السبت، 27 أكتوبر، 2012

عندما يصبح الحب عبئا على قلب صاحبه ,,

ضع علامة √ فى المربع 



دى مشاركة اتكتبت فى تعليق من أحد الاصدقاء
و نقلتها زى ماهى
..............................................

هات ودنك اقلك حدوته بايخه :-
مرة اتنين كانوا متجوزين وكالعاده حصلت مشاكل مابينهم قام الزوج طرد الزوجه بالاولاد برة البيت .
قامت الزوجه اتغاظت راحت رافعه عليه دعوي نفقة زوجيه وصغار
قام الزوج قرر انه مايستلمش الاعلان علشان مايحضرش اول جلسه والقاضي ياجل القضيه لاعادة الاعلان وعرض الصلح بس ويدوخ اللي جايبنها رغم ان اخوه او ابوه او جاره هما اللي استلموا الاعلان .
وفعلا تتاجل الدعوي وبعدين الزوجه تطلب التحري عن دخل الزوج المهم ييجي التحري بكام لو موظف ييجي ب 300 ج في الشهر رغم ان الزوج ساكن في شقه ايجار جديد ب 600 ج بس بردوا القاضي مالهوش دعوة هو ملتزم بالورق اللي امامه .
المهم بعد الاطلاع والتحري والتاجيلات الاداريه وخلافه القاضي يحكم للزوجه والصغير بنفقة حوالي 300 ج مثلا .
وتفرح الزوجه وتحاول تنفذ الحكم يقوم الزوج ياخد اجازة بدون مرتب ويزل ابوها ومايخليهاش تعرف تصرف النفقه.ومايبقاش امامها الا بنك ناصر وهنا الطامه الكبري تروح بقي للموظفين اللي علي حق هما دول اصل الموظفين الحقيقيين والنبته الخبيثه اللي طلع منها موظفي الدوله فتفاجئ وتياس وتضطر انها تنتظر .
المهم سامحوني طولت عليكم قولوا طول فوتكم في الكلام قولوا ماتفوتناش ماعلينا .
المهم تنتظر الزوجه والاولاد الحكم لما يبقي نهائي ويتم الفصل في الاستئناف علشان تحبس الزوج بدعوي مطالبه بمتجمد نفقه فتاخد نفس الاجراءات ويتم التحري عن يسار الزوج المهم تكون الزوجه اتجننت والعيال يكونوا خلاص عرفت اللي فيها فيبدأوا يعملوا ايه بقي يتوزعوا علي الميادين ويبداوا يظهروا امكانياتهم المدفونه واللي يبيع مناديل واللي يمسح عربيات واللي يجيب من الاخر ويحترف اتلشحاته وبعدين يسيبوا المدارس وتلاقي اصحابهم علي كخه وسيد سيخ وبعدين تقولوا عليهم اطفال شوارع .
المهم اتحملوني كمان شويه لان والله المأساه تستاهل انك تتابعها لانها لسه ماخلصتش .
ييجي الولد او البنت يكبروا والاسعار تزيد وطبقا للقانون ومجريات الامور بتاعت البني ادمين العاديين انه النفقه لازم تزيد .
قوم الزوجه اللي الحمد لله لسه عايشه ترفع دوي اسمها زيادة نفقه وتمر الدعوي دي بنفس الاجراءات العقيمه بتاعت الدعوي الاولي .
المهم ان الزوج خلال تلك الرحله المأساويه يروح رافع دعوي تمكين من رؤية الصغار علي اعتبار انه اب اصلا .
قوم ايه المحكمه تقول ايوة حقه لازم يشوف ولاده وتصدر حكم بالزام الزوجه بتمكين الزوج من رؤية الاولاد وتاخدهم علشان الباشا يشوفهم قوم الاب يضحك عليها اول مايشوفها شايله الاولاد ومجرجراهم وراها علشان يكمل علي الباقي منها .
طيب وبعدين ايه الحل :-
1- بالنسبه للنفقه علي القاضي ان يصدر حكم النفقه الخاصه بالاولاد علي ان يتضمن هذا الحكم الزياده السنويه برقم محدد حتي بلوغ الصغير اقصي سن للحضانه واستطاعته الكسب .
2- بالنسبه للتمكين من الرؤيه القاضي يكلف نفسه شويه ويطلب حضور الطرفين ويتاكد ان الزوج ملتزم بالنفقه المفروضه بموجب حكم ةبعدها يصدر حكم بتمكينه من الرؤيه في حالة تاكد القاضي من عدم التزام الزوج بالنفقه يصدر قرارا بوقف الدعوي تعليقا لحين التزام الزوج .
وبكده ياحلوين ماتلاقيش مشاكل والدنيا بيس .
ايوة صحيح نسيت اقولكم ان طبعا ده علشان يتحقق عاوز مجلس شعب بيفهم مش شوية .............وتوته توته ماخلصتش الماساه قصدي الحدوته ايه رايكم حلوة ولا ملتوته
علي فكرة كل القوانين المصريه عفنه ومحتاجه تغيير وسوف نتناولها شيئا فشيئا كلما سمحت الظروف بس ياريت مانكتئيش ونتعب نفسيا وتتحملوني

(الفرماوي)

هناك 6 تعليقات:

amgad.ahmed يقول...

جميله :)

مامة مازن يقول...

دكتور نهى
ازيك يارب تكونى بخير
وليه غيرتى اسمك ل الست حشرية

اللى بتتناوليه فى المدونة بعيد عن الاسم ده خالص دى رؤية لحاجات ما يعلم بيها الا ربنا ومحاولة حلها او حتى تسليط الضوء عليها
المشكلة ان القوانين العفنة دى خلت الناس زيها يعنى بقت تلف وتدور وتعمل حاوى وتعبان علشان متبقاش فير وصادقة اعوذ بالله
بيتهيئلى القوانين دى اتعملت نكاية في الشعب ده
عارفة لما تكونى حاطة دواسة فى مدخل البيت وتقومى شايلاها نكتاها وتنزل بلاوى ويا سلام لو بعد مطر وطين
هى بلدنا بقت كده عايزه تتنكن نكتة تمام علشان تنضف
الارادة
السياسية بقى الاجتماعية المهلبية
المهم يكون فى ارادة فى البلد دى


الست حشَرية يقول...

امجد نورتنا :)

الست حشَرية يقول...
أزال المؤلف هذا التعليق.
الست حشَرية يقول...
أزال المؤلف هذا التعليق.
الست حشَرية يقول...

مامة مازن يا قمر كل سنة وانتى طيبة :)
بالعكس دة انا شايفة الست حشرية لايقة خالص على اسم المدونة هههههههههه شوية وهغيره اصلا انا بزهق بسرعة وتلاقينى بغير كتيير
...
بالنسبة للموضوع دة انا شايفة ان اول حاجة توصل للمشاكل هى العناد بين الزوجين و تدخل الاهل كل واحد يسخن فى الطرف اللى معاه لحد ما يوصلوا للمحاكم .. تيجى بعد كدة تكتشفى ان مفيش قوانين منصفة ,, بالعكس القوانين دى بتخلى الطرف الظالم يتمادى فى ظلمه..
ربنا يفك كرب كل الناس