الجمعة، 5 يونيو 2009

كفاية تهزيئ ........

ازيكوا وحشتونى بجد كلكوا جدا جدا
بقالى شهر دايخة فى الامتحانات بس براقبكوا من بعيد
وأدينى فضيت شوية اهوه
وبطلب من كل اللى قصرت فى حقهم يسامحونى
لآنى بجد والله مكنتش بفضى خالص
وكنت ساعات باجى ارد على أحدث الموضوعات وساعات كنت ابص من بعيد
وكتير جدا مكنتش بدخل نت

بس انتوا بجد وحشتونى

___________________________________

الكادر دة من رأييى الشخصى انه مهزلة و عيب أوى أوى اللى بيحصل فى ناس كبار فى السن وناس قربت على المعاش بعد كل الخدمة دى فى التعليم وللتعليم يتهزأو كدة أعتقد ميصحش اللى حصل دة
وماما كانت بتفضل تسأل سؤال مالوش إجابة:
الكادر دة بيقيس ايه بالظبط عند المعلمين ؟؟؟؟؟
سؤال إجابته مبهمة والمعنى فى بطن الوزير الله ( يستره)

واللى حصل يوم الامتحان يدل على ان الكادر دة مجرد طعم للمعلمين
كأن واحد ماسك شوية فلوس و بيجرجر وراه ناس محتاجاها وناس عايزة تحسن ظروف معيشتها
يعنى بيستغلوا حاجة الناس
ناس محترمة وناس كبيرة فى السن وناس زمان كانوا ليهم قيمتهم بين جميع الوظائف
المعلم دة زمان كان مفيش بعد كدة وكان الكل بيخاف منه ولازم تسمع كلام مدرسك

انما دلوقت الطلبة يحقلهم يهزأوا الأستاذة وخصوصا اللى بيسقط منهم
مهو لازم يسقط .. يجيب منين ذاكرة تستوعب كل المذاكرة والمواد التقيلة دى

يوم امتحان الكادر
وبعد الناس ماتعبت فى المذاكرة وتعب الأعصاب
راحوا الامتحان واتفاجئوا بتكملة المهزلة اللى موقفهاش حد

واحدة فى المستشفى وباعته بنتها تمتحن بدالها
واحد طلع من المستشفى مخصوص علشان يمتحن راح ملقالوش مكان و لا رقم جلوس
مدرج كامل بعد مخد الورق وحل فيه اتفاجئ الممتحنين ان كل واحد بيحل فى كود مش كوده وبالتالى تم تغيير الورق
وطبعا فى ناس خدت الورق محلول جاهز
الامتحان معاده الساعة من 3 الى 6 تم توزيع الورق بعد خناقة الساعة 3 ونص وطبعا بعد لخبطة الأكواد بدأوا حل الساعة 4 وعشرة وتم سحب الورق الساعة 5 وتلت
يعنى ساعة ونص للحل فقط مش حرام دة
الغش كان رهيب فى اللجان وبصوت عالى يعنى اللى مذاكر يستعوض ربنا فى تعب الليالى

وكانت الخاتمة بعد انتهاء الامتحان وأخذ الورق من الممتحنين ؟؟؟؟؟؟
ناس جت بعد انتهاء الوقت وخدت ورق امتحان وورق محلول وقعدت ظللت مكان الاجابة من ورق الغلبان اللى حل وطلعت عينه فى المذاكرة والحل

وبعد كدة ينجحوا ناس ويسقطوا ناس؟؟؟؟؟؟؟؟؟؟؟؟؟؟
وبعد كدة يتساوى اللى اجتهد واللى مجتهدش ؟؟؟؟؟؟؟؟؟؟

( الكادر نظام فاشل )


هناك 35 تعليقًا:

mahasen saber يقول...

وسعولى وسعولى وسعولى هيا فين اليى اسمها نها دى

اه يا ماما
طب ازيك يا ابله نها ازى حضرتك يا رب يكون الحال بخير

انا جايه ابوس الايادى بس

mahasen saber يقول...

