الحرافيش 2011

النهاردة وانا رايحة الزيارة الاسبوعية للسوق مع ماما ربنا ميقطعها عادة لاحظت 2 رجالة شكلهم مش مريح و كل واحد شايل شومة كبيرة فعلا وطالعين من السوق .. المهم ، وانا بنقى فى الطماطم وانا طالع عينى فى التنقية ، لقيت واحد بيقول للبياعة
( طبعا استفتحتى النهاردة؟)
ردت قالتله ( ايوة بس مش معايا فكة) ،
انا خليته مشى شوية و لأول مرة افتح حوار مع البياعين :
سألتها ( هو بياخد منكوا إتاوة ؟ )
قالتلى ( ايوة)
قلتلها ( طيب هو بيعمل ايه قصادها)
قالت ( ولا حاجة)
قالتلها ( يعنى بيوفر ايه طيب ، شمسية مثلا او مكان أو نضافة )
قالت ( ولا حاجة انا بدفعله الصبح 5 جنيه وبس ، واخر النهار واحدة بردو بتيجى وتاخد 5 جنيه )
قلتلها ( مراته؟)
قالت ( لا ، دى واحدة غريبة واسنانها مكسرة كدة لو جت هوريهالك ، وفى واحدة بتيجى تنضف الشارع بعدينا ودى بنديها بردو ) قولتلها ( طيب دى ماشى علشان بتنضف المكان بعدكوا، لكن التانيين ليه تدوهم؟)
قالت ( امال يعنى أهزأ نفسى قدام الناس )
قولتلها ( هو بيهزأ؟)
قالت ( دة بيضرب كمان ، وانا مقدرش أهزأ نفسى ولا جوزى أصله بييجى معايا وساعات أخويا ، دة المرة اللى فاتت مرضيناش نديله كان هيضربنا وأديناله فى الاخر)
قلتلها ( انتوا لو اتجمعتوا عليه كلكوا مش هيقدر يعمل كدة تانى ، دة واحد ملوش شغلانه وقال يتسلى عليكوا ، مش لو عمل زيك مثلا واشترى قفص اى فاكهة ولاّ حاجة وباعه مش كان يبقى احسن)
قالت ( هنعمل ايه بس )
وبعدين قمت بعد منقيت الطماطم بالعافية و ادايقت علشان زمن الفتونة اللى رجع تانى والظاهر عمرنا ما هنتغير ..
الى شعب مصر العظيم .. أحب أقولكوا مفيش فااااااااايدة

ودلوقتى اسيبكوا مع اغنية سمعتها فى التاكسى وانا رايحة السوق

ما يطلبه المستمعون :

http://www.youtube.com/watch?v=DNEuFOyfx2E

تهمتى كانت .. حب بلادى

و نزلنا يوم الجمعة
نزلنا يوم الجمعة 27 مايو علشان حاجات كتير ، علشان تسريع المحاكمات ، وعلشان اخواتنا اللى فى السجون ، وعلشان نلفت نظر المجلس العسكرى لبعض القضايا اللى سايبها تعمل فتنة من غير ما ياخد باله ، يمكن من وجهة نظرى نازلة علشان مصر ، ومن وجهة نظر اللى معترض على المظاهرات انه هو بردو قاعد علشان مصر ، المهم ان كلنا متفقين على ان اى حد بيعمل اى حاجة بتكون علشان مصر .......
و نزلنا لمكان تجمع المظاهرة فى بلدى.. عرفناهم من الأعلام اللى ماسكينها والورق اللى بيوزعوه .. اتجمعنا عليهم وبدأنا نزيد شوية بشوية .. ومشينا فى الشوارع نهتف ونجمع الناس .. ولازم طبعا يكون فيه المعترض والمؤيد .. وبعدين وقفنا فى مكان وفضلوا الشباب يهتفوا وينادوا الناس تنزل ..
كان عددنا قليل بس كان فينا كل الطوائف المسلم والمسيحى ، المتزمت والغير متزمت من الشباب والبنات ، الكبير والصغير ، اتعرفنا على بعض ولقينا ناس كان لينا مواقف خاطفة معاهم ، كان يوم جميل ...
بعد شوية كان معانا واحدة اتعرفنا عليها وجالها تليفون وفجأة قالتلى خدى كلمى ماما طمنيها ان انا معايا بنات ، فكلمت مامتها وطمنتها وبعدين قفلنا السكة لقيتها بتقوللى انا كنت مستنية عند المسجد لقيت قريبى ظابط ولابس مدنى قاللى انتى بتعملى ايه روّحى ، قالتله لا انا مش همشى هحضر المظاهرات .. ودلوقتى مامتها اتصلت علشان تقولها ان قريبها شافها واتصل على البيت وقالهم هاتوا بنتكوا من المظاهرة بدل منجيبها احنا !!!!!!!!!!!!!
بعد شوية لقينا 2 شباب رايحين جايين قصادنا ، وبعدين وقفوا على بعد و وقف معاهم راجل كبير ، وفضلوا يبصوا علينا ويشاوروا وماسكين موبايلاتهم زى ميكون بيصورونا ، فى الاول دخل الشك قلوبنا بس سكتنا ، بعدين وقفت قصادهم عربية وراح نازل منها راجل تانى وقف معاهم وبردو قعدوا يشاوروا علينا ويتكلموا ...
اتكلمنا مع بعض وصلنا لحل ان احنا نشوف شكنا فى محله ولا لأ .. احنا شكينا ان دول أمن دولة وبيراقبونا .. واحد مننا قال تعالوا نمشى قدام شوية ولو جم ورانا يبقوا فعلا بيراقبونا .. اتفقنا ومشينا خطوتين بالعدد ، بصيت فجأة لقيتهم بيمشوا ورانا صرخت و قولتلهم بصوا دول جايين ورانا .. راح واحد واقف واتجه ناحيتهم وقال انا هشوف مين دول,, بمجرد ما مشى ناحيتهم راحوا راجعين ومشيوا بسرعة و قعد يمد فى خطوته لما وصلهم ، وسلم عليهم واتكلم معاهم ، وفجأة رجع طبعا معرفناش قالوا لبعض ايه !! سألناه قال بيقولوا احنا واقفين تحت عيادة الدكتور بتاعنا ومستنينه ييجى !!! وهو صدق ...
هو فى دكتور يوم الجمعة الساعة 2 الضهر يابنى؟؟؟ ولما هو كدة مشيوا ورانا ليه؟؟؟ ورجعوا ليه لما انت روحتلهم ؟؟؟ هو انت معاهم ولا ايه؟؟؟
أمن الدولة لسة موجود ولكن تحت مسمى آخر ( الآمن الوطنى ) .. وماشى ورانا... وطبعا خوفنا كلنا و اتفقنا على أننا فخورين باللى بنعمله وكفاية ان احنا حاولنا ومش سلبيين بعد شوية اتفرقنا ورجعنا البيت .. عرفت بعد كدة ان الامن الوطنى عنده أوامر يجمع معلومات عن المتظاهرين لحين اخراج ملفاتهم وحبسهم !!!!!!!! والخبر دة حقيقى لانى عرفته من حد موثوق جدااا
و لو لقيتونى اختفيت فجأه اعرفوا انى اتمسكت بتهمة حب بلادى........

