جوازة الندامة

برنامج اذاعى يهم كل فئات المجتمع المتحضر فى حبيبة قلبى واحدة من دول العالم الثالث

 

3

2

1

0

 

المذيعة : أهلا وسهلا بيكم فى الحلقة الاولى من برنامجنا و برنامجكم الساحر اللوذعى الرائع ( جوازة الندامة)

وفى بداية برنامجنا نسمع مع بعض اغنية ( متحسبوش يابنات ان الجواز راحة )

 

*

*

*

*

اهلا بيكم مرة تانية ..

جاتلنا ايميلات كتير من ناس بتشتكى من بعضها

اول ايميل من الست مرجانة بيقول : هاى شرشر , انا بسمع برنامجك كل يوم و بتابع كل حلقاته

المذيعة : اهلا بيكى صديقة البرنامج , و نحب نفكر السادة المستمعين بمواعيد البرنامج ( قبل ما انسى ) , الصبح بعد الفطار و الضهر بعد الغدا و بالليل بعد العشا , نظرا لاننا البرنامج الوحيد فى الاذاعة لحد دلوقتى وياريت عاجب , نورتينا ياست مرجانة و يارب بس تكونى بتستفادى من نصايحى وبتعملى بيها , أهم حاجة عندى التنفيييييييذ ...

تكملة الميل : انا عايزة اشتكيلك من جوزى , مبيسمعش الكلام و اليومين دول متصاحب على واحد خلاه يغسل المواعين بالليل بس يا شرشر , انا تعبت ومش عارفة اعمل ايه؟

المذيعة : الموضوع دة بقا منتشر اوى و الازواج طالعين بتقليعة اليومين دول انهم يغسلوا المواعين مرة واحدة فى اليوم , ولازم نوجه رسالة لجوز الست مرجانة و نتمنى تكون سامع حلقتنا دلوقتى ابعد عن اصدقاء السوء , محدش هينفعك ، و انت حُر و ذنبك على جنبك حضرتك

 

الايميل التانى من الست أمينة بتقول : ان جوزها كل يوم والتانى عند مامته و مقصر فى تربية الاولاد , لدرجة ان الولد الكبير اللي كان بيروح مع أبوه السوق بقا منطوى اوى و دايماً يقولي ( بابا فين يا ماما ؟ بابا فين يا ماما ؟ ) , الولد هيطلع معقد بسبب اهمال ابوه يا شرشر ، و انا خلاص زهقت ومابقتش طايقة ؟

المذيعة : احنا من برنامجنا هنا بنوجه رسالة لوالدة جوز الست أمينة و بنقولها ابعتى ابنك ع البيت انتى كدة هتخربى بيته و تبقى السبب فى طلاقه , و نقول للزوج ابنك ثم ابنك ثم ابنك , انت هتطلع جيل فاشل للمجتمع , لم نفسك احسنلك... حضرتك .

 

و دلوقتى مع فاصل ....

<<<< سمنة النخلتين جوزك يرجع فى أكلتين >>&gt;

 

*

*

*

اهلا بيكم من جديد

وصلنا ايميل من ميدو بيقول فيه : ماما كل يوم الصبح تزعق لبابا علشان يطبخ الغدا قبل ما يروح الشغل , وهو بيمشى قبل ما يطبخ , ارجوكى يا طنط كلمى بابا عقليه ، علشان ماما دمها مايتحرقش كل شوية , و انا برجع من المدرسة جعان يا طنط .

المذيعة : ( طنط دى تبقا خالتك ) , احم ,,, و دور برنامجنا هنا انه يوجه نداء لوالد ميدو و نقوله كدة ميصحش و حاول تنظم وقتك , مفيهاش حاجة يعني لو صحيت بدرى ساعة و خلصت الغدا و شغل البيت و بعدين تروح الشغل , مانت لو حد من اصحابك ندهلك هتقوم تجرى جري زى القرد حضرتك .

 

رسالة كمان من الاستاذ ( ل.ل.ل) : بيشتكى فيها من زوجته انها دايما عايزاه يفرد الغسيل وهو بينشره , ومشاكل كتير بينهم بسبب الموضوع دة و مفضوحين عند الجيران .

المذيعة : يا أستاذ ( ل) واضح ان الجيران اشتكت منك و من عمايلك , نصيحة لازم تفرد الغسيل علشان ينشف عدل و ميحتاجش كوى , و بعدين مراتك عايزة توفر عليك لانك انت بردو اللى هتكوى فى الاخر .... جتكوا القرف .. أأأ حضرتك .

 

دلوقتى وصلنا لنهاية برنامجكم المحبوب ,

برنامج كل بيت ,

برنامج الموسم وكل موسم ,  

*

( جوازة الندامة )

*

 ونسمع اغنية ( شيل دة من دة ) و مى كساب

 

ومتنسوش تراسلونا على ايميل البرنامج WWW.comb