واشد الشعر

اى اى انا بقل اشد شعرك بتشدى شعرى ليه بس

هو محدش يعرق يهزر مع حد يا ربى على البشر الشريره
ههههههههههههههههه

وحشتينى وحشتينى مكلمتكيش من امبارح انتى ودعاء

طب بتضربى ليه طيب

mahasen saber يقول...

بالنسبه للكادر والكوادر كلامك صح

بس افكرك بالمقوله المشهوره
هيا الحدايه بتحدف كتاكيت ...يا اختى

يعنى الحكومه قالت تزود مرتبات يبقى تفتكرى هتزودها كده وكرامة مواطنها متصانه
طبعا لا
هيا عارفه ان مواطنيها واخدين على البهدله وقلة القيمه فتحانسهم وتطلع عنييهم فتحس بقيمتها كحكومه ومطلعش من خزنتها فلوس كتير

اصل احنا شعب فى نظرها الضعيف عايز الغرق او الحرق

جاتنا نيله فى حكومتنا اليى عامله زى الكباب
خدتيلى باللك من الكباب دى
طب شامه الريحه

mahasen saber يقول...

وانا علقت يا بلوجر اشهد

هانى زينهم يقول...

احم احم .. ماله الكادر ؟ انا امتحنت الكادر مرتين ونجحت فيهم وحياة بنتى ما كنت فاهم حاجة فى الاسئلة الموضوعة بس اهم قرشين جم للعيال نقول لا ؟!! صدقينى معاكى حق فى كل كلمة بس مين يقرا ومين يسمع ؟

بلاش فضايح يقول...

محاسن
هههههههههههههههههههههههههههه
ههههههههههههههههههههههههه
ههههههههههههههههههههههههههههههه

ههههههههههههههههههههههههههههههه

ايه الزيطة اللى انتى داخلة بيها دى
بالراحة شوية الناس نايمة

بلاش فضايح يقول...

محاسن بردو

ربنا ينتقم من اللى يقولك ردى على المواضيع تانى
هههههههههههههههههههههههههههههههه
ههههههههههههههههههههههههههههههههه
ههههههههههههههههههههههههههههه

بلاش فضايح يقول...

محاسن تالت

غلطة ومش هتكرر

هههههههههههههههههههههههههههههه

لا بس نورتينى
فينك من زمان
ولا الفيس بوك خدك مننا

بلاش فضايح يقول...

أستاذ هانى
ازيك اخبارك ايه

طيب امتحنت مرتين ليه ؟؟؟؟

عموما ربنا يهد اللى فى بالى اللى مهزأ الناس على لقمة العيش

شكرا لمرورك

mahasen saber يقول...

بطلى تشوشعى على الفيس بوك مهو وشه وش خير اهه
وبيجيبلى كلام حلو فى العضم برده


منور يا ابو ملك ههههههههههههه

اتوصى بحما ابنى

والله يا بخت بنتك يا بختها فعلا شكلها هتعملها مدونه زى حالاتى من دلوقت هههههههههههههه

بعد اذنك يا كبير كنت بمسى على الناجح فى الكادر التعليمى
مستر البلوجر مستر هانى
مع انه مبيحبش كلمة مستر دى

بلاش فضايح يقول...

محاسن خامس

متروحى تمسى فى بلوجك
مش يبئا احسن
بدل مانتى مخربالى الموضوع
هههههههههههههههههههههههههههههههه

صوت من مصر يقول...

محاسن فتحت صفحه شات جديده ولا ايه
مستينك مش هقول اكتر من كده انا هموت وانام وبكره هرجع هنا تانى

mahasen saber يقول...

هو فين كيمو ده هو فين

هاتوه هنا وانا اكله هههههههههههههههههههههههه

شفت نها اليى قومتنى وقعدتنى عليك يعنى شكلك فطست دلوقتى

ازيك يا كيمو اخبارك ايه اوعى لنفسك من الحر

Unknown يقول...

ههههههههههههههههههههههههه
بلاش اكلم عن الكادر ده
و ضيفي ان مكنش في حاجة اصلا حد يذاكر منها بخلاف نماذج امتحانات الوزارة !

