة فعلا المفروض تغير قوانين كتير

انا معاكى فى ان فى ناس بتستقوى وتعدى الشارع بهمجية بس بردو لو القوانين غرمت الماشى والسايق كله هيخاف على نفسه مهو مش هيبئا موت وخراب ديار انما لما كل اللى يقتل واحد يدفع 500 جنيه ويروح يبئا القانون مالوش لازمة

شكرا

nona يقول...

أزهرى
ولو مسكتناش ولو قولنا بعلو صوتنا تفتكر يعنى هيتسمع كلامنا ولا هيتاخد فى الحسبان
ولالالالالالا حاجة ولا هتهز اى حد
احنا من ديقنا بنفضفض بس

أشكرك

nona يقول...

wedad
والاغنياء مش حاسين بالفقراء
على رأى عادل امام فى مسرحية الزعيم الشعب لازم يكون فقير لأن الفقراء يدخلون الجنة

اشكرك

nona يقول...

Tamer
حاجات كتير فعلا عايزة تتصلح مش دة بس
وربنا يصلح الأحوال آمين

شكرا

nona يقول...

انت تسال والكمبيوتر يجيب يقول...
دعوه مقبولة
وربنا يوفقكوا

مامة مازن يقول...

نونا اختى الغالية جالى هلع لما لقيت نعليق وحش جدا على المدونة بتاعتك هنا (وطبعا من سى غير معروف وماضى هاكرز) والحمد لله دخلت دلوقت ملقيتهوش
الحمد لله انه اتمسح
ونقول ايه بقى ناس ولاد........
سورى

nona يقول...

مامة مازن
متعرفيش والله ان انا جالى هلع اكتر منك واتخضيت خضة
ساعتها حسيت ان كل اللى ببنيه فى مدونتى هيتهد من الناس اللى زى اللى من غير اسم دة ولا اللى مايتسمى ربنا ينتقم منه هو وأمثاله

انا اسفة ليكى وللكل بجد
بعد كدة هبئا اعمل اشراف على التعليقات

معلش انا اسفة بجد

Soul.o0o.Whisper يقول...

السلام عليكم و رحمة الله


فعلا ... اللى ناقص
إن اللى يدوس حد نقف نصقف له و نقوله مبروك عليك
عقبال الجثة الجاية


اقولك ايه؟؟؟
حسبنا الله و نعم الوكيل



دمتى بود

موناليزا يقول...

ده حتى لو هيغطيهم بالفلوس دى برضه مش هيكفوا
وبعدين الغرامة دى مين اللى بياخدها يعنى المرور مثلا ولا الورثة؟!
هو السجن فى الحالات دى اتلغى ولا ايه؟

عمك ياض يقول...

ياسلام !!
ده بجد ؟

يعني بيقبضو عليه ياخدو اقواله ويدفع الغرامه وبعدين يروح يكمل نوم في البيت ؟؟؟؟

نجمة قمر حبيب و بعيد يقول...

السلام عليكم و رحمة الله و بركاته
اول تعليق ليا عندك ارجو تقبله
حلو الوضوع بس بينى و بينك الشكلة مش بس فى 500 جنيه
شوف بقه لو كان فاعل خير يتبهدل احسن بهدلة و يضرب و العربية تروح الكشف الجنائى و يتقلب و عيشته تبقى هباب
ده فاعل الخير
اما المسئول عن الحادث بيدفع 500 جنيه و يطلع بيه
عجبى عليك يا زمن
رخصت الغالى و غاليت الرخيص
عجبى
سلام من نجمة قمر حبيب و بعيد بس زعلانة على البنى ادامين و عجبى

nona يقول...

Soul.o0o.Whisper

لا والمفروض كل ماكتر عدد الجثث يعملوله خصم ههههههههههههههههههههههههه

شكرا ليكى يا قمر

nona يقول...

موناليزا
انا بردو سألت السؤال دة مين اللى بياخد الفلوس؟

والله اعلم يعنى ان الحكومة هى اللى بتاخدها لأن دى غرامة
بس بتاخدها عن طريق الشرطة ولا الشرطة اللى بتاخدها ؟
طيب يتعمل بيها ايه ؟

الله اعلم بردو

اشكرك يا قمر

nona يقول...

عمك ياض...

اه وبيجيله نوم وضميره مستريح كمان
مهو دفع الغرامة


شكرا لمرورك

nona يقول...

نجمة قمر حبيب وبعيد..

