السبت، 9 مايو، 2009

التاج جانا وفرحنا به

ضع علامة √ فى المربع 


شكرا لأحمد بدراوى على تمرير التاج انا اتفاجئت والله مكنتش متوقعة بس يارب اكون خفيفة عليكوا




اسمك المشهور بيه وسط أصحابك ؟


نونا


سنك ؟


27


اسم مدونتك ؟


بلاش فضايح الاسم دة اللى اختارته محاسن صاحبة مدونة عايزة اطلق و


مجال دراستك ؟


تربية قسم انجليزى

واتنين دبلومة فى علم النفس وطرق التدريس

ومسجلة ماجستير ومكسلة اكمل


الصورة الرمزية لمدونتك بتعبر عن ايه ؟


صورة عكسية لاسم المدونة كنوع من السخرية


هل فكرت فى إغلاق المدونة ؟ والسبب ؟


لا لسة دة انا جديدة ملحقتش


ايه رد فعلك لو حد قل أدبه عليك في التعليق ؟


هكتبله رد مناسب لو مجرد سوء تفاهم انما لو طول لسانه هحذف التعليق وهدعى عليه


أسوأ مدونة ؟


لسة مقابلتهاش بس اكيد هتكون المدونات السيئة اللى هدفها سيئ زيها


هيحصل ايه للإيميل بتاعك بعد ما تموت ؟


هيموت هو كمان


أديت الباس وورد لحد قبل كده ... ؟


اه لأخواتى


السفر بالنسبة لك ؟


حلو بس انا بتعب من السفر بتمنى لو انى اصحى الاقى نفسى هناك هنا بئا المتعة .


المود بتاعك ؟


دايما اعصابى مشدودة مبحسش بالهدوء غير قليل


بتعمل ايه فى وقت فراغك ؟


معنديش اوقات فراغ بس ساعات بقضى وقت طويل على النت .


الأكلة المفضلة ؟


عادى باكل حاجات كتير ومباكلش حاجات كتير بردو



الصفات التى ورثتها من والدك ؟


مش عارفة


الصفات التى ورثتها عن والدتك ؟


بردو مش عارفة


أكتر ست حاجات بتكرهها ؟


ان حد يغصبنى على حاجة انا مش عايزاها

و الظلم

التقيد

ان محدش يبقى فاهمنى او حاسس بيا

المسئولية ( بتتعبنى جدا )

تقفيل المخ

أكتر ست حاجات بتحبها ؟


الرومانسية

الحرية

التعرف على الثقافات الأخرى

الصداقة

الطفولة

الإخلاص

شخصيتك نوعها ايه ؟


مش عارفة احددها غير انها شخصية عصبية جدا منظمة متحملة للمسئولية نفسيا وجسديا

حاسة انى اكبر من سنى مع ان اللى بيشوفونى بيدونى سن اصغر من سنى الحقيقى (مش عارفة ليه)

بس عصبيتى عاملالى مشاكل مع نفسى ومع الناس

لانى بحب النظام وبحب الصح الأوى اللى مش ماشى مع الناس اليومين دول


لماذا دخلت عالم التدوين ؟


محاسن هى السبب فى كدة لانها بعد ماعملت مدونتها عايزة اطلق قالتلى اعمل مدونة وانا الحقيقة مكنش فى دماغى كنت ايامها مش فاضية اصلا بس بعدين لما فضيت قالتلى اعملى مدونة اكتبى فيها المشاكل اللى بتقابلك وسميها بلاش فضايح ... بس


أجمل كلمة قيلت فى وصف مدونتك ؟


مش عارفة .


أهمية التعليق بالنسبه لك ؟


مهم جدا علشان احس انى مبكلمش نفسى وان كلامى له صدى عند ناس تانية

لان لو محدش رد عليا هحس بالاحباط لان دة معناه ان موضوعى مش كويس او مالوش اهمية


أحسن بوست كتبته وليه ؟ ضع اللينك


كل البوستات عندى اعتقد انها كويسة لانها خبراتى الحقيقية

وبعدين دول على بعض 15 موضوع


أفضل بوست قرأته ؟وأفضل مدونة؟


كل المدونات دى بالبوستات اللى فيها

طعم البيوت

بلال فضل

اصحى يا مصر

صوت من مصر

مدونة يا نساء العالم اتحدن

عايزة اطلق و

نضال

حياة بكل ما فيها

استراحة هانى زينهم

حبشتكنات فلسفية

قصاقيص حبيبة

Sweet violet

Paradise lost

الأزهرى

شمس النهار

Voice of mine

ومدونات كتير اوى


الإنترنت بالنسبة لك ايه ؟


حاجة بتسلينى


تمرر التاج لمين ؟


مامة مازن

محاسن

يا نساء العالم اتحدن

اصحى يا مصر

أفكار حرة

فكرة من الزمن دة

اضحك للدنيا

هناك 44 تعليقًا:

حسام غانم يقول...