دي كانت مسخرة بجد

Unknown يقول...

كادر ايه اللى انت جاى تقول عليه
انت عارف امتحان الكادر
طالع عليك بيقول ايه
!!!
ههههههههههههههههههه

كادر مين الله يكدرك يا بعيد
---
ازيك يا دكتورة
:-)

ادم المصرى يقول...

ياربى الكادر

انا قرأت فى المصرى اليوم

ان الكدر فيه بتنجان والخطه الى وضعها الباشا الوزير مش مشيه كويس وان فى غش وفى هبل وعبط كبير والمدرسين لو جبنا واحد فى 3 اعداديه هيمتحن امتحنتهم

لاسع افندى يقول...

ياللمهزله الكادريه

على راى المرحوم يوسف بك وهبى


تحياتى

yoyo يقول...

صباحك سكر يا نونا

والله عندك حق هى قمة المهانة و الاستهانة بقيمة المدرس لان اغلب الناس دى ناس كبيرة
هو يعنى عشان تزود الفلوس تهين الناس كدا
و الله بيكون منظر صعب اوى لما المدرس بيذاكر اصله ساقط وعنده دور تانى
و النبى دا كلام

حاجة تنقط وربنا
تحياتى
يويو

بسنت صلاح الدين يقول...

والله هو انا مش لاقياله سبب الحقيقه، يعنى لو كان هايحسن مستوى التعليم كنا قلنا ماشى بس اللى عاوز يحسن مستوى المدرسين يبدأ من بدرى من وهما فى الكليات كده

Soul.o0o.Whisper يقول...

طبعا معاكى حق مليون فى المية

للاسف كل شئ متلخبط

كل شئ غلط


بصى انا مش هأتكلم

خلى مرارتى لقفعة اكبر من كدا




دمتى بود

مامة مازن يقول...

نونا يل نونا اه شاكلك نايمة ماانتى نمتى بعد الفجر اكيد وعملتوهها شات ع المدونة هههههههههههههههه
ربنا يديم عليكى نعمة حب الناس ليكى يارب
شوفى فى واحد قريبنا الكادر لسع دماغه خلاص ويا ولداه 4\3 كلامه عليه مسكين ما اهو فى رقابته 3 عيال برضه ونفسه فى جنيه زياده ليهم
المهم وزارة التعليم دى وزارة ظريف جدا يعنى شوية يشيلو سنه سته وشوية يرجعوها ثانةية قديمة وثانوية جديدة لا وبيقولك عاوزين تبقى اثلاث سنوان بتوع ثانوى كلهم ثانوية عامة هههههههههههههههه ناس عسل عسل عسل
والمدرسين كمان يتبهدلو شوية فيها ايه
طيب ماشى يا بنى ادمين

Ahmed يقول...

انتي بتقولي انه نظام فاشل
هوا اصلا مش نظام
ده اقل مايوصف به انه مهزله
يعني ايه التهريج اللي قرأنا عنه في امتحانات المدرسين ده
للأسف ده فركه تفتقر للتنظيم والتخطيط
متنفذه بشكل عشوائ

عمرو يقول...

المدرسين اللى سقطوا فى اٍمتحان الكادر الأولانى العيال اٍستقبلوهم فى المدارس بالصياح الشهير : الساقطين أهم الساقطين أهم :))
و الله مهزله ..

فشكووول يقول...

ازيك يا نونا
تحياتى
يا نونا الكادر دا استهبال واستعباط للناس
الاصل ان الناس كلها تعبانه وعايزه تاخد اجور حقيقيه مقابل شغلتها
وليه كادر للمعلمين
البلد كلها المفروض تاخد كادر
الاصل انهم يزودوا المرتبات وتكون مرتبات حقيقيه لا مرتبات رمزيه
فى امتحانالكادر المراقبين بيقولوا للمدرسين
(كل واحد يحترم نفسه ويبص قدامه وما يبصش للى جنبه)
بذمتك المدرس اللى كان ان يكون رسولا يقال له مثل هذا الكلام
تحياتى

غير معرف يقول...

