الجمعة، 17 أبريل 2009

مفروسة ... ومش لاقية عنوان مناسب

الامتحانات قربت كل سنة وانتوا طيبين بئا
وانا بحط فى الامتحانات بتاعة آخر السنة رجعت بيا الأيام للإمتحانات والمراقبة أيام ميعلم بيها الا ربنا بنبئا مش عايزينها تييجى من كتر القرف اللى بنشوفه فيها
المهم من ضمن الحاجات اللى افتكرتها فى الامتحانات 3 مواقف حصلوا قدامى مع 3 دكاترة مختلفين
المرة الأولى وأنا باراقب كان معايا لجنة لقيت دكتور المادة جاى ينبه البنات فى كل اللجان ان اللى مشترتش الكتاب مش هتنجح ولو عايزة تنجح تيجى بعد اللجنة تشترى الكتاب
أنا كنت فى ذهول والبنات قعدوا يعيطوا بعد مامشى وقالولى طيب نعمل ايه نروح طالما هنسقط نمشى ولا ايه؟
قولتلهم لأ حلوا انتوا بس واهدوا خالص هو ميقدرش يعمل حاجة طول مالورقة محلولة وصحيحة مينفعش يسقطكوا
وأخيرا اتفقوا البنات على انهم هيروحوا بعد اللجنة يدفعوا تمن الكتاب اللى امتحنوه خلاص واللى مش معاها هتستأذنه تبئا تيجى تدفع بكرة..........................................................
الموقف التانى بئا وانا بردو براقب فى لجنة امتحان حاكم الامتحانات دى بيحصل فيها البدع وكنت براقب على الفرقة اللى كنت بدرسلها ..
المهم ان دكتور المادة جه بردو بيتمم على الطالبات ويشوف الأسئلة وهو معدى لقى كتابه متصور ومرمى جنب السور فراح ماسكه ومزعق وقال :
مين صاحبة التصوير دة اللى صورت الكتاب ؟ وإلا هسقط اللجنة كلها.
طبعا صاحبة الكتاب نامت فى الخط والبنات خافت راح الدكتور قاللى:
أنا هلف على باقى اللجان وانتى اعرفيلى مين اللى صورته ..
وكالعادة البنات اترعبوا لأن اللجنة كلها هتسقط بسببها فكل بنت شاكة فى واحدة تندهلى وتشاورلى عليها ..
أنا قولتلهم:
اياكوا واحدة تعترف على زميلتها حتى لو متأكدة انها هى وإلا انا بئا اللى هسقطكوا ( طبعا بخوفهم بس انما انا بينى وبينهم ربنا)
ايه يعنى لما واحدة من 1000 واحدة صورت الكتاب؟
قالولى:
بس دة هيسقطنا
قولتلهم :
متخافوش ميقدرش يسقط واحدة حلت كويس
قعدوا يحلوا وربنا هداهم وسكتوا .. بعد شوية لقيت الدكتور جاى يقولى:
ها عرفتى مين البنت ؟ ( مع انى عارفاها طبعا لأنى انا اللى قايلاها طلعى كتابك بره وشفتها)
قولتله:
يا دكتور أنا كتابى كله اتصور وخسرت فيه وعادى يعنى ..
قالى:
لأ دة غش ولو ماقلوش على زميلتهم أنا هسقطهم كلهم أنا معايا أبحاثهم وهدور و هعرف مين اللى معملتش البحث هتبئا هى صاحبة الكتاب المتصور..
البنات سمعوا كدة قعدوا يقولوا ذنبنا احنا ايه قالهم ذنبكوا انكوا عارفين هى مين ومش عايزين تقولوا..
وأخيرا حاولت أقنعهم بقدر استطاعتى انهم مينطقوش بكلمة على زميلتهم لكن الظاهر ان مفيش فايدة ( بنات خوافة بئا)
كلاكيت تالت مرة..
وانا براقب فى لجنة بردو جه دكتور المادة كالعادة بردو وقالهم :
يابنات السؤال الأخير دة سؤال البحث وانتوا بقى فاهمين الباقى هه
( يعنى اللى معملتش البحث اللى فى الكتاب تبئا مشترتوش يبئا مش هتعرف تحل وبالتالى هتسقط)
المصيبة التقيلة فى كل القصص دى هى ( المجاهرة بالجشع و قلة الضمير) يعنى الدكتور مش مكسوف من ربنا ولا من اللى واقفين حواليه ولا من نفسه لما يجبر بنت على شرا الكتاب ولو بعد الامتحان ميخلص
جوايا كلام كتير من غيظى مش عارفه اصيغه واكتبه
( لا حول ولا قوة الا بالله)
(....الذين إذا أصابتهم مصيبة قالوا انا لله وانا اليه راجعون)

هناك 54 تعليقًا:

هانى زينهم يقول...