إجابات جميلة يا نهى

وعرفتنا أكتر عليكي

بالتوفيق دايما

المعلم محمد صاحب المطعم - طعمية سخنة يقول...

اهلا بالتاج
التاج جانا

سعيد اني بتعرف عليكي في اول زيارة

صوت من مصر يقول...

يا تاجاتك
بس هو الكشرى فى حد م بيحبه غيرى انا ولا ايه
انا كرهته نظرا لقولونى
بس احب اقولك انتى واضح من كلامك انك شخصيه مثقفه بمعنى الكلمه وغير مقيده باحد او مش بتخافى من كلام الناس اولا لدراستك
وده ماثرش على شخصيتك المصريه الاصيله
احيكى على كل الاجابات

مامة مازن يقول...

نونا ايه العسل ده اسمك على اسم احدى اخواتى
ثانيا عرفتينى عليكى وانا سعيدة لكده
ثالثااوعى اوعى متكمليش دراسات عليا
قطعتى شوط كبييييير
وحقيقى مصر محتاجة عقول بفكر جديد متحضر وراقى عارف الخطأفين وهيحاول بشرف انه يصلح
اوعى هتفضلى متاثره نفسيا جدا لو مكملتيش
تحياتى حبيبتى ومعنى كده بقى اجاوب التاج عندى فى المدونة
هقرا ردك علشان اعرف

بسنت صلاح الدين يقول...

اهو جه يا ولاد اهو جه ياولاد،لا الا الماجستير كملى يا نونا،اما بقى عن ان شخصيتك اللى بتحب النظام و المشى المظبوط اللى مابيجيش على هوا ناس اليومين دول ،فأحب اقولك امشى صح يحتار عدوك فيك دى مشكلتهم مش مشكلتك،انتى كده تمام اوى

nona يقول...

حسام غانم
شكرا جدا ليك
ربنا يخليك

nona يقول...

معلم محمد
نورت مطعمى فى اول زيارة
شكرا ليك

nona يقول...

محمد - صوت من مصر
انا بحب الكشرى الاصفر اوى ههههه
شكرا جدا ليك على كلامك وعلى مرورك

nona يقول...

مامة مازن حبيبتى
ازيك
فينك
متشكرة اوى ليكى بس انا زهقت والله من الدراسة بقت تخنق
بس مصر عمر ماحد يغيرها هتفضل حالتها تزداد سوء محدش هيقدر عليها
ربنا يسترها

فين تاجك محطيتيهوش ليه على المدونة ؟
مستنياه

شكرا ياقمر

nona يقول...

بسنت
ازيك يا سكر
انا تعبت والله من موضوع الصح والغلط مبقيتش قادرة اتعامل مع الناس بسهولة بسبب انهم بيعملوا حاجات غلط وبيصروا انها صح
ولا يمكن انا اللى غلط

اما الماجستير بئا ربنا يقوينى عليه
شكرا يا قمر

فتاه من الصعيد يقول...

اجابات جميله عفويه ....مدونتك رائعه وموضوعاتها حلوه
دمتى بخير....تقبلى مرورى

Mysara يقول...

:))))

اول فضيحة في مدونة بلاش فضايح :))

تشرفنا يا نهى :)

Sweet Violet يقول...

اجاباتك جميلة يانونا

مع انك قلبتى كام سؤال كده ^_*

بس حاولى فعلا انك تكملى مدام بدأتى الطريق وبلاش كسل ^_^

اما بقى عن شخصيتك اللى مش ماشية على هوى الناس فخليكى زى ماانتى لانك انتى الصح فى زمن انقلب فيه كل المفاهيم

nona يقول...

فتاة من الصعيد
نورتى المدونة
وشكرا ليكى

nona يقول...

mysara
هههههههههههههههههه
فعلا دى اول فضيحة واهم فضيحة

الشرف ليا انا

nona يقول...

sweet violet
انا قلبت اسئلة؟؟ دة انا غلبانة
ربنا يعينى ويقوينى على التكميل وعلى الناس بردو

شكرا يا سكر

بدراوى يقول...

