الجمعة، 26 يونيو 2009

صدق من قال و من الحب ما قتل

مش عارفة ليه بعد ما شفت على قناة الحياة الحكم بإعدام هشام طلعت مصطفى ومحسن السكرى مع انى متابعتش قصتهم اوى غير ان ورا كل دة حب اعمى
افتكرت
نسرين
نسرين دى كانت بنت أبلة الرسم بتاعتنا وانا كنت لسة فى ابتدائى
من يومها وهى بنت جميلة ومعروفة بجمالها فى الحى كله ويمكن الأحياء المجاورة كمان
كنا ساكنيين بعدهم بكام شارع كدة بس كنا عارفينها وبنمشى نشاور عليها بنت الابلة اهيه
دة انا حتى مش فاكرة اسم الأبلة (مامتها)

فاتت أيام كتيرة وبقيت انا فى الجامعة بس عزلنا وروحنا بيت تانى فى نفس الحى
وفى يوم
كنا فى رمضان الصبح الساعة 10

اتفاجئت بصراخ وصويت فزعنى
جريت على البلكونة لقيت الناس ملمومة حوالين تاكسى وبياخدوا واحدة من جوة
ويدخلوها الفيلا اللى قصادنا
لفت نظرى انها حافية ولفينها بحاجة
و واحد من الواقفين بيسأل : هى دى نسرين ؟؟؟
والجيران عمالين يندهوا : هاتوا ملاية هاتوا ملاية ....
وانا واقفة متسمرة ومذهولة
الجيران بيزعقوا : اتصلوا بالإسعاف بسرعة

جت الإسعاف ولكن بعد ساعة ونص من الحادثة يعنى الساعة 11 ونص
جت الإسعاف وخدت نسرين وراحت بيها المستشفى الله اعلم وصلت امتى

بعدها بئا عرفنا ان نسرين كانت مخطوبة لواحد وبعدين سابته
الواحد دة هددها وقالها لو مرجعناش لبعض تانى انا هحرقلك وشك

نسرين فكرته كلام وخلاص
لكن المجرم جاب إزازة وحط فيها مية نار وعليها مادة الزئبق
ورماها عليها وهى راكبة التاكسى هى وجدتها وكان التاكسى بيطلع من الشارع فطبعا ماشى بهدوء
وطبعا مية النار قامت بالواجب
كانت لابسة سلسلة دهب ساحت وهى قاعدة تصوت من الألم
طبعا هدومها بجلدها كله اختفت معالمه
قامت تجرى من التاكسى
رمت نفسها على السواق لما لقيت نفسها مكشوفة كأنها بتسخبى فيه
جابولها ملاية لفوها فيها ودخلوها الفيلا
وفضلوا يكبوا عليها مية لغاية لما الاسعاف شرف

راحت نسرين المستشفى
الدكاترة كلهم اجمعوا على ان الزئبق اللى اتحط على مية النار خلى الحروق تبئا عميقة
حروقها كانت من الدرجة التالتة
كان كل اللى يزورها يرجع يقول ادعولها
مفهمناش كلامهم غير بعد ماجابوا حالتها فى التليفزيون وشوفنا شكلها اللى معدش له شكل

أخوها حلف لينتقم من اللى عمل كدة فى اخته الوحيدة
زينة بنات الحى

اشتد الالم بنسرين
الدكاترة قالوا حالتها خطيرة ( واحنا عملنا الى علينا ) الزئبق لما بينضاف على مية النار بيخلى المفعول أسرع وأعمق

وأخيرا ... نسرين سلمت روحها لخالقها بعد ما طلبت من أخوها انه يديها حقنة هوا لأنها مش قادرة تتحمل الألم

الله يرحمك يا نسرين

هناك 43 تعليقًا:

الشعب لابد له من حكومه تشكمه يقول...

مممممممممم جالى اكتئاب:(
دا مش حب اللى يحب حد عمره ميهون عليه يأذيه ابداااااااا.
دا ممكن نسميه فى الحالتين اللى قولتى عليهم حب تملك مش اكتر,او مش انا اللى اتساب.
ربنا يرحمها بجد كان عندى امل فى الاخر الاقيها كويسه واتعالجت بعمليات تجميل لكن لما قولتى ماتت قلت اهى ارتاحت ولما قلتى انها اخدت حقنة هوا زعلت اكتر.
ربنا يرحمها ويغفرلها ويتجاوز عن سيئاتها هى وموتى المسلين جميعا,
بس سؤال ممكن اعرف البيه المحترم اللى عمل العمله دى فين دلوقتى ومصيره كان ايه؟

E73 يقول...

تاني تعلييييييق

ثواني هقرا واجي

E73 يقول...

لاحول ولا قوة الا بالله العلي العظيم

مش عارفة ينفع اقول الله يرحمها؟!

الله يصبر اهلها

وربنا ينتقم من اللي كان السبب

حسبي الله ونعم الوكيل

فعلا الجمال سلاح ذو حدين

ربنا يعافينا ويعفو عنا يا رب

Sweet Violet يقول...