تصدقى زمان موضوع زى ده كان ممكن يخلى الواحد يستعجب جدا ويقول ايه اللى حصل فى الدنيا وممكن لو حد مسئول عرف يقلب الدنيا انما دلوقتى عادى جدا المجاهرة بالجشع بقت زى المجاهرة بالذنب . عاااادى !! اى نعم دى كارثة أخلاقية وانسانية انما ما دام بتحصل يبقى عادى .

جنّي يقول...

السلام عليكم

علشان كدا جامعاتنا في مقدمة ترتيب جامعات العالم .. شر البلية ما يضحك

Unknown يقول...

السلام عليكم ورحمة
الله تعالى وبركاته
عارفة المثل اللى بيقولك
(اذا لم تستحى فاصنع ما شئت)
ولكن يظهران(الكل)بقى (لا تستحى)!
الواحد بيحمد ربنا انه اتعلم فى زمن أخر تماما ليس فيه شىء من هذا اطلاقاً

شمس النهار يقول...

بس ده مايمنعش ان في اساتذه عظام الواحد يتذكرهم بكل فخر اما القله دي بتذهب في مزبلة تاريخ الجامعات ونادرا ماتلاقي طالب يتذكره بالخير او الشر اصلا

بلاش فضايح يقول...

أستاذ هانى...
والله انا لسة لحد دلوقت بستعجب مع ان على رأيك الحاجات دى كانت غريبة زمان انما دلوقت بقت عادى
بس انا لسة بعد السن دة بستعجب على المواقف اللى بتحصل وبقف قدامها مسبهلة

بلاش فضايح يقول...

جنى...
عمرنا مهنفلح بالشكل دة
سيرة التعليم فى مصر بقت على كل لسان

غير معرف يقول...

من غير تجريح

هو دا العادي

كلنا كنا طلبة وكلنا اشترينا الكتب عافية

ومواد كتير نجحنا من غير ما نذاكر ومواد زاكرنا واتهارينا والمقبول كان حليف رحلة البحث عن امتياز ياسادة


دي مش فضيحة دا العادي في مصر

بلاش فضايح يقول...

norahaty...
مع انا اتعلمت ايام الذل دة
دة البنات اللى مشترتش الكتاب بتشيل السنة
وياما قصص
حسبى الله ونعم الوكيل

بلاش فضايح يقول...

شمس النهار...
هو آه فى دكاترة كويسين بس يمكن دة كان زمان انما دلوقتى هما نادرين جدا جدا جدا الفئة اللى ظاهرة كلها سيئة

بلاش فضايح يقول...

afew good men ...

اه دة العادى بس انا مستغربة من ان وصل الحال بالناس إنها تجاهر بالمعصية وقلة الضمير وعادى تلاقى الدكتور واقف بيبتسم كدة وهو بيتكلم مش مكسوف يعنى ولا حتى بيدارى جشعه قدام الناس
والمصيبة ان البنات بتسقط فعلا
يعنى لو بنات فقيرة تشحت بئا او تسرق علشان تخلص السنين اللى مش معدية دى

Magi Mostafa يقول...

ده العادى كان فى دكتور عند ناس اصحابى يدخل يكتب على البلاك بورد من يشترى الكتاب سينجح من لم يشترى الكتاب لن ينجح بس بالانجليزى لانهم اداب انجلش
ربنا يستر الى جاى بعد كده

بلاش فضايح يقول...

magi
يانهار ابيض
دى زيادة والله
زيادة اوى
الناس معدتش بتتكسف

Unknown يقول...