ههههههههههههههههههههههه
اجابات حلوة بس برده فعلاً قلبتى بعض الأسئلة خصوصاً أسئلة الأكل
:-)
واضح انك هواكى فى الأكل زيى
مينفعش كدة
يا خوفى لا تكونى نقلتى صنوف الأكل اللى عندى و تكاسلتى عن اختيار صنوف اكلك

على فكرة الواد اللى ماسك ميكروفون و بيزقع ده شكله ظريف قوى
فعلاً بلاش فضايح بس حقول برده و حفضحكوه
هههههههههه
---------
فيه ملحوظة صغيرة
انا اسمى احمد بدراوى بدون الف و لام
يعنى انا عارف اننا مش فى سجل مدنى و لا فى الشهر العقارى
بس يعنى مش بحب حد يكتب اسمى بشكل غلط
ياريت الألف و اللام يتشالوه
لو سمحت
:-)

nona يقول...

بدراوى
انتوا ظالمنى صدقونى
ال انا اقلب اسئلة الاكل ال

وبعدين انا عارفة ان انت أحمد انا كاتبة ( شكرا ل أحمد ) يعنى الام دى حرف جر
ركزوا بئا هتضيعونا

شكرا ليك يا احمد

بدراوى يقول...

ركزوا ايه يا دكتور بس
هو انا قولتلك اسمى
الأحمد
ههههههههه
انا بتكلم على بدراوى
حضرتك كاتبة أحمد البدراوى
!!!
مش ممكن الصراحة
ركزوا بقى حتضيعونا

Soul.o0o.Whisper يقول...

السلام عليكم و رحمة الله و بركاته


ما شاء الله عليكى يا نهى

بئا محاسن تعمل فيكى كدا؟؟
هههههههههه
لالالا ...مكنش العشم


و بعدين تطلعى عصبية ؟؟
طب ليه كدا؟؟
كدا مش كويس عشان صحتك



بس ايه

بتزا و صينية بطاطس
لالالالا
دا انتى طلعتى دماغ خالص
:)



بجد اجاباتك جميلة و بسيطة


دمتى بود دائما يا جميلة

yoyo يقول...

صباحك سكر يا نونا

شوفى بقى يا ستى احنا ولاد قسم واحد بقى مع اختلاف بس انت تربية انا كنت اداب يعنى زمايل اهوا

طبعا محاسن دى حتة سكرة والله ربنا مش يحرمنا منها ابدا يارب

وجد اسمى بين المدونات اللى عجبتك بجد يا نونا شرف ليا والله
واتمنى دايما كدا احوز على اعجابك

اجابتك جميلة وعرفتنا عليكى اكتر
يالا عقبال التاج القادم
دمتى بالف خير
تحياتى
يويو

Soma يقول...

مبروج عليكي التاج يا نهي
تحسي كده بالصدق الشديد في كل اجاباتك صح؟؟؟

انا مبسوطه اني عرفتك اكتر يا نونا وكملي الماجستير بلاش كسل
بس انتي طلعتي حوار :)

تحياتي واتمنالك كل الخير

قلب ارهقته الاحلام يقول...

اجاباتك جميله جدا يانهي

وماشاء الله عليكي لازم تكملي :)

ربنا يوفقك يارب وتوصلي للي انتي عوزاه

تحياتي ياقمررر,,

ادم المصرى يقول...

اجبات جميله جدا

وتاج جميل يبختك يستى بأسئلتك

رؤية يقول...

هههه
ما عرفش ليه حسيت انى بقرا طلقات رصاص
مش لانها كلمات وحشة ابدا
بس سريعة.. واضحة..مختصرة


تاجك جميل

تحياتى لك

عمرو يقول...

أشكرك يا أستاذتنا على تعريفنا بجوانب لم تكن معلومه لنا عن شخصيتك و ده الفائده الحقيقيه اللى بنلاقيها فى التيجان رغم اٍختلافى الشديد معاكى فى موضوع المكرونه بالبشاميل و فى كل باشميل فى أى مكان فى العالم ..
و أشكرك تانى لاٍختيارى مدونتى المتواضعه كواحده من أضمن أفضل المدونات لديكى و ده شرف ليا و الله ..
تقبلى خالص تقديرى و تحياتى ..

nona يقول...

بدراوى
ههههههههههههههههههههههههههههههههههههههه
هههههههههههههههههههههههههههههههههههههه
ههههههههههههههههههههههههههههههههههههههههه
هههههههههههههههههههههههههههههههههههههههههه
هههههههههههههههههههههههههههههههههههههههههه

مش عارفة اقولك ايه والله
تم التغيير

nona يقول...

Soul.o0o.Whisper
الظاهر ان انا فضحت نفسى
هههههههههههههههههههههههههه

شكرا ليكى يا سكر

nona يقول...

يويو
صديقة لغة واحدة
شكرا ليكى يا سكر
انتى مدونتك جميلة واكيد فى كتير رأيهم زى رأيي

nona يقول...

سوما
شكرا يا قمر على كلامك الجميل
ومرورك الأجمل

nona يقول...

