الاثنين، 16 مارس 2009

الكلام والكلام اللى عكسه ......



عمرك كدة ماقابلك حد يفضل يقول حاجات عن نفسه وبعد فترة تكتشف انه العكس تماما؟؟؟
يعنى مثلا تلاقى واحد يقول :
انا صادق جدا فى كل حاجة وعمرررررى ماحب الكذب = يطلع اكبر كداب فى العالم
انا عمرى مكنت بخيل دة انا بيقولولى يا مسرف = يطلع جلدة
مثلا يقول انا راجل دة أنا أسد = يطلع أرنب كبييير
انا الناس كلها بتحبنى علشان معاملتى الحسنة معاهم = محدش طايقه وبيدعوا عليه ( يارب يموت)

وهكذا ...حاجة غريبة جدا ليه الناس بتعمل كدة مرض نفسى دة ولا ايه؟؟
طيب الواحد يصدق الشخصيات اللى بيقابلها ولا يكدبها؟ الى ان يبان العكس وتبان صحة أقواله
المشكلة فى الناس دى ان صحة كلامهم مبتبانش غير مع العشرة الطويلة
طيب لو عروسة ياعينى وعريسها قالها كدة وصدقته تعمل ايه بعد الجواز لما تكتشفه ؟؟
الصدق بئا معدوم مش حتى نادر الوجود

دة اختفى تماما
علشان كدة ربنا ورسوله بيأكدوا على أهمية الصدق
( ولايزال الرجل يكذب حتى يكتب عند الله كذابا)

ولما كل واحد عارف نفسه انه بخيل ولا كذاب ولا اى حاجة بيتكلم ليه ميسكت ويدارى على نفسه
يادى الفضايح
(اذ بليتم فاستتروا)


هناك 14 تعليقًا:

sebofy7alo يقول...

سيبو في حالو
للأسف الشديد كثيرا ما نقابل أشخاص ونجد الكلام وعكسة نتيجة أزدواجية المجتمع وتشتت أفكارة. مدونتك رائعة ولي تعقيب صغير جداا على الخط من حيث اللون والحجم.
سلام

غير معرف يقول...

شكرا جدا على مشاركتك
ومعلش سامحونى انا لسة جديدة
وبحاول اعمل تعديلات كتيرة
ومتشكرة جدا على تعقيبك على الخط واللون وسيتم تغييرهم

mahasen saber يقول...

الناس بتتشبه بالحرباء

وبقت على كل لون يا بتاستا

نونا مين بتاستا ده متعرفيش

برضه منور البلوجر يا قمر

mahasen saber يقول...

شيكو فى حاله

منور البلوج

فينك يا هندسه من زمان

عودا حميدا يا شريف ويا رب متغبش تانى عن البلوجر

barbie girl يقول...

صدقى بس لما تشوفى الحقيقةت فى المعاملة.. لان محدش هيجى يوصف نفسه ويقول الله انا بخيل وللا يا سلام عليا انا كداب.. صح

sebofy7alo يقول...

أيوة كدة تمام جدا

غير معرف يقول...

محاسن باشا
الباتستا والله اعلم هى ؟؟؟؟
انتى ادرى بئا
هههههههههههههههههه

بلاش فضايح يقول...

عندك حق يا باربى
بس اذا بليتم فاستتروا
يعنى لو هو عارف انه بخيل او كداب او غيره يسكت خالص
ميقولش انا العكس يعنى

شكرا للمرور يا سكر

عمك ياض يقول...

دي حاجه غريبه جدا في الناس اللي بتتجوز.. يافرحتك بنفسك انك قعدتي تقولي على نفسك خضرا الشريفه والملاك الطاهر و حور العين اللي نزلت من فوق و..و.. ولو اتخدع فيكي واتجوزك واكتشف انك واحده تانيه غير اللي كان فاكرها فتكون حياتكم نكد.. لانه متجوزكيش انتي لكن اتجوز الصوره اللي انتي رسمتيها!! استفدتي ايه ساعتها لما ختي لقب مطلقه ولا اتجوز عليكي ونسيكي ولا خلى حياتك نكد !!
عمر ما الكدب ما نفع حد ابدا..

nona يقول...

عمك ياض..

مهى مش البنت بس اللى بتمثل على العريس يعنى
مهو الولد كمان ينفع يبئا اكبر ممثل فيكى يا مصر

وليه التمثيل اصلا

تحياتى

غير معرف يقول...

أولا المدونة رائعة وجميلة وعلى فكرة مش كل الرجالة بهذه الصورة السوداوية
وإن كان هذا ينسحب على بعضهم إلا أنه هناك من يعاون ويتعاون ويكثر من التعاون والحالة كما هى لاجديد وعلى فكرة أنت فى أفكارك قريبة كثيرا منأفكار صديقتك المدونة ضيفة الشرف فى قناة الإنسانية وأشكرك على هذا العرض الرائع المفيد.

بلاش فضايح يقول...

دكتور محمد
شكرا جدا على رأيك وعلى مرورك الكريم
هو اه مش كل الرجالة زى بعض
ومش كلهم بالشكل دة بس أغلبهم

الظاهر الشبه اللى بين أفكارى وأفكار محاسن هو اللى لمنا على بعض هههههههه

مامة مازن يقول...

هههههههههههههههههههه
نونا دا مرض نفسى اسمه الاسقاط
وبعدين اكيد العروسة هتعرف هتعرف اصله بيبان كل حاجة فى الخطوبة بس ممكن تطنش تقولك هيتغير وانا سهل اغيره وده طبعا كلام فاشل لان الطبع يغلب التطبع
وممكن تكمل معاه يأس ودى يا عينى عليها تفضل تضرب نفسها بال.... طول عمرها
ربنا يسمعنا عنك كل خير ولا تتكعبليش فيهم ابدا

بلاش فضايح يقول...

مامة مازن ...

انا مبقيتش عارفة هما اللى بيتكعبلوا فيا ولا انا اللى بتكعبل فيهم
هههههههههههههههههههههههههههههه

شكرا ليكى يا سكر