الاثنين، 30 مايو 2011

الحرافيش 2011

النهاردة وانا رايحة الزيارة الاسبوعية للسوق مع ماما ربنا ميقطعها عادة لاحظت 2 رجالة شكلهم مش مريح و كل واحد شايل شومة كبيرة فعلا وطالعين من السوق .. المهم ، وانا بنقى فى الطماطم وانا طالع عينى فى التنقية ، لقيت واحد بيقول للبياعة
( طبعا استفتحتى النهاردة؟)
ردت قالتله ( ايوة بس مش معايا فكة) ،
انا خليته مشى شوية و لأول مرة افتح حوار مع البياعين :
سألتها ( هو بياخد منكوا إتاوة ؟ )
قالتلى ( ايوة)
قلتلها ( طيب هو بيعمل ايه قصادها)
قالت ( ولا حاجة)
قالتلها ( يعنى بيوفر ايه طيب ، شمسية مثلا او مكان أو نضافة )
قالت ( ولا حاجة انا بدفعله الصبح 5 جنيه وبس ، واخر النهار واحدة بردو بتيجى وتاخد 5 جنيه )
قلتلها ( مراته؟)
قالت ( لا ، دى واحدة غريبة واسنانها مكسرة كدة لو جت هوريهالك ، وفى واحدة بتيجى تنضف الشارع بعدينا ودى بنديها بردو ) قولتلها ( طيب دى ماشى علشان بتنضف المكان بعدكوا، لكن التانيين ليه تدوهم؟)
قالت ( امال يعنى أهزأ نفسى قدام الناس )
قولتلها ( هو بيهزأ؟)
قالت ( دة بيضرب كمان ، وانا مقدرش أهزأ نفسى ولا جوزى أصله بييجى معايا وساعات أخويا ، دة المرة اللى فاتت مرضيناش نديله كان هيضربنا وأديناله فى الاخر)
قلتلها ( انتوا لو اتجمعتوا عليه كلكوا مش هيقدر يعمل كدة تانى ، دة واحد ملوش شغلانه وقال يتسلى عليكوا ، مش لو عمل زيك مثلا واشترى قفص اى فاكهة ولاّ حاجة وباعه مش كان يبقى احسن)
قالت ( هنعمل ايه بس )
وبعدين قمت بعد منقيت الطماطم بالعافية و ادايقت علشان زمن الفتونة اللى رجع تانى والظاهر عمرنا ما هنتغير ..
الى شعب مصر العظيم .. أحب أقولكوا مفيش فااااااااايدة





ودلوقتى اسيبكوا مع اغنية سمعتها فى التاكسى وانا رايحة السوق







ما يطلبه المستمعون :








http://www.youtube.com/watch?v=DNEuFOyfx2E

هناك تعليقان (2):

غير معرف يقول...

لا في فايده بس مفيش شرطه .... وعلشان كده طبيعي يحصل فرض اتاوات وبلطجه

بلاش فضايح يقول...

مهو مفيش فايدة فينا احنا من جوانا تقريبا كدة عمرنا مهنتغير
البلطجى قلبه جامد علشان مفيش شرطة وعلشان مش هيتغير
والناس قلبها ضعيف بردو علشان مفيش شرطة لكن مفيش قوة من جواهم تغير الظلم