نورتى مدونتى المتواضعة بس يارب تكون عجبتك


عندك حق لو واحد خده بئا وداه المستشفى مش بعيد يطلعوه هو القاتل

نورتى يا سكر

هانى زينهم يقول...

لو دورتى على القوانين اللى عايزة تتلغى هتلاقى 90 % منها عايز الحرق مش الالغاء . والله ما عارف البنى ادم فى بلدنا دى هيوصل لفين ؟ 500 جنيه ده تمن خروف رضيع لسة ما كملش اسبوع مش بنى ادم . عليه العوض .

nona يقول...

أستاذ هانى
عندك حق والله دة ميجيش تمن خروف العيد
الخروف أغلى

شكرا

حسام غانم يقول...

هممممم

هو احنا فعلا رخصنا في بلدنا لدرجة لا توصف

بس يعني موضوع الحوادث ده

مبحبش فيه التعميم

اللي هو يقول لك السواقين شباب اليومين دول

والسواق الأهوج والكلام ده

لأن معظم الحوادث فعليا بتبقى نتيجة سرحان الشخص الماشي

بس دايما الكلام كله بيبقى عن الضحية
وعن جنون السرعة والكلام ده

مع إن لو أي حد مكان سواق العربيةهيعمل ايه يعني

مهوش قاتل ولا ده قتل عمد

nona يقول...

حسام غانم
الغلط مش على اللى ماشى لوحده ولا على اللى سايق بس الغلط على الاتنين بس الغلط الأكبر بيكون على اللى سايق علشان هو اللى بيقدر يتحكم فى عربيته انما اللى ماشى بضهره ولا جنبه مش شايف غير انه مبيعرفش يلحق نفسه زى الى سايق
دة غير ان الشباب سواقتهم وحشة وسريعة انما الكبار هاديين شوية

شكرا ليك

غير معرف يقول...

هذا الموضوع ضغط على وتر حساس فى قلوبنا جميعا فكم من شاب أوعائل أسرة وقع ضحية لهؤلاء المتهورين الذين يعرفون جيدا أنه ليس هنا قانون رادع فى هذا الأمر .
والله أمام عينى شاب ابن رجل مهم تطاول على عسكرى المرور أمام عينى لاته تجرأ وأخذه نخالفة لوقوفه فى الممنوع.
فما بال سيدتكم بالرعيةفلا وزن ولاقيمةلهم ،وهذا يدل على الفساد وازدواجية المعايير وعدم الوعى لأن القانون لايطبق على الجميع وأنتم تعرفون الباقى.....

فشكووول يقول...

اهلا نونا العزيزه
نورتينى وشرفتينى فى فشكول
وتحياتى اليك
ما هو لو انه عارف انه حيدخل السجن ويدفع مبلغ كبير كان أخد باله وهو ماشى وعمل حسابه واعطى نفسه مزيدا من الانتباه لارواح الناس
وبعدين ما هى الحكومه بتصرف للمصاب 500 جنيه وللمتوفى 3000 جنيه والحال بقى من بعضه
تحياتى

nona يقول...

غير معروف..
أولاد الناس المهمين كتير وكل واحد شايف انه سيد البلد دى

وحسبى الله ونعم الوكيل
شكرا للمرور

nona يقول...

فشكول..
بس انا قريت فى الاهرام انه الغرامة 500 بس

الله اعلم بئا

شكرا لمرورك جدا

nona يقول...

فشكول..
بس انا قريت فى الاهرام انه الغرامة 500 بس

الله اعلم بئا

شكرا لمرورك جدا

nona يقول...

فشكول..
بس انا قريت فى الاهرام انه الغرامة 500 بس

الله اعلم بئا

شكرا لمرورك جدا

رئيس جمهوريه نفسى يقول...

هو بس انا حوضح لحضرتك حاجة بخصوص مبلغ ال 500 جنيه دة مبلغ بيكون كفالة انما بخصوص المتوفي او المصاب واهلة فدلوا بعد ما بتتحول القضية للمحكمة بيكون من حق اهل المحكمة الادعاء مدنيا خلال نظر الشق الجنائي وبعد ما بينتهي الشق الجنائي بيرجعوا على المتسبب في الحادث بطلب تعويض أمام المحكمة المدنية

nona يقول...

رئيس جمهورية نفسى..

انا طبعا مفهمتش حاجة من اللى قولته...
بس دة كان كلام خال المجنى عليه ان الغرامة 500 جنيه ؟؟؟؟

أهلا بيك فى أول زيارة للمدونة