السلام عليكم ورحمة
الله تعالى وبركاته
اسمحي لى اضيف
عليكِ مش بس
مابقت تتكسف
لأ ما بقت تخاف ولا تختشى!
ليس هناك من رادع ولا
وازع من دين او من قانون

بلاش فضايح يقول...

norahaty
والله مانا عارفة أقول ايه
غير اللهم لا تؤاخذنا بما فعل السفهاء منا

غير معرف يقول...

هؤلاء فئة معدومة الضمير وهم من الذين دخلوا الجامعة من الأبواب الخلفية فى غفلة من الزمن والأدهى من ذلك أن بعضهم وصلت به الدرجة إلى التسول من الطلبة تحت أسلوب الضغط والتهديد .. وهذا رد فعل طبيعى لما نحن فيه من ترد وسقوط وانهيار قيمى وأخلاقى ..وحسبنا الله ونعم الوكيل

Soul.o0o.Whisper يقول...

فى مثل بيقول " إذا لم تستحِ فأصنع ما شئت "

ز بصراحة ماعنديش تعليق غير
ربنا يهدى



دمتى بود

yoyo يقول...

مش شايفة حاجة غريبة والله انا عشت الوضع دا
واعتقد انه منتشر بقى حقيقة كدا
بقى الجشع و قلة الضمير والربح المادى مهما كانت الظروف هى الاساس
ربنا يهدى والله
بس بجد بيصعب علىالواحد لما بيكون عمل اللى عليه واخلص فى دراسة المادة وتجى حاجة زى دى تضيع كله مجهوده

تحياتى
يويو

بلاش فضايح يقول...

غير معرف ....

هى فعلا فئة معدومة الضمير تماما بس هما كتير دول بقوا أغلبية يعنى دلوقت الشرفاء والمحترمين بقوا شواذ القاعدة

بلاش فضايح يقول...

Soul.o0o.Whisper ...

يارب يهديهم ويهدينا جميعا

تحياتى

بلاش فضايح يقول...

يويو ....

على الرغم من أنهم ممكن تكون الظروف دى مرت عليهم قبل كدة
وومكنيكونوا اتغصبوا على الكتب دى قبل كدة بس محدش بيعتبر

بلاش فضايح يقول...

انا أعرف واحد بيشتغل فى الكلية موظف وذاكر وخد الماجستير والدكتزراه ومستنى تعيين فى اى جامعة
ومن أول أهدافه ان الكتاب هيكون ب 60 جنيه واللى مش هيشترى الكتاب هيسقط

ولما بقوله ليه حرام عليك مانت شايف الوضع قدامك قال لا اشمعنى انا؟

طيب وبنات وولاد الناس يرحوا منكوا فين يا ظلمة

عالم ماريونت يقول...

هي مش بس حاجة تفرس وتشل
هي حاجة تحبط
احنا اصلا معدش عندنا تعليم عشان يبقى عندنا كتب

انا اتشرف اني خريجة كلية مكنش فيها كتب اساسا وكنا بنعتمد على المقالات الاجنبية والمراجع وحتى لما كان بيبقى في كتب محدش كان بيقدر يفرضها علينا ده غير ان سعر الكتاب كان بيبقى 10جنيه بحد اقصى

انا خريجة ألسن...ايوة كان فيها عيوب كتير بس هي ارحم من غيرها
واوكتر حاجة توجع في موضوعك هي البجاحة اللي الناس دي فيها

حسبنا الله ونعم الوكيل
رنا

بلاش فضايح يقول...

رنا..
هو دة اللى انا بتكلم عليه ان الغلط بئا عادى والناس بتعمله عادى وتقوله عادى

اه كل كلية فيها الحلو والوحش بس انا نفسى اعرف ... ليه الوحش؟
ليه ميكونش كله حلو لأن دة تعليم

hasona يقول...

السلام عليكم

هو الاهمال والتخلف والاستغلال وصل لهذا الحد

لم يعد التعليم أو مستوي التحصيل لدي الطالب هو المشكلة
انما المشكلة في شراء الكتاب أو تحقيق مكسب مادي من وراء الطالب بكافة السبل المشروعة والغير

أصبحنا في كل مكان ومجال نهتم بالماديات علي حساب كل شئ
وملئ قلوبنا الجشع
لذلك نهان في كل مكان
،،،
تحياتي لكلماتك
ومواقفك

بلاش فضايح يقول...

hasona....
فعلا التعليم بئا آخر حاجة
آخر حاجة الاهتمام بتعليم الطلاب وتوصيل المعلومة علشان يكون فى شباب يحمى مصر بعلمه
انما فين دى
تقريبا خطة علشان لما مستوى التعليم يبوظ ميبئاش فى حد فاهم حاجة وبالتالى ميبئاش فى معارضة

بلاش فضايح يقول...

hasona >>
انا حاولت ادخل المدونة بتاعتك بس معرفتش لانك تقريبا مش فاتحها للكل

شكرا ليك

مامة مازن يقول...