قالوا هننزل التحرير .. قلت استنوا انا وياكوا

فات اكتر من 100 يوم على ثورتنا المصرية .. ايه الجديد اللى حصل؟
غير بس الشرطة اتقمصت من الشعب والشعب قعد يصالح فيها علشان تنزل الشوارع وترجع الأمن تانى .. و فوق كل دة زادت مرتباتهم وقالوا هيثبتوا العاملين ومشوفناش حاجة .. ماشى هنديهم وقتهم ماهو مش بالساهل ,, أصل التدمير سهل جدا لكن البناء هو اللى صعب وادينا مستنيين ..
قالوا هيلغوا الحزب الوطنى .. لقينا أعضاءه عاملين زى الحشرة اللى اتقطع ديلها بس هى لسة عايشة وهتعمل ديل جديد .
قالوا هيلغوا أمن الدولة .. غيروا اسمها بس.
قالوا هيحاكموا النظام ورئيسه مشوفناش غير 15 يوم عمالة تتوزع عليهم على ذمة التحقيق .. وبعدين بدأوا يخلوا سبيل واحد واحد بشوية فلوس متساويش جزء صغير من المسروق والمنهوب من البلد دى .
قالوا مبارك لسة رئيس وتخلى فقط عن السلطة للجيش ولم يتنحى نهائيا .. قصدهم يعنى ان الجيش مستنى لما مبارك يشد حيله ويقوم ياخد السلطة تانى؟؟ دة لو كدة يبقا كلنا هناخدها جرى على أوروبا نطلب اللجوء السياسى ..
قالوا الجيش حامى الثورة .. معترضناش ,, بس اللى بيحصل دة معنها ايه؟؟؟ عايزة تفسير بس
قالوا هننزل التحرير .. قلت استنوا انا معاكوا ..
قالوا البلد خربت اشتغلوا احسن .. طب ما احنا بنشتغل وفى انتظار ناخد حقوقنا من الفاسدين .. مش شايفين نتيجة ..
دة حتى الناس زى ما هى والرشاوى زى ماهى ..
قولنا هنتغير .. لقينا الفاسدين زى ما هما
ليه التعمد بالبطئ فى محاكمة الفاسدين .. ليه مستنيين لشهر 9 علشان ننتخب رئيس مدنى جديد ,, ايه الحكمة يعنى؟؟
دلوقتى البلد بتقع لازم نلحقها .. طب ايه الصح ؟ نرجع التحرير ونستنى لما دة كله يتحقق بسرعة ؟ ولا نقعد فى بيوتنا واحنا حاسين انه بينضحك علينا ..
كأننا شوية عيال بتصرخ وهتكست بعد شوية ..
نزول التحرير مش صعب .. لكن المشكلة الكبيرة ان احنا كدة ممكن نكون بنقوم الجيش علينا .. بعد ما كان مفهمنا انه واقف معانا حتى لو مش دى الحقيقة .. نزول التحرير ممكن يستفز الجيش علينا ونعيد قصة ليبيا فى مصر
ربنا ياخد بإيدنا وإيد ابلد دى لأن الأمور اختلطت على بعضها ومبقيناش عارفين نميز الصح من الغلط

ولو الصح اننا ننزل التحرير يبقا لازم كلنا ننزل لان اللى هينزلوا دول بيعملوا كدة علشاننا وعلشان البلد مينفعش نقعد نتفرج عليهم .