الثلاثاء، 24 مايو 2011

قالوا هننزل التحرير .. قلت استنوا انا وياكوا






فات اكتر من 100 يوم على ثورتنا المصرية .. ايه الجديد اللى حصل؟
غير بس الشرطة اتقمصت من الشعب والشعب قعد يصالح فيها علشان تنزل الشوارع وترجع الأمن تانى .. و فوق كل دة زادت مرتباتهم وقالوا هيثبتوا العاملين ومشوفناش حاجة .. ماشى هنديهم وقتهم ماهو مش بالساهل ,, أصل التدمير سهل جدا لكن البناء هو اللى صعب وادينا مستنيين ..
قالوا هيلغوا الحزب الوطنى .. لقينا أعضاءه عاملين زى الحشرة اللى اتقطع ديلها بس هى لسة عايشة وهتعمل ديل جديد .
قالوا هيلغوا أمن الدولة .. غيروا اسمها بس.
قالوا هيحاكموا النظام ورئيسه مشوفناش غير 15 يوم عمالة تتوزع عليهم على ذمة التحقيق .. وبعدين بدأوا يخلوا سبيل واحد واحد بشوية فلوس متساويش جزء صغير من المسروق والمنهوب من البلد دى .
قالوا مبارك لسة رئيس وتخلى فقط عن السلطة للجيش ولم يتنحى نهائيا .. قصدهم يعنى ان الجيش مستنى لما مبارك يشد حيله ويقوم ياخد السلطة تانى؟؟ دة لو كدة يبقا كلنا هناخدها جرى على أوروبا نطلب اللجوء السياسى ..
قالوا الجيش حامى الثورة .. معترضناش ,, بس اللى بيحصل دة معنها ايه؟؟؟ عايزة تفسير بس
قالوا هننزل التحرير .. قلت استنوا انا معاكوا ..
قالوا البلد خربت اشتغلوا احسن .. طب ما احنا بنشتغل وفى انتظار ناخد حقوقنا من الفاسدين .. مش شايفين نتيجة ..
دة حتى الناس زى ما هى والرشاوى زى ماهى ..
قولنا هنتغير .. لقينا الفاسدين زى ما هما
ليه التعمد بالبطئ فى محاكمة الفاسدين .. ليه مستنيين لشهر 9 علشان ننتخب رئيس مدنى جديد ,, ايه الحكمة يعنى؟؟
دلوقتى البلد بتقع لازم نلحقها .. طب ايه الصح ؟ نرجع التحرير ونستنى لما دة كله يتحقق بسرعة ؟ ولا نقعد فى بيوتنا واحنا حاسين انه بينضحك علينا ..
كأننا شوية عيال بتصرخ وهتكست بعد شوية ..
نزول التحرير مش صعب .. لكن المشكلة الكبيرة ان احنا كدة ممكن نكون بنقوم الجيش علينا .. بعد ما كان مفهمنا انه واقف معانا حتى لو مش دى الحقيقة .. نزول التحرير ممكن يستفز الجيش علينا ونعيد قصة ليبيا فى مصر
ربنا ياخد بإيدنا وإيد ابلد دى لأن الأمور اختلطت على بعضها ومبقيناش عارفين نميز الصح من الغلط

ولو الصح اننا ننزل التحرير يبقا لازم كلنا ننزل لان اللى هينزلوا دول بيعملوا كدة علشاننا وعلشان البلد مينفعش نقعد نتفرج عليهم .




هناك 4 تعليقات:

غير معرف يقول...

التحرير طول عمره من يوم 25 يناير كلمه السر :)

طول عمره مفتاح الحل

بلاش فضايح يقول...

انا خايفة الجيش يقوم علينا ونبقا طربقنا الدنيا بدل منحلها

شمس النهار يقول...

ماتخافيش الجيش مش هيقوم علينا

الجيش مش عايز يقلبها ضلمة
تصدقي ساعات بحس ان الجيش مبسوط من النزول ده
علشان لما يعمل حاجه يقول الجماهير عايزة كده

بلاش فضايح يقول...

شموسة حبيبة قلبى
الجيش تقريبا عايز لما تحصل مصيبة دى منكوا فيكوا ملناش دعوة