السلام عليكم ورحمة الله
نونا رجعتينا سنين ورا
ايام الجامعة وافترا بعض الدكاترة
وفكرتينى كمان بدكاترة حلوة وفاهمة وتحبى تحضرى محاضرتهم ولو حتى 7 الصبح
ربنا يهدى المفترى ويرحم المحترم منهم عايش او ميت

بلاش فضايح يقول...

مامة مازن...
الافترى بتاع الدكاترة دة موجود من زمان بس انا بيتهيألى زمان كان مدارى شوية
وكانوا شوية بيتكسفوا
مع انى افتكر ان ماما حكتلى مرة على دكتور خلاهم يشتروا المذكرة مرتين علشان المدام عايزة تغير العربية

؟؟؟؟؟؟؟؟؟؟؟؟؟؟؟؟؟؟؟؟

Unknown يقول...

ياااااااه ، ولله ما "يشيل" الا الشاطر
دا فى زمنا دا بقى

تحياتى

hasona يقول...

السلام عليكم

Nona

حبيت أنوه أني لست مدون ولا أملك مدونة
لكني أحب القراءة
لذلك أتابع القراءة الحية (المدونات ) من آن لأخر
واذا حبيت أن أضيف تعليق-أكتب اميلي(علي جوجل) واكتب ما يجول بخاطري وأرسله

والمفاجأة أني ما أعرفش مين حسونة اللي بيظهر ده-لأن أسمي محمد
احتمال أكبر انه عيب من الموقع نفسه
مع ذلك وجدت انها لن تفرق كثيرا

تحت أي أسم
،،،
شكرا لك كتير
لكن علي الاقل عرفت انك زورتيني وانا ماكنتش موجود-الباب مفتوح دائما

المحاولة لا تندرج تحت جناحي النجاح أو الفشل -لكنها تعني الاصرار والامل

بصراحة مافيش وقت لأكون صاحب مدونة ودي مسئولية كبيرة

وفي نفس الوقت مش أحب أنافق أحدا أو حد يجاملني أو يهاجمني والتاجات اللي رايحة جاية دي

ما أقوله من القلب الي القلب

وسأُتابع قدر الامكان

بأعتبر نفسي عابر سبيل



تحياتي لك وشكرا

هذه رسالة مسجلة
هذا تعليق مكرر

مامة مازن يقول...

مش ممكن علشان تغير العربية وكان صريح معاهم وقالهم ايه الرجولة دى
على العموم اللى بقولك عليه ده من اكتر من 10 سنين يعنى مش بعيد قوى
دا احنا شوفنا ناس
يا اما فعلا يستحق لقب دكتور جامعى
يا امايستحق لقب.......
يلا بقى ملوش لزوم
شكرا جزيلا لزيارتك واوعدك اكمل قراءة مدونتك ولو لقيتى وقت ابقى زورى مدونتى
ربنا يوفقك

بلاش فضايح يقول...

اسلام ديو...
انت صح والله زمان كان ميقع الا الشاطر دلوقت ميشيل الا الشاطر هههههههههههههههههههههه

على فكرةمدونتك حلوة
تحياتى

بلاش فضايح يقول...

أخ محمد....
يعنى مش هتيجى على الاسم لما النت يغيره
كل حاجة فى الدنيا ملخبطة مش هتقف على الاسامى
----------------
مش معنى انك تعمل مدونة يبئا لازم تنافق حد أو حد ينافقك لأن ميزة المدونات الحرية التامة
الشئ اللى عاوز ترد عليه رد مش عاوز مفيش مشاكل مش لازم تجامل حد بكلام انت مش عايز تقوله
المدونات دى بنستخدمها علشان نعبر بيها عن كل اللى جوانا سواء حلو أو وحش كنوع من الفضفضة مع ناس تفكيرها راقى

عادى الحاجة اللى متعجبكش سيبها
الموضوع سهل خالص


عموما انا اتشرف بمرورك عندى من آن لآخر

شكرا ليك جدا

بلاش فضايح يقول...

مامة مازن ...
أنا اللى بشكرك على زيارتك مدونتى وان شاء الله بقدر الإمكان هزورك كتير ..

شكرا ليكى

رؤية يقول...

الواحد بيتكسفلهم بس هم ما بيتكسفوش
احيانا الطلبة بتبقى ظروفهم المادية سيئة.. بس هانقول ايه..
ولا حاجة

وكفاية فضايح


تحياتى

نـــــور يقول...

انا لله وانا اليه راجعون

تعرفى انا مستغربه رغم انى شفت فى الكليه عندنا مصيبتين زى دول بس برضو الدكتور ده بجح اوى اوى

المصيبتين اللى شفتهم تعبوا قلبى خصوصا اننا متعودين ان دكاترتنا فى القسم عنيهم مليانه وكلهم اصحاب شركات او استشاريين فى شركات كبيره
وغالبا لان مذاكرتنا من مراجع بيجيبولنا المراجع ويقولولنا صوروها الا دكتور واحد حقير -عنده محلين دهب- هدد ناس فى المكتب انهم مايشتروش الكتاب وان احنا مش لازمينه بس كلنا عارفين انه اخلاقه منحطه اساسا

ولا معيد تانى كتب اسماء زمايلنا معاه فى الكورس مخصوص بحجه انه هيظطلهم مشروع الماده مع انه لو شرح كويس فى السكشن مش هنحتاج كورس ولا نيله وهو سيرته معروفه انه ممكن يأذى اى حد لان دكتور الماده مسلمله دقنه!!
تفتكرى انا رحت اخدت الكورس؟
وحياتك ابدا برضو مارحتش وكل شويه مطلعه عين امه يابشمهندس كذا
يابشمهندس اعمل كذا ازاى
يابشمهندس اعملى مش عارف ايه :)

اخباراتك ايه؟
ميرسى جدا على هديه عيد ميلادى

الازهرى يقول...

ممكن يكون العنوان
تجبر الاساتذة بسبب ضعف الطلبة

للاسف النمذج كثيرة وربما اكثر مما نتصور

وحتى المعيدين الصغار الان اصبحت القوة فى ايديهم يستخدمونهابشكل غريب وغير مبرر

تحياتى دوما

بلاش فضايح يقول...

رؤية
مهى المشكلة فى الطلبة اللى ظروفهم صعبة لأن المقتدرين هيدفعوا ويدعوا وخلاص
انما اللى مش قادرين يدفعوا هيدعوا لما يجيبوا أجل الدكاترة دى

بس يستاهلوا الدعاوى دى

بلاش فضايح يقول...

نور...
القصص كتير والله يابنتى
وقلة الضمير بقت يا مكترها

والقصص اللى حكتيها دى مهى مصيبة من مصايب الزمن بردو

بلاش فضايح يقول...

الأزهرى..
الطلبة ضعفهم فى انهم روحهم فى إيد الدكاترة
والدكاترة بستخدم دة ضد الطلبة عارفين انهم مش بإيديهم ولا حيلة

والمعيد عارف نفسه دكتور المستقبل لازم يفترى هو كمان اشمعنى هو يعنى جت عليه
؟؟؟

Unknown يقول...

دكتورة
Nona

متأخذنيش دول دكاترة مفيش ضمير
دكاترة سايكوووه بجد
انا اسف
يعنى اصل انا برده كنت فى كلية و دوقت شوية من الدكاترة