الله قمه التخبط والاستهبال.....طيب اعملوا دورات تدريبيه واللي يحضرها ويعدى ياخد الكادر موش امتحانات وكلام فاضى
دمتى بخير.....تقبلى مرورى

Mysara يقول...

الكادر نظام ممتاز في رأيي فيكفي إن أنا وأبي وأمي نكون نازلين سوا هو يتمنالي التوفيق وأنا اتنماله التوفيق بالمثل وفي الأخر انا انجح وهو يسقط واقعد أغيظه :))

بهزر طبعاً.. نظام فاشل جداً وأنا أبي وأمي الاتنين مدرسين والاتنين سقطوا بالصلاة على النبي..
مش عارف إيه لزومها البهدلة دي.. يعني أمي مدرسة لغة عربية المفترض تفتكر معلقة امروء القيس اللي درستها في تالتة كلية وهى فاضلها بتاع سنتين ولا حاجة وتطلع معاش؟؟!
كالعادة نظام أفشل مما قبله...
لا أدري لمتى سنحتمل كل هذا الفشل؟!!

Soma يقول...

ازيك يا نونا

هو فعلا تهزيئ
بس انا حاسه ان المدرسين يستاهلو, مش كفايه اللي بياخدوه من جيوب الاهالي دروس خصوصيه؟؟؟؟
ده ربنا بيطلع منهم اللي بيعملوه في الناس الغلابه, بيستقووا علي العيال الصغيره ويعقدوهم نفسيا عشان ياخدو عندهم درس, ولما ياخدوا يستغلوهم اسوأ استغلال,

ده وانا في ثانوي كان في مدرس انجليزي راكب BM ملهاش حل ودخله مش اقل من 20 الف في الشهر!!!!!!!!!!

وكمان طمعانين في قرشين زياده!!!!!!!

عموما انا فرحانه فيهم.

Unknown يقول...

الكادر بس هو اللى فاشل؟؟؟

تأثير الفراشة يقول...

إزيك يا نونا؟ يارب تكونى اتوفقتى فى الامتحانات

بالنسبة لموضوعك، فبصراحة شديدة أنا عايزة أقول لك إنى..........مش عارفة أقول إيه
!!!!!!!!!!!!!!!!!!!!!!!
إحنا الآن فى وقت ، تقدرى تسمى الأحداث اللى بتحصل فيه...الضاحكات المبكيات

ربنا يرحمنا برحمته

تحياتى ليكى يا نونا

أسطى في زمن البلي يقول...

ان فاتك الميري اتمرمغ في ترابه

و اللي بيدخل الميري يبقى خلاص دخل القمقم ما حدش يقدر يطلعه منه الا بقرار وزاري او تدخل رئاسي و حتى بتوع حقوق الانسان ممكن يلغوا القرارات و التدخلات دي


هو احنا جابنا للخلف سبعين خريفا او الف و تسعمائة خريفا الا منطق الميري و الترقية النمطية

انا مع كهربة الموظف اينما كان .. تدريس تدبيس تهييس .. اي شغلانه لازم يكون فيها تقييم .. لا يدخل فيه عامل السن

الموظف يمسك الوظيفة النهار دا يقول لك خلااااص اتثبتنا ع الوظيفة و اتمسمرنا فيها .. و عارف بعد كام سنة ها تبقى درجته ايه .. نام او اشتغل او او او الطابور ماشي و بالترتيب .. و دا مبدا بيدبح الابداع في اي امة


تقييم الناس عمل من اوباما الافريقي الاندونيسي الملون اللي على علاقة بالاسلام رئيس لامريكا .. و بلاد تانية اللي يتجرا فيها و يقول راي يلفقوا له تهمة