قلب ارهقته الاحلام
شكرا جدا يا قمراية
ربنا يكرمك

nona يقول...

آدم المصرى
شكرا جدا ليك
عقبال تاجك يارب

nona يقول...

رؤية
هههههههههههههه
اصل انا مبعرفش احور حتى تلاقينى لما بكدب بنكشف علطول
معلش بئا
شكرا ليكى يا سكر

nona يقول...

أستاذ عمرو
ماله البشميل ؟
دة جميل والله ههههههههههههههه

وبعدين انا اللى يشرفنى ان اتابع مدونة زى مدونة حضرتك بجد

شكرا لحضرتك جدا

عمرو يقول...

يا أستاذتنا بينى و بين البشاميل و كمان البانيه بأنواعه عداء قوى و مستحكم منذ طفولتى السعيده و الحقيقه حاولت أدور فى اللاوعى على سبب معقول لهذا العداء و لكن بدون فائده ..
أعتقد و الله أعلم أنه شىء مترسب عندى من حياتى اللى كانت قبل كده تبعا لنظرية تناسخ الأرواح اٍن صحت هذه النظريه يعنى ..

nona يقول...

سبحان الله بجد
عداء بدون اسباب ظاهرة
بس دة لو فى موقف بينك وبينهم وانت صغير اعتقد يعنى هتفتكره
انا اعرف الاطفال ممكن ميكلوش الفراخ او الارانب علشان مثلا تكون عضتهم قبل كدة او شافوها بتدبح
طيب الباشميل والبانية ؟؟؟؟؟؟
غريبة فعلا

mahasen saber يقول...

يا تيجانك يا نونا ويا اجاباتك يا قطه هههههههههههههه

طب مقولتيش ليه انك انتى اليى عرفتينى الفيس بوكوانى طلعت عينك فيه

انا ربنا عالم بحمد ربنا على معرفتى بيكى وبدعاء وانتوا من الحسنات الكتيره خالص اليى حصلتلى فى فترة شغلى دى
يعنى تخيلى كده لو مكنتش اشتغلت فى المعموره دى كنا هنتعرف على بعض ازاى..

mahasen saber يقول...

وبعدين يلاش فضايح ده الاسم المناسب للشخص المناسب
فى المكان الغير مناسب ههههههههههههههههه

بلاش شد شعر خلاص ..طب قطعتى كام شعره ههههههههههههههه

nona يقول...

محاسن
حلوة المعمورة دى .............
ههههههههههههههههههههههههههههههه
ههههههههههههههههههههههههههههههههه

هى فعلا معمورة باللى فيها هههههههههههههههههههههههههههههههههههههه

انتى كدة بتتكلمى فى السياسة خدى بالك

nona يقول...

محاسن
وبعدين انا مقدرش انسى فضلك عليا
انا مبنساش فضل حد عليا بردو

ومنساش انى ناوية ازحلقك قصدى اساعدك تطلعى على السلم وازقك من ضهرك وافتحلك باب المجد
هههههههههههههههههههههههههههههه

تأثير الفراشة يقول...

السلام عليكم
دى أول زيارة لى لمدونتك الجميلة، و لا أخفيكى سرا، إنى لما شفت إجاباتك على التاج...اتفاجئت جدااااا، لان 85% من اجاباتك حسيت كأنى أنا اللى مجاوبة
!!!!!!!!!
و مش بس كده ، اتفاجئت كمان لأن مامة مازن هى اللى كانت مررت لى التاج ، اللى اكتشفت فى آخر التاج إنه من عندك
!!!!!!!!!!

إنما حقيقى سعدت جدا جدا بزيارة مدونتك الجميلة و بإذن الله هاكرر الزيارة
تحياتى ليكى

نهى......(برضه)
:) :)

mahasen saber يقول...

ههههههههههههههههههههه
اه معموره ومعموره وفشر المعموره بتاعت اسكندريه كمان

بس وانتى بزحلقينى على سلم المجد هخلى دعاء تصور عشان ارفع قضيه واخد تعويض من عينك ان شاء الله

هههههههههههههههههههه

nona يقول...

د/ نهى
نورتى مدونتى بجد
دة انا بقيت بتلخبط بينى وبينك
مش عارفة اللى بيتكلم بيتكلم على انهى نهى فينا هههههههههههههههه

لخبطتينى يا شيخة
انا سعيدة جدا بيكى وبمرورك ويارب ميكونش الأخير

nona يقول...

محاسن
زميلة الكفاح والمدونة والمعمورة

انا هخليها متصورنيش ولو عايزانى اخليها تزقك معايا انا مستعدة
ههههههههههههههههههههههههههههه