مرة دخلت لدكتور امتحان شفوى و هو اصلاً دكتور مشكلة لوحده
المهم سألنى فى جزء فى الكتاب فى فصل معين
قولتله الجزء ده مش مفهوم
ليه و ليه بقى سألتك
قاللى انت اللى مخك قافل
يعنى ايه مش مفهوم
يعنى تحسى كأنه غلطت فى كتابه مثلاً
يعنى ايه مش مفهوم كتابى
بعدها قولت لدكتور ثانى شاب صغير
فى الأربعينات كدة
قاللى معلش هماه الدكاترة الكبار بيبقوا كدة معلش
---
فيه دكتور ثانى طالبة إتأخر زى ثلث ساعة عن الإمتحان
ليه بقى
قالها منتيش داخلة الإمتحان
و ده تسيب و لبشلنا جو اللجنة
و اعد يزعق على الفاضى و فى الأخر الدكاترة المساعدين او الاساتذة اصح
هدوه و البنت دخلت الإمتحان
---
مش ممكن يعنى اللى حاصل ده
----
بخصوص مدونة بلال فضل
لأ انا اللى عامل المدونة
و أستاذ بلال مالوش دعوة بيها
ديه مبادرة من محبى بلال فضل
عشان الناس اللى مش بتوصلها الإصطباحة
---
شكراً على اضافتك مدونتى فى رول المدونات
و قمت بإضافة مدونتك منذ دقائق
و ان شاء الله اتابع مدونتك
و شكراً لتعليقك فى مدونتى
و ابقى زورونا
:-)

prince4ever يقول...

ياااااااه
معدش في ضمير ولا اخلاق للدرجه دي
لا الحمد لله الكلام ده مبيحصلش عندنا في طب...اصله كده كده بالغصب بنجيب الكتاب بتاعهم اول كام سنه عشان العملي...انما بعد كده بنجيب اي كتاب احنا عايزينه ان شا الله يكون هندي..المهم نذاكر
بس تحياتي لأهل الزقازيق التمام
بلدياتك رامي
قصاصة ورق
سلام

mahasen saber يقول...

لا لا لا يا طالع سلم المجد بصاروخ
افتكر البشر اليى تحت هههههههههههههه

mahasen saber يقول...

لا لا لا يا طالع سلم المجد بصاروخ
افتكر البشر اليى تحت هههههههههههههه

mahasen saber يقول...

طبعا انا بغيب عنك وانتى عارفه كويس جدا واكتر منى الظروف

وبعدين ده بلوجى ادخل اطلع اجى مجيش بتاعى
اصلى صاحبة مطرح ههههههههههه

بفكر اخد منك انا ودعاء الباسوورد اصل البلوج ده شكله كده بيهدد مستقبلنا

mahasen saber يقول...

انا معلقتش على الموضوع لاننا اتكلمنا فيه اعتقد ولاا متكلمناش

سيبك انتى اغنية وستلايف تحفه تحفه يا مضروبه انا بموت فى سوليداد
عبيطة مين اليى تسيب العيال الحلوه دى

صوت من مصر يقول...

والله العنوان المناسب بلطجه التعليم ؟؟؟؟؟؟؟؟
واشكرك بشده على نزاهتك
والاهم هو الفقر انعدم ولا الرحمه

بلاش فضايح يقول...

بدراوى ...
فى دكاترة كتير بعافية شوية تقريبا فاكرين علشان بقوا دكاترة يبئا اللى أقل من دكتور لازم ياخد على دماغه بغض النظر عن العلملية التعليمية اللى معدش ليها أثر ؟؟؟

على فكرة المدونتين اللى انت عاملهم حلوين فعلا علشان كدة انا ضفتهم عندى

وشكرا لمرورك جدا

بلاش فضايح يقول...

بدراوى ...

شكرا على اضافتك لمدونتى عندك

بلاش فضايح يقول...

prince4ever ...

رامى ابن بلدى يا مرحبا يا مرحبا
أنا حاسة كدة ان احنا الزقازيقية هنحتل النت عن قريب ههههههههههههههههههه

نورت مدونتى

أما عن طب بئا طالما بتشترى الكاتب هتبئا منصور يابنى ان شاء الله

بلاش فضايح يقول...

محااااااااااااسن..
تاج راسى منورانى
مانتى طالعة على سلم المجد بسرعة الصاروخ بس حاسبى من السلمة المكسورة هههههههههههههههههههههههه

أنا قولتلك من الأول خافى منى
ههههههههههههههههههههههههههههه

وحشانى من اول امبارح فينك

بلاش فضايح يقول...

بلطجة التعليم عنوان رائع يوصف الوضع تمام

شكرا ليك

ادم المصرى يقول...

الا من رحم الله وهذا بلاء نعيش بداخله

والله يكو ن فى عون المتضررين الاوائل

بلاش فضايح يقول...

آدم المصرى
ربنا يرحم الجميع آمين

شكرا لمرورك