سمعت حكاية افتكرتها الوقتي .. كان فيه طالبة في نهائي هندسة في الجامعة الامريكية .. اصيبت بالمرض ليلة امتحان مادة من المواد و ما حضرتش الامتحان .. استاذ المادة قيمها و اعطاها درجة تقريبا 95 في المية .. و خدوا بالكوا ما حضرتش الامتحان .. سالوا الدكتور قال دي تلميذتي و دا تقييمي لها و متاكد انها لو حاضرة الامتحان ها يكون دا مستواها .. اخدوا براي الدكتور بدون نقاش .. و طبعا العملية مش بزرميط .. سجل الطالبة للسنوات السابقة موجود و مستواها معروف .. يعني الدكتور اشتغل بضميره اي نعم و فيه مرجعية تقييم

السؤال هنا بقى .. لو دا حصل في جامعة القاهرة او جامعة المنصورة .. اكيد طبعا حضراتكم متخيلين ايه اللي ممكن يحصل .. فضااااايح من اول الاستاذ لغاية وزير التعليم مرورا بالعميد و رئيس الجامعة


المسالة عاوزة مجتمع جديد


فيه كتاب اسمه ( نقد العقل العربي ) للدكتور طارق حجي انصحكوا تقرؤووووه لانه فيه توضيح لرؤى كتيرة غايبة عن المجتمع المصري و العربي .. و ان كان بعض العرب بالفعل خرجوا من النمطية اللي مصر الجنرالات لسه عايشة فيها

Maryama Qandil يقول...

انا على طول كنت اسمع عن كادر المعلمين
بس مكنتش اعرف انه امتحاان!!!!

بس عامة من بوستك وااضح انها مهزلة الي حصلت...معلش تعيشوا ومتحصلش غيرها
بلد هكع على الاخر,,,

Sweet Violet يقول...

امممم طيب بعد مايسقط ايه بيحصل ؟؟؟

اعتقد انه لو اتنفذ صح علشان رفع مستوى التعليم يبقى ماشى

لكن بالطريقة دى يبقى فعلا تهريج

بس التهريج الاكتر بقى ان المعلمين اللى هما بيقولوا بلاش تغش و بيعطوا حكم للطلبة .. هما نفسهم بيعملوا كده!!!

سيبك انتى .. اخبارتك ايه ؟؟

^_^

ابو المفاصل الواصل يقول...

يونيو، 2009
السعادة.......السلطة
السعادة لمن يطلبها
==========
السعادة رغبة بقوة عــــزم وارادة/
ورضا وتوافــــق بطريـــــقة جادة/
واداء دور تريدة باتقـــان واجادة/
حتى يتحقق للانسان غايته ومراده/
ولا ينتظر لا نتيجـــــــــة ولا اشادة
==================
السلطة
============
السلطةفى يد الغشيم سيف وبلطة/
وفى يد الجاهلعبث ودجل واونطة/
لكن هى عدالةوحقوق وفهم وحنكة/
وتفاهم وحسن اختيار منى ومنك/
ودفاع من الوطن عنى وعنك

شمس النهار يقول...

ازيك عامله ايه
حمد الله علي السلامه

شوفي موضوع الكدر ده صحيح مهزله بس المهزله الاكبر
ان المدرس اصبح اسير المهج اللي بيدرسه وكمان مستوي المدرسيين الثقافي هبط كثيرا الا من قله فقط
زمان كان المدرس له هيبه مثقف مابيخفش من اي سؤال يوجه له في الفصل
دلوقتي التلميذ مايقدرش يسأل اي سؤال الا في صميم الموضوع
عارفه الموضوع بقا متلعبك علي بعض
لا المدرس بقا مدرس والا التلميذ بقا تلميذ

وطالما ان كل واحد مابقاش عارف دوره
والادوار اتلخبطت خلاص
يبقا حلال فينا الكدر واي حاجه تتعمل فينا

غير معرف يقول...

رمضان كريم وكل عام وأنتم بخير.. موضوع الكادر فعلا مهزلة بكل المقاييس وهذا طبعا ليس بجديد على حكومتنا الرشيدة فكل إصلاح عندها يحتاج إلى كادر البهدلة والمذلة الذى يأتى بالضغط النفسى وضيق فى الجهاز التنفسى والربو الشعبى.