الجمعة، 20 مارس، 2009

ليه الراجل أنانى ...

ضع علامة √ فى المربع 

الراجالة دول كائنات تفكيرها غريب والله أكيد يعنى مش كلهم علشان محدش يزعل

بس غريب اوى انه لما يحب واحده يفهمها انها الأولى والأخيرة واللى مفيش بعدها وانه من بعدها هيموت

جايز يكون هو حاسس الاحساس دة فعلا بس بعد الجواز بئا بيتغير كل شئ لان الراجل بطبعه محب للامتلاك فبمجرد ميرتبط بواحدة ميرتاحش ولا يهداله بال الا لما تكون بتاعته ويتجوزها ودى حاجة مش وحشة....

الوحش بئا ان بعد الجواز والحمل والولادة مشاعره بتختلف من ناحيتها ( طبعا ماهى مش دى اللى حبها وكان كل اهتمامها بيه لوحده) دلوقت بئا فى أطفال ربنا جاعلهم أمانة فى رقبتهم لازم تهتم بيهم وبيت لازم يكون نضيف دايما وأكل لازم يكون جاهز و هدوم لازم تكون مغسولة واذا كانت كمان بتشتغل لتحسين ظروف المعيشة وفوق دة كله زوج لازم تكون طلباته مجابة يعنى الزوج ساعات بيكون هم فوق الهم ياريته بيساعد او يخفف من طلباته علشان يرحم المسكينة اللى مش عارفه تلاقيها منين ولا منين...


الراجل فاكر انه بمجرد ميصحى الصبح بدرى ويروح شغله ويرجع الضهر ولا آخر النهار يبئا عمل معجزة من معجزات الدنيا مع ان الست بتروح شغلها زيه وترجع تكمل الوردية فى بيتها

صحيح ربنا خلق الراجل والست كل واحد له ظروف معينة وتركيب معين بس دة مش معناه الافترى بتاع بعض الرجاله انه يرمى كل الحمل علها وفى الآخر يقولها مش انتى حبيتى اللى انا اتجوزتها

وهو عنده حق مش هى ...

لأنها شايلة المسئولية كلها لوحدها وشايله همه فوق دة كله انما هو مش شايل غير مسئولية الفلوس بس واللى هى كمان شايلاها لو بتشتغل


يارجالة ارحموا ترحموا دة احنا بشر زيكوا ربنا خالقنا زينا زيكوا مش عبيد

هيجرى ايه لو ساعدت مراتك واهتميت بيها زى مانت عايزها تهتم بيك

هيجرى ايه لو ساعدتها فى تربية اولادك اللى هما مش اولادها لوحدها

اتخلى عن الأنانية شوية وحس بيها علشان هى تحس بيك وتفضى تهتم بيك




هناك 12 تعليقًا:

صفـــــاء يقول...

هو مش بيحس ان دى أنانيه
فى مجتمع زى مجتمعنا دةهو مش بس بيحس
هو داخليا مقتنع ان دة أقصى وأقسى شئ يقدر يقدمه . وهو انه يروح الشغل ويجيى قرفان وحران وعاوز يلاقى كل شئ موجود زى ما امه كانت بتعمل واخواته البنات متسخرين له
بس دلوقتى مبقاش كتير كدة
وتراجع بشدة
فيه رجاله كتير جدا بتساعد على قد ما تقدر
بوست جميله ومدونه اجمل
تحياتى

هانى زينهم يقول...

والله الموضوع ذو شجون زى ما بيقولوا انما انتى قلتى "ربنا خلق الراجل والست كل واحد له ظروف معينة وتركيب معين "
ده بيت القصيد . كل واحد من الجنسين له تركيب معين لا يتفق فيه العقل والمنطق . يعنى كست يستحيل تفهمى الراجل بيفكر ازاى . انما عشان اريحك كل الرجالة بتفكر بنفس الطريقة يشوف واحدة وتعجبه ويعمل قرد لغاية ما يتجوزها ولما يتجوزها يشوف واحدة تعجبه ف .... وهكذا دواليك . ليه والله ما اعرف بس انا شخصيا ما علافتش حد راجل الا بيفكر كدة . النسبة بتختلف من حد لحد انما المبدأ موجود . جايز المنطق غايب هنا انما ليس الذكر كالانثى وده من رحمة ربنا . بجد المدونة جميلة والموضوع عجبنى اوى تحياتى .

