السبت، 7 يناير، 2012

هى البلد دى فيها حكومة !!!!؟؟

ضع علامة √ فى المربع 
خير اللهم اجعله خير .. بتجيلى شوية تهيؤات

انا بقا هفتح الموضوع بحاجات شوفتها واعرفها شخصيا وبتتهيألى :))...
لما الثورة ابتدت طلعت الفيران من جحرها اللى هما البلطجية طبعا مع ان فى حاجات كتير خرجت .. بس البلطجية طلعوا انتشروا وهجموا على البيوت وبقت الاهالى فى البيوت نايمين على مخدات تحتها سكاكين ومعاهم شوم خوفا من اى هجوم واولادهم واقفين لجان شعبية فى الشوارع يوقفوا اى حد غريب عن المنطقة .. واعرف ناس سابوا بيوتهم من كتر الرعب وراحوا يعيشوا مع قرايبهم فى بلاد تانية بحيث يبقوا قوة واحدة ومش مهم البيوت تتسرق بس ميكونش فى قتل ...

بعد كدة الموضوع دة هدى شوية ودخلنا على مرحلة جديدة خالص وهى سرقة العربيات ..سمعت حوار مرة فى التاكسى لواحد بيتكلم فى التليفون فهمنا منه ان عربيته اتسرقت وراح يعمل محضر اللواء قاله ساعدنى و هات الخيط وانا اجيبلك العربية .. رد سواق التاكسى على الراجل دة وقاله ( ليه هو اللواء دة شغال ترزى؟ خيط ايه؟ ) .. رد الراجل قال بقا اللواء مش عارف بلطجية العربيات ؟ ومش عارف الوكر بتاعهم فين؟ انا هجيب عربيتى بنفسى .. وقصة تانية لواحد عربيته اتسرقت تحت تهديدي السلاح والبلطجية مضوه على عقد بيعها قبل ما يسيبوه .. وبعد يوم اتصل عليه واحد وقاله انا كنت اشتريت عربيتك ولو عايزها ادفع 35 الف جنيه .. ودى مش اول قصة سرقة عربيات طبعا .. تحول الشعب المصرى الى ظباط ولواءات بيجيبوا حقهم بإيدهم لان محدش هيجيبه ..

بعد كدة دخلنا فى سرقة شنط البنات والستات .. موتسيكل عليه شخصين واحد بيسوق والتانى يشد الشنطة من الستات اللى ماشية لدرجة ان فى ستات بتقع متمسكة بالشنطة لاخر لحظة وبيتشدوا على الارض زى فيلم الارض لو عطشانة بالظبط .. وفى ستات انضربت وابرحت ضرب علشان ماسكة فى الشنطة .. ودى انا شوفتها كتير جدا بس لسة مجاش الدور عليا .. وظابط اتسرقت الطبنجة بتاعته من شنطة المدام .. بس لانه ظابط الشنطة رجعت بمحتوياتها فى اقل من ساعة ونص ( محدش يقول مش صح لانى اعرفهم شخصيا) ..

بعدين دخلنا فى موضة خطف البنات ومحدش بردو يقول مفيش بنات لانى اعرف ناس منهم و فى بنت طالبة عندى اتخطفت فى عز النهار من يوم 29/12/2011 الى يومنا هذا لسة مرجعتش بيتها .. واهلها هيجيبوا بنتهم بنفسهم .. كله دلوقتى بقا بيجيب حقه بإيده .. لانه حقه .. ولان محدش بيجيبهوله .. ولان محدش شايف شغله بما يرضى الله .. والمفروض ان دة شغلهم مش مجاملة منهم علينا ..

فى ايه بقا؟؟ فى اييييييييييييييييييييه؟؟ واخرتها ايه؟؟ و ايه الموضه الجديدة فى السرقة فى شتاء 2012؟

فى ناس بتقوللى لازم نساعد الشرطة ونبقا ايد فى ايد ؟ طيب نساعدهم ازاى مفهمتش ؟ نسيب بيوتنا وبناتنا تتسرق علشان الشرطة متاخدش على خاطرها ؟ ولا نروح نجيب بناتنا بإيدينا وساعتها يقولوا البلد دى فيها قانون ؟؟؟

ناس تانية بتقول الشرطة شغالة بس واحدة واحدة .. طيب انا مش معترضة على الشرطة أساسا لانهم اخواتنا بردو هما مش جايين من الفضاء الخارجى .. لكن ليه مفيش حد للجرائم ؟ بقينا خايفين نمشى فى الشوارع .. وخايفين نقعد فى البيوت .. ليه شغلهم مش ملموس؟؟ ليه لما حد بيستعين بيهم يقولوا هات الخيط؟؟؟ دة اسمه كلام؟

هناك تعليقان (2):

الازهرى يقول...

التطور الطبيعى للحاجة الساقعة
قصدى للانفلات الأمنى
ودا مش اللى ابتدا يوم 29 يناير
لأ
الموجود فى دولتنا من سنين
البلطجية هم بكل بساطة
رجالة الشرطة
محدش بقول لى لأ
لإن بيتنا وسطهم وهم أصحابى وعارف عن بلطجية المنطقة كل حاجة

ولسه راجع م دفن واحد منهم
ودى سياسة الشرطة

بتصفى البلطجية القام علشان تقدر ترجع من تانى لإنهم عارفين عن بعض كل حاجة وصعب تتعامل مع بلطجى كنت بتقبض منه وكاسر عينك

ربنا يهديهم ويرجعوا يعرفوا إن مصر بلدهم
وإن مفيش صراع بينهم بين الشعب
إنما تكامل

nona يقول...

ما هما شكلهم هيخلصوا علينا وبعدين يخلصوا على بعض زى العصابات لما بيقتلوا فى بعض علشان السر يموت معاهم :)