السبت، 10 نوفمبر، 2012

نحو طفولة مشردة ... ( عفوا ) أكثر تشرد

ضع علامة √ فى المربع 


 
 
التعليم الالزامى هو المرحلة الابتدائية فقط ,,
اذن الطفل ميمدش ايده فى شغلانة قبل 6 سنين,,

لان السن الالزامى للتعليم هو 6 سنين ,,
 يعنى ايه ميبقاش فى تجريم لعمالة الاطفال ,,
يعنى الطفل يروح يبيع مناديل فى الاشارات ويندهس تحت العربيات علشان اهله يرتاحوا ,,
يعنى الاباء القاسيين ( الفقراء والاغنياء ) هيستغلوا ابناءهم ,,
...
يعنى ابنى يروح يشتغل مكانيكى وياخدله مفك فى وشه ،
يعنى ما احلى التسول فى ظل الدستور الجديد ,,
يعنى يسيبوا المدارس أحسن لان التعليم هيعطل سوق العمل ,,
يعنى بعد ما كنا بنحاول نحمى اطفال الشوارع .. اولادنا كلنا هيبقوا فى الشارع ,,
يعنى طفولة مشردة ,, يعنى مستقبل متشرد ,,
يعنى لا
لا
لا
لا
لا
 للدستور الجديد

هناك 10 تعليقات:

E73 يقول...

بغض النظر عن مين حاطت الكلام

خلينا نحلله بطريقة حيادية

الكلام اللي حواليه اطار احمر مكتوب فيه الا بعد تجاوزهم

يعني مش 6 سنين
يعني 12 سنة لأن الطفل لما يكون في ستة ابتدائي وبعد ما يخلصها تحديدًا نظرًا لأن مكتوب تجاوزهم هيبقى عنده 12 سنة

وبالفعل الأطفال بيشتغلوا كتير في هذه السن وما قبلها غير ان دعم المراحل اللي بعد كدا لا يصل لمستحقيه

ودا من خلال تجربتي الشخصية في التدريس في العشوائيات الريفية واللي بيتسرب أطفالهم من التعليم تحديدًا بعد المرحلة الابتدائية اللي بيكونو فيها أصلا غير قادرين عالقراءة ولا الكتابة

وياريت علشان يروحوا يشتغلوا دول بيتسربوا "أهو غلاسة كدا" وبالتالي اللي بيفضل هو القادر على استكمال موال الدروس الخصوصية نظرًا لأن المدارس مبتعلمش الأولاد حاجة وبالتالي الفئة اللي بتدي دروس خصوصية هي الفئة اللي بتستمر في تعليم أولادها "إلا من رحم ربي" إذًا هم قادرين على دفع ما هو أكثر من ذلك في التعليم في مقابل تعليم جيد يغنيهم عن الدروس الخصوصية

ووقتها تحريم الدروس الخصوصية يبقى واجب للسيطرة على الفجوة في الفروق الفردية الثقافية بين الطلاب داخل الفصل الواحد

دانا عندي في حضانة الأطفال اللي بياخدوا دروس بيبقوا 30 طفل من 40
والاربعين قولي 5 منهم متسربين بالفعل ومبيجوش خالص يبقى فاضل 5 مش بياخدوا دروس وضايعين واهلهم أميين ومش بيتابعوا معاهم ولا مهتمين

بكون مجبرة أمشي على مستوى الـ 30 طفل اللي بالفعل جايين متعلمين من بيوتهم ويضيعوا الفرصة على الباقيين لأني لو ممشتش بمستواهم هفقد السيطرة عالفصل لما طفل حضانة يجيلي بيكتب جمل وأنا أفضل أشرحلهم ألف وباء بتتكتب ازاي وازاي يجمع واحد مع اتنين علشان يديله 3 في حين انهم بيجمعوا بالاضافة ويطرحوا بالاستلاف وتخيلي كمية الشكاوي اللي بتيجي فيكي من الأهالي اللي اصلا مش فارقة معاهم الحضانة علشان بنزل مستوى أولادهم

بحاول أوفق بين الاتنين لكن مستحيل هوصل للمرجو مع تطنيش العيال نفسهم وعدم رغبتهم في التعليم لأنهم شايفين أهلهم مش متعلمين وعادي

فأنا من رأيي يتعلمولهم صنعة مفيدة أحسن بدل ما هم متشردين في الشوارع بيشموا مخدرات وبيلعبوا بالمطاوي

الست حشَرية يقول...