نونا يقول...

أستاذ هاني شكرا جدا على رأيك في المدونة والموضوع
وعندك حق والله هي المفروض تكون حقائق مسلم بيها
بس الست بتحس بالقهر

نونا يقول...

شكرا جدا ياصفاء على ردك
أكيد طبعا مش كل الرجاله زي بعضها بس انا اعتقد ان أغلبهم كده
عموما ربنا يهديهم

afew good men يقول...

مافيش انانية ولا حاجة

احنا شرقيين
وهي دي مفاهيمنا

يعني من اآخر لازم يكون كدا علشان كدا دا هو اللي ماشي

وبعدين الستات كمان
بتستهبل فيها ولا ساعدها انهاردا
بكرة بقي الزام ان يعمل الموضوع دا
مافيش مشاركة حقيقية بجد

بلاش فضايح يقول...

((مافيش انانية ولا حاجة
احنا شرقيين
وهي دي مفاهيمنا ))

مش معنى كدة ان المفاهيم صح يعنى

((يعني من اآخر لازم يكون كدا علشان كدا دا هو اللي ماشي ))

لا طبعا مش لازم يكون كدة
لان الصح واضح والغلط واضح لكل الناس
مش هنعمل زى الى بيقولوا ( هذا ماوجدنا عليه آباءنا )

((وبعدين الستات كمان
بتستهبل فيها ولا ساعدها انهاردا
بكرة بقي الزام ان يعمل الموضوع دا
مافيش مشاركة حقيقية بجد))

اولا مش كل الستات بتستهبل
فى ستات مقهورة
وبعدين لما الرجل يبدأ محاولة المساعدة ساعاتها يبئا يشوف ان كانت بتستهبل ولا لأ
انما حكم ظاهرى كدة مينفعش

نورت المدونة
تحياتى

عمك ياض يقول...

المشكله في جزء انها تنزل تشتغل لتحسين ظروف المعيشه دي !
يعني ساعتها فعلا حتبقى شالت حمل فوق حملها وبالتالي الوضع مش حيستقيم والامور حتبقى مش مظبوطه..
لان مستحيل تعرف توزن بين بيتها و شغلها وولدها و جوزها و..و.. !! ليه يعني حرام عليها نفسها..
طبعا الكلام ده لو الموضوع لمجرد ذياده الدخل مش للضروره..
لكن لو فيه ضروره الوضع بيختلف تماما..

Nona يقول...

انت صح يا ( عمي) معلش تاني علشان مش عارفه الأسم
بس انا عايزه اقولك ان عرسان الأيام دي بيتقدموا للبنت اللي بتشتغل وفي وظيفه مثبتة كمان يعني هو عايز واحده تجيب فلوس
يبئا المفروض يراعي بئا
تحياتي

mahasen saber يقول...

راجل سامعه سيرة راجل ورجاله سيبهملى واخلص انا

هما بس لو عاملونا زى ما ربنا امر والرسول الكريم عامل النساء هتبقى الامور على خير خير خير ما يرام

nona يقول...

هتفضلى مثالية يا محاسن
يابنتى المجتمع والزمن اللى احنا فيه مفيهوش الرومانسية والمثالية بتاعتك دى
الرجالة اللى بتتكلمى عليهم اختفوا من بعد عهد الرسول

وزى مبيقولوا الرجالة ماتوا فى الحرب

مامة مازن يقول...

هو الراجل كده
بس برضه احنا(المرأة) امه هى اللى عملته كده عودته على عدم التعاون وانه تلبى طلباته حتى ولو كانت بتموت
فى رايى ان دى مش امومة زيادة لا دا دلع
علشان كده بحاول انمى فى ابنى الصغنن حب التعاون والنظام علشان يكبر وهو متعود عليهم ميبقوش حاجة غريبة عليه زى حماتى الله يرحمها معودت زوجى على التعاون وان يساعد على قد وقته الصغير ما يسمح
اشكرك نونا على الموضوع الجيد

nona يقول...

مامة مازن ..
عندك حق ناس كتير قالوا الموضوع دة
قالوا ان السبب فى انانية الراجل ان مامته مدلعاه
تصورى ان دى بقت ظاهرة حكاية ان الام بتدلع الابن لدرجة انه بيطلع مش متحمل مسئولية ولا عنده شخصية