الانسان اللى بيفكر كده بيكون اصلا مريض مش انسان سوى يعنى
اى نعم بيحب لكن بطريقته
لا اله الا الله
وجعتينى على الصبح يانونا v_v

عمرو يقول...

آآآآآآآآه يا وجع قلبى !!

من أجل التمكين يقول...

ربنا يرحمها

و ان شاء الله هيكون تكفير ليه عن ذنوبها


بس اكدي العيب مش فيها

و بالنسبة للقاتل :

ربنا يمهل و لا يهمل

بارك الله فيكم

-

Ahmed يقول...

ربنا يرحمها ان شاء الله

بس في القصه المأسوية ديه ملهاش علاقه بالحب الأعمى

ده اجرام اعمى

لو صحيح كان فيه حب, عمره مايفكر يعمل كده
ده حاجه تانيه مرضيه ممكن تكون جنون, حب تملك, لكن مستحيل يكون حب

صوت من مصر يقول...

ممكن سؤال
هو اخوها اداها حقنه ايه
وكده تبقى منتحره
ده الى فهمته فى الاخر
لكن هى قصه تصعب على احد
والله يكون فى عون اهلها

ديالا يقول...

الله يرحمها بجد قلبي وجعني عليها اوي
بس الي يعمل كده مبيحبش ده يبقي مجنون

تقبلي مروري

AHMED SAMIR يقول...

يا سااااااااااااااااااااااااتر
بجد حرااااام
ايه المأساة دي على الصبح
الله يرحمها و ينتقم من المجرم دة

Me7'o يقول...

يا ساتر يا رب
إيه الإجرام ده
ربنا يرحمها
بس متهيألى هى غلطانة علشان أختارت إنها تتخطب لواحد ممكن يفكر بالأسلوب ده

وبعدين ده مش حب ده حقد وغل وكراهية كمان

اللهم احفظنا يا رب

اعشق فى الليل ضوء القمر يقول...

يا ستير يا رب

إيه الجهود و موتن القلب إللى يخليه يعمل كده
قدر قلبه إزاى يأزى إنسان بعيد عن أى مشاكل أو وصف
انا مش عارف من يقتلون و يسببون مشاكل مثل تلك أين قلبهم وخوفهم

Unknown يقول...

حسبى الله و نعم الوكيل
!!!

القصة صعبة قوى
ربنا يعافينا جميعاً

مامة مازن يقول...

يا حبيبتى يا حبيبتى يا حبيبتى
هو الناس اتجننت كده ليه يا نهار .... استغفر الله العظيم
هو ده حب لا لايمكن احب حد وااذيه ابدا
الله يردهوله فى نار جهنم ان شاء الله

مامة مازن يقول...

الغريبة يا نونا بتجيبى حاجات غريبة بس حقيقية مش خيالات يعنى ولا خرافة

بلاش فضايح يقول...

شيما

هى قصة تجيب الاكتئاب فعلا
امال انا اللى عاصرتها اعمل ايه بس

اما عن الولد اللى قتلها انا حاولت كتير اعرف اى حاجة عنه بس موصلتش لحاجة لاننا سبنا البيت دة ونقلنا فى آخر الدنيا

نورتينى يا قمر

بلاش فضايح يقول...

E73

عندك حق
ساعات الجمال بيكون نقمة مش نعمة

ربنا يرحمها وينتقم من المجرمين

شكرا ليكى يا قمر

بلاش فضايح يقول...

ضد التيار

هو اكيد مريض ومجنون لانه لو عاقل هيخاف حتى على نفسه انه يتسجن ولا حد يمسكه

شكرا ليكى يا سكر

بلاش فضايح يقول...

أستاذ عمرو

سلامة قلبك
معلش بئا قصة نكد على الصبح

نورتنى

بلاش فضايح يقول...

من أجل التمكين

أكيد طبعا ربنا يمهل ولا يهمل

ربنا يغفرلها ويرحمها

شكرا للمرور

بلاش فضايح يقول...

أحمد ابو العلا

فعلا انا قولت بردو دة مجنون وعقله مش فى حالته الطبيعية مفيش حد يعمل كدة فى بشر

يعنى هشام طلعت مصطفى هو كمان مش فى حالته الطبيعية؟؟؟

شكرا ليك يا احمد

Kiara يقول...

ياااااااااااااااه

انا قلبي اتوجع

حسبي الله ونعم الوكيل :(

بلاش فضايح يقول...

كيمو

اخوها اداها حقنة هوا
معروف ان حقنة الهوا بتموت

انا نفسى تساءلت كتير هل كدة هى تبئا منتحرة؟؟

انا بصراحة معنديش اجابة
اكيد مخلهاش تعمل كدة غير الألم واليأس

يمكن ربنا يسامحها لأنه الوحيد العالم بنيتها

شكرا على مرورك يا كيمو

بلاش فضايح يقول...