الكلام دة صورة متصورة من مسودة الدستور ,,
الحاجة التانية ان عمل الاطفال محظور ( قبل ) السن الالزامى اللى هو 6 سنين مش بعد مايخلصوا التعليم الالزامى ... لا ,, هناك فرق
ولو عملهم هيكون بسبب الفقر يبقا التضامن الاجتماعى لازم يوفر الانفاق على الاسر المعيلة
و بعدين دة بيشجع على عمالة الاطفال واستغلالهم .. اصل انا لفت نظرى المادة دى لانى سمعتهم بيتناقشوا عليها فى دريم

الازهرى يقول...

...
يعنى ابنى يروح يشتغل مكانيكى وياخدله مفك فى وشه


احمدى ربنا
مش أحسن ما يبقى صايع ومش لاقى شغلانة

الست حشَرية يقول...

تفتكر كدة :)))
يعنى اقبل بدل مايطلع عواطلى
هههههههههه
اهو يتعلمله صنعة و مصر تاخد المركز الاول فى الدول المتشردة

موناليزا يقول...

مش فاهمة وجه اعتراضك على فكرة

الست حشَرية يقول...

انا معترضة فى المادة دى على انها بتسمح بتشغيل الاطفال من 6 سنوات .. ومفيهاش نص يجرم عمالة الاطفال , وبالتالى كل الاهالى السيئة هيستغلوا ابناءهم دون النظر انهم فقرا او اغنيا
المجتمع السليم أساسه أطفال سليمةمش متشردة

E73 يقول...

يا ستوتة الأهالي السيئة كدا كدا مستغلة أطفالها مش لسة هتستغلهم

والأهالي الكويسة اللي مش لاقية تاكل هم كاتبين ان هيسمح بعمل الأطفال "بما يناسب عمرهم" يعني مش هيشتغل ميكانيكي وياخد مفك فوشه ولا حاجة

مع العلم انهم حاليًا بالفعل بيشتغلوا ميكانيكي وياخدوا مفك في وشهم
الفكرة هي ليه ندفن راسنا فالرمل؟ القانون مكنش مفعل أصلا وهي المادة دي في الأول كانت ايه وبقت كدا؟

زي بيقولك هيجوزوا البنات وعندهم 9 سنين
وهي اللي عندها 35 اتجوزت؟ دا غير مهازل التسنيين اللي في الأرياف والعشوائيات وتزوير شهادات الميلاد علشان يخلصوا من البنت بدري بدري "مع اعتراضي طبعًا على فكرة 9 سنين يعني مش لما يشطح ينطح"

الست حشَرية يقول...

يبقا المفروض يكون فى مادة تحمى حقوق الاطفال من الاهالى السيئة مش تساعد الاهالى على الاستغلال ... دى وجهة نظرى
يعنى ايه العمل بما يناسب اعمارهم ... ايه هو دة العمل اللى يناسب عمر الاطفال من اول 6 سنين وانتى طالعة ؟؟؟

مذكرات موززه عانس يقول...

انا اللى فى الحقيقه مش فاهمه ازاى الناس تدخل تجادل اصلا وتقولك احنا مش فاهمينك ؟!
الماده واضحه وفعلا مسيئه ومتخلفه وفعلا حتى بعد مايتجاوز السن الالزامى هايفضل الطفل طفل وحرام انه يشتغل
ده كده هانبقى مجتمع معقد نفسيا واطفالنا مشردين وهانرجع 10000 خطوه للوراء والسبب فى ده الجدال فى نقطه مش محل جدال اصلا

الست حشَرية يقول...

منورانى يا موززة :)
والله فعلا هنبقا مجتمع معقد و متشرد
والطفل من حقه حياه كريمة , ازاى ينسوه
انا لو عندى ابن عمرى ما اجازف بيه كدة
وعايزين شبابنا يبقوا علماء .. طب منين
وهما بالشكل دة يسيبوا التعليم احسن ويلتفتوا لشغلهم
عموما هى كلها وجهات نظر