الخميس، 31 مايو، 2012

الحرية جديدة عليا :(

ضع علامة √ فى المربع 
للأسف كلنا خابت توقعاتنا فى الانتخابات ,, ومش عارفين ليه ؟
هل دة بسبب الجهل السياسى اللى بينتاب المتعلمين قبل الاميين؟
ولا بسبب الفقر والخوف من الجوع اكتر بسبب الحالة الاقتصادية؟
ولا بسبب الخوف الدينى اللى انتاب الاخوة الاقباط ؟
ولا بسبب الانفلات الامنى وخوف الناس وبالتالى بينتخبوا اقرب واحد يطبطب عليهم و يقولهم متخافوش هحميكوا؟
ولا بسبب انتشار الفاسدين وامنياتهم برجوع النظام السابق؟
ولا بسبب وقف الحال والناس اللى شغلها يومى قعدت فى بيوتها ؟؟ المؤمنين بشعار ( منكوا لله خربتوا البلد)
.....................
اعتقد دى كلها اسباب فى الحسبان واعتقد انها كلها اسباب متوقعة ,,
يمكن عيشتنا 30 سنة تحت ظل ( يا حيطة دارينى , و خليك ماشى جنب الحيط ) خلتنا ننتمى للحيطة ومنتكلمش ومنعترضش ,, ولما فى يوم زهقنا من القهر والظلم هدينا الحيطة ,, كنا فاكرينها هتقع الناحية التانية بس للأسف وقعت علينا ,, ولما شوفنا النور معرفناش نعمل ايه ونعدى الناحية التانية للنور ازاى !!!
مش كل المتعلمين عندهم ثقافة سياسية ,, وبالتالى لما اتحطينا فى اول استفتاء على ترقيع الدستور ,, الناس قالت (نعم) من خوفها وجهلها بالسياسة ... وفى تانى انتخابات واللى كانت ( مجلس الشعب) بعض الناس انتبه ولكنهم بردو اختاروا ( الاخوان) ايمانا من الشعب ان الاخوان هما المنقذ ونجربهم احسن من الفلول ...
وفى تالت انتخابات اثبت الشعب المصرى جدارته بأن ( العبودية اردة شعب) للأسف ....
بس انا رأيي الشخصى ان لو كان هناك توعية بقوة للناس المتعلمين والاميين مكانش الوضع وصل لكدة
لان انا اعرف ناس فقرا وحالتهم مسكينة وقالوا احنا هننتخب حمدين ,, وناس قالت ابو الفتوح ..
واعرف ناس مستفيدة من النظام السابق وناس تانية خايفة من مستقبل مصر انتخبوا شفيق
وناس تانية عجبتها لحمة الاخوان والتموين وانتخبوا مرسى
متأكدة ان فى ناس مش هتصدق ,, بس دى حرية شخصية لانى واثقة من كلامى وشفت بعينى محدش قاللى :))
........................
دلوقتى اتحطينا فى وضع صعب بين اتنين خارج اختيارتنا تماما
وكل واحد فينا له وجهة نظر
وكل واحد شايف مصر بطريقته
وكل وجهات النظر تحترم
ولكن اتمنى يكون فى توعية أكتر من كدة لكل الناس المتعلم والجاهل واللى عارف اى معلومة قانونية او سياسية يقولها
بلاش تسيبونا نجتهد احنا فى السياسة لاننا مش فاهمين حاجة ولسة جداد فى الديموقراطية
وكل اللى يعرف حد يوعيه بالفرق بين الاخوان والفلول
انا لا بميل للاخوان ولا الفلول
ولكن الحق أحق ان يتبع
ولازم بدل مانهاجم فى بعض ونقع فى بعض ,, نقنع بعض لان معظمنا حافظ مش فاهم
وانا شوفت امثلة كتير من اللى هينتخبوا شفيق ,, مش عارفين هما منخبينه ليه ,, ولا عارفين الفرق بين الفلول والاخوان
وربنا يولى الاصلح لمصر

هناك تعليقان (2):

مامة مازن يقول...

ازيك يا دكتور وحشانى جدااااااااااا

بصى انا بحاول استوعب اصلا وكنت بنفس السذاجة بفتكر ان النتيجة الرسمية هتجيب مرشح تالت وانه هيكون حمدين
وان مصر هتفوق بقى وحال الناس هيتصلح
وانه بكل اللى شافه فى حياته وكل اللى شوفناه فى حياتنا الشعب ده هيتوحد وهنقدر نعمل حاجة ويمكن نحقق حلمه وحلمنا ويقدر يعمل من مصر برازيل جديدة زى لولا دى سيلفا ماعمل فى البرازيل
لكن الحلم بعد جدا جدا وشكله ضاع
وبنفس روح السذاجة اقدر اقولك انه الحلم اتاخر اربع سنين
تقوليلى ليه اقولك لان لو نجح شفيق يبقى اللى نجحوه هيجددوله تانى هتقوليلى هو هيبقى عايش هقولك الله اعلم ولكنه لا يموت انه يذكرنى بابراهيم الابيض
واذا مسك الاخوان خدى بالك مش بقولك مرسى
يبقى برضه عليه العوض ومنه العوض
وعلى راى ابراهيم عيسى علامة صح فى ورقة الانتخاب تعنى انك بتمضى ورقة على بياض للتنظيم العالمى للاخوان او المنظمة حاجة كده

المهم فى كل الاحوال احنا لابسين فى حيطة باذن الله
ولا عزاء للسذج اللى كان عندهم امل

nona يقول...

مامة مازن انتى بجد وحشانى اكترررررررررررررر بكتير اووووى :))
انا زيك بردو بس انا من كتر اللى شوفته من الناس كنت عارفة ان الاعادة هتبقا بين مرسى وشفيق ومتأكدة .. مع انى انتخبت حمدين وبتمنى انه يكمل
بس انا لما اتحطيت فى اختيار بين المر والامر منه مذطره اختار المر ( مرسى) لان لو رجعنا لشفيق يبقا الثورة ضاعت هدر :((
وربنا يولى الاصلح ويسترها علينا