ديالا

فعلا كلنا اجمعنا على انه مجنون

شكرا ليكى يا قمر

بلاش فضايح يقول...

A.SAMIR

هى مأساة فعلا
معلش بئا علشان شوية نكد على الصبح كدة الواحد يبدأ بيهم يومه
هههههههههه

شكرا للمرور

بلاش فضايح يقول...

ميخو

مهى سابته
ويمكن تكون سابته علشان تفكيره المريض

الله اعلم بيهم

شكرا للمرور

بلاش فضايح يقول...

اعشق فى الليل ضوء القمر

الناس اللى زيه لا عندهم قلب ولا عقل ولا دين ولا خوف من الله ولا اى حاجة

ربنا يرحمها ويرحمنا

شكرا ليك

بلاش فضايح يقول...

بدراوى

امال انا اللى شوفت كل حاجة اعمل ايه

ربنا يرحم الجميع

شكرا للمرور

بلاش فضايح يقول...

مامة مازن
ازيك

هو تقريبا دة مش زيادة حب
دة زيادة كره

محدش بيحب حد يعمل فيه كدة

بالنسبة لمواضيعى ربنا يعلم انها حقيقة والله وحصلت كلها بالفعل

الدنيا ياما فيها يا مامة مازن

شكرا ليكى يا قمر

بلاش فضايح يقول...

كيارا

اه والله
حسبى الله ونعم الوكيل فيه بجد

ادعيلها بالرحمة

شكرا لمرورك يا قمر

بسنت صلاح الدين يقول...

الله يرحمها و حسبى الله ونعم الوكيل فى المجرم،بس انا ميتهايأليش ان ده حب ده حب امتلاك ،الحب عمره مايتحول لكره بالشكل الفظيع ده ،اللى بيحب حد صحيح بيبقى متألم انه بعد عنه لكن عمره ماينتقم بالقسوه دى ،ده مريض نفسى،ربنا يصبر اهلها

Unknown يقول...

بصراحة
انا مش عارف اقول ايه
انا نفسي حاسس اني عاوز انتقم ليها
ده مش حب ابدا
محدش يقدر يأذي حد بيحبه بقصد

ادم المصرى يقول...

حسبى الله ونعم الوكيل اخطاء يتحملها الاخرين

yoyo يقول...

لا يا حبيبتى والله دا مش حب ابدا
عمر اللى بيحب ما يقدر يأذى ابدا حبيبه مهما كان الوضع او الظروف

دا مجرم و يستحق العقاب
احيانا بيكون الجمال نقمة على صاحبه
ربنا يرحمها يارب و يسكنها فسيح جناته و يغفر لها اللهم آآآمين

ربنا يرحمنا يارب ويستر علينا
دمتى اختى بالف خير
تحياتى
يويو

غير معرف يقول...

لا حول الله يا رب
بس ده موش حب ...... ده حب تملك وانانيه وجنون
ربنا يرحم الجميع

Mysara يقول...

لا تعليق

إنا لله وإنا إليه راجعون

mahasen saber يقول...

لا حول ولاا قوة الا بالله

ده با نونا من الغباء البشرى والجشع الانسانى ما قتل
ربنا ينتقم منه
وده لو مخدش عقاب بمثل ما فعل يبقى حق البنت دى راح هدر
حسبى الله ونعم الوكيل

mahasen saber يقول...

انا حزبنه عليها وحزينه على كل نسرين بيروح حقها هدر
وبتروح ضحية راجل اعمى

حسبى الله ونعم الوكيل

mohamed ghalia يقول...

الله يرحمها ويسكنها فسيح جناته

جحا المصرى يقول...

الله يرحمها
أكيد مش ذنبها إنها جميلة

فشكووول يقول...

نونا الجميله .. تحياتى
انا اسف على التاخير
بس القصه دى بجد يا نونا
وبجد الحكايه مش تأليف ولا قصه يعنى
انت خلتينى قاعد مغموم ومتكدر عشان نسرين الجميله الله يرحمها
اصل يانونا حياتنا اقدار .. ومن الاقتدار ما قتل ومن الاقدار ما أحيا
كان جمالها وبالا عليها مع ان الجمال المفروض ان يضيف الى الانسان .. ولكنه خصم منها حياتها
رحم الله نسرين

اعشق فى الليل ضوء القمر يقول...

السلام عليكم

ليكى تاج عندى إتفضلى و إستلميه

Mo2M3N-MiLo يقول...

نونا احب اقوللك على حاجه بجد حب ب جنون انا اساسا بحب حبيبتى ب بجنون حته بعد ما سيبته بس عمرى ما افكر انى اروح امووته
عشان هى ااساسا روحى فى حد يموت روحه
اه ممكن ازعل اه ممكن ادمر
بس اللى عمل كده مش بيحب نسرين
بجد والله انا لو الشخص ده قدامى
هخليه عبره للكل الناس
و ثوابى عند ربنا حته لو هيحاصل فيه ايه عشان انا كده كده مش منتظر حاجه من دنيتى