الجمعة، 16 مارس، 2012

غزل البنات باظ

ضع علامة √ فى المربع 


منك لله ياللى فى بالى وكنت السبب....




كنت خارجة بالليل انا و دودو اختى وبعدين واحنا ماشيين لقينا ولد من اللى بيبعوا غزل البنات فى اكياس كدة ,, ولاننا مبنحبش نشترى الحاجات دى (عدم ثقة فى نضافتها ) بنتفرج ونمشى :)




وبعدين لفت نظرنا ان الجو كان برد والولد قاعد على الارض جنب الرصيف ومغطى نفسه بالجاكت بتاعه والاكياس قدامه ( كان شكله يزعل)




فقررنا كالعادة اننا نساعده , بس احنا مساعدتنا مختلفة شوية لاننا مبنحبش نديهم فلوس علشان مش يعتادوا التسول , فاتفقنا على اننا نشترى منه وفى مكان بعيد نرمى الاكياس دى فى الزبالة , بس رجعنا وقولنا يمكن لو رميناهم فى الزبالة يبقا حرام او حاجة , و نفس الوقت خوفنا نديهم لاطفال فى الشارع كانوا بيلعبوا ويجروا ورا بعض لان مش ضامنين نضافة الاكياس دى وخوفنا يجرالهم حاجة ..( يمكن احنا بنقرف زيادة عن اللزوم ) ..




وكل دة واحنا واقفين فى الشارع نتداول انا ودعاء نعمل ايه؟




واخيرا استقرينا على اننا هنديله الفلوس وناخد الاكياس ونرجع نسيبهاله ونقوله احنا اشتريناها ليك انت ...




توجهنا له و وقفنا سألناه هو الكيس بكام ؟




فكان الرد : دة بايظ!!




وكان الرد صدمة غير متوقعة ..




بايظ ليه؟ دة انا




قال : علشان الشمس والجو باظ




وقفنا انا ودعاء بصينا لبعض بقمة الحزن




وقولناله عموما احنا كنا ناويين نشترى خد الفلوس ليك !!!




ومشينا فى حالة غضب من حال مصر




وقلب مقهور على الولد اللى قاعد فى الشارع شبه نايم




يمكن قاعد خايف يروح لانه مابعش حاجة




يمكن الشارع ادفى من بيته




يمكن ويمكن .... افكار كتير جت على بالنا




لكن فى النهاية




منك لله يا نظام حرامى ذليت الناس ونومتهم فى الشارع ولجأتهم للسرقة والتسول والبلطجة علشان ياكلوا عيش بمساميره




وانا مش ناقصة وجع قلب ,,,,,

ليست هناك تعليقات: