صدق من قال و من الحب ما قتل

مش عارفة ليه بعد ما شفت على قناة الحياة الحكم بإعدام هشام طلعت مصطفى ومحسن السكرى مع انى متابعتش قصتهم اوى غير ان ورا كل دة حب اعمى
افتكرت
نسرين
نسرين دى كانت بنت أبلة الرسم بتاعتنا وانا كنت لسة فى ابتدائى
من يومها وهى بنت جميلة ومعروفة بجمالها فى الحى كله ويمكن الأحياء المجاورة كمان
كنا ساكنيين بعدهم بكام شارع كدة بس كنا عارفينها وبنمشى نشاور عليها بنت الابلة اهيه
دة انا حتى مش فاكرة اسم الأبلة (مامتها)

فاتت أيام كتيرة وبقيت انا فى الجامعة بس عزلنا وروحنا بيت تانى فى نفس الحى
وفى يوم
كنا فى رمضان الصبح الساعة 10
اتفاجئت بصراخ وصويت فزعنى
جريت على البلكونة لقيت الناس ملمومة حوالين تاكسى وبياخدوا واحدة من جوة
ويدخلوها الفيلا اللى قصادنا
لفت نظرى انها حافية ولفينها بحاجة
و واحد من الواقفين بيسأل : هى دى نسرين ؟؟؟
والجيران عمالين يندهوا : هاتوا ملاية هاتوا ملاية ....
وانا واقفة متسمرة ومذهولة
الجيران بيزعقوا : اتصلوا بالإسعاف بسرعة

جت الإسعاف ولكن بعد ساعة ونص من الحادثة يعنى الساعة 11 ونص
جت الإسعاف وخدت نسرين وراحت بيها المستشفى الله اعلم وصلت امتى

بعدها بئا عرفنا ان نسرين كانت مخطوبة لواحد وبعدين سابته
الواحد دة هددها وقالها لو مرجعناش لبعض تانى انا هحرقلك وشك

نسرين فكرته كلام وخلاص
لكن المجرم جاب إزازة وحط فيها مية نار وعليها مادة الزئبق
ورماها عليها وهى راكبة التاكسى هى وجدتها وكان التاكسى بيطلع من الشارع فطبعا ماشى بهدوء
وطبعا مية النار قامت بالواجب
كانت لابسة سلسلة دهب ساحت وهى قاعدة تصوت من الألم
طبعا هدومها بجلدها كله اختفت معالمه
قامت تجرى من التاكسى
رمت نفسها على السواق لما لقيت نفسها مكشوفة كأنها بتسخبى فيه
جابولها ملاية لفوها فيها ودخلوها الفيلا
وفضلوا يكبوا عليها مية لغاية لما الاسعاف شرف

راحت نسرين المستشفى
الدكاترة كلهم اجمعوا على ان الزئبق اللى اتحط على مية النار خلى الحروق تبئا عميقة
حروقها كانت من الدرجة التالتة
كان كل اللى يزورها يرجع يقول ادعولها
مفهمناش كلامهم غير بعد ماجابوا حالتها فى التليفزيون وشوفنا شكلها اللى معدش له شكل

أخوها حلف لينتقم من اللى عمل كدة فى اخته الوحيدة
زينة بنات الحى

اشتد الالم بنسرين
الدكاترة قالوا حالتها خطيرة ( واحنا عملنا الى علينا ) الزئبق لما بينضاف على مية النار بيخلى المفعول أسرع وأعمق

وأخيرا ... نسرين سلمت روحها لخالقها بعد ما طلبت من أخوها انه يديها حقنة هوا لأنها مش قادرة تتحمل الألم

الله يرحمك يا نسرين

النوع فى شهادة الميلاد : ذكر

عينى عليك يا زمن بقيت ماشى بالشقلوب البنات بقوا رجالة والرجالة بقوا ...؟؟؟؟

لقب راجل بقى يطلق على قلة قليلة جدااا

أنا شايفة ان دى ظاهرة بجد صدقونى هى ظاهرة اصبحت منتشرة جدا بشكل مخيف .. ان معظم شباب اليومين دول معندهمش شخصية غير على أنفسهم أو ما ملكت أيمانهم اللى هما اما زوجاتهم أو اللى مرتبطين بيهم انما معندوش شخصية حتى انه يدافع عن حياته من التدمير .

المشكله ان كل شاب من دول لما بييجى يخطب تلاقيه داخل على العروسة دخلة مستر X على العصابة كدة

شخصية ايه وكلام ايه

تلاقيه قاعد ملو هدومه طول بعرض

تشوفوه تقولوا فارس الأحلام اهوه اللى هياخدها على الحصان الابيض فى زمن مفيهوش حصنة

بيشعلقها فى حباله الدايبة ولا يبان عليه

ولما مامته تغمزله بعينيها يقوم بتنفيذ المراد أيا كان

انا طول عمرى اعرف ان البنت هى اللى دايما ضعيفة وبتسمع كلام مامتها ودة كان سبب الخلافات زمان بين الزوج والزوجة

انما اول مرة فى حياتى اسمع عن راجل بيسمع كلام مامته فى خراب بيته

محدش فينا مختلف فى ان سماع كلام الام واجب وضرورى ولا حتى انا مختلفة فى كدة

بس فى أمهات عندها التدمير هواية

هل يصح انه يسمع كلامها فى خراب بيته وتشريد ابنه؟؟؟؟؟

تعددت القصص والنهاية واحدة :

بنت اتجوزت وخلفت واطلقت وبعد ما انجبت طفل بعد سنة واحدة لمجرد ان الأم الفاضلة قالت لابنها طلقها يا ( فلان) .

الزوج وهو واقف الحقيقة مأخرش طلب قالها انتى طالق

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

مش حتى يستنى يشوف فى ايه ولا يحاول يصلح لو فى خطأ من اى ناحية زى مالبشر بتعمل علشان الطفل البرئ حتى بلاش علشان العشرة

واحدة اتطلقت علشان مسمتش بنتها على اسم حماتها

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

يرضى ربنا دة

واحدة اتطلقت علشان حماتها معذباها فى الشغل ولما قامت الزوجة بضرب ابنها عقابا على حاجة عملها حماتها قالتلها سيبى الواد ردت الزوجة من قهرها و قعدت تبكى وقالتلها سيبينى فى حالى حرام عليكى

ممكن تكون كلمة تقيلة على الحما بس الناس بتزعل وبتصطلح تانى عادى يعنى

واحدة حماتها بتدخل فى شئونها الخاصة هى وزوجها لدرجة ان الحما بتأمر ابنها امتى يروح لمراته وامتى ميروحش ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

وطبعا الزوجة بتغضب كتير عند ابوها بيوصل الحال بيها انها تقعد عند والدها سنة كاملة وعند زوجها شهر واحد وهكذا الا ان توفت الحما

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

العينات كتيرة جدا من الحموات الفاتنات دى ومن الزوجات المطلقات بلا ذنب ومن الأطفال المشردين بين ام مطلقة واب ضعيف مش قادر يدافع عنهم

كفاية تهزيئ ........

ازيكوا وحشتونى بجد كلكوا جدا جدا
بقالى شهر دايخة فى الامتحانات بس براقبكوا من بعيد
وأدينى فضيت شوية اهوه
وبطلب من كل اللى قصرت فى حقهم يسامحونى
لآنى بجد والله مكنتش بفضى خالص
وكنت ساعات باجى ارد على أحدث الموضوعات وساعات كنت ابص من بعيد
وكتير جدا مكنتش بدخل نت

بس انتوا بجد وحشتونى

___________________________________

الكادر دة من رأييى الشخصى انه مهزلة و عيب أوى أوى اللى بيحصل فى ناس كبار فى السن وناس قربت على المعاش بعد كل الخدمة دى فى التعليم وللتعليم يتهزأو كدة أعتقد ميصحش اللى حصل دة
وماما كانت بتفضل تسأل سؤال مالوش إجابة:
الكادر دة بيقيس ايه بالظبط عند المعلمين ؟؟؟؟؟
سؤال إجابته مبهمة والمعنى فى بطن الوزير الله ( يستره)

واللى حصل يوم الامتحان يدل على ان الكادر دة مجرد طعم للمعلمين
كأن واحد ماسك شوية فلوس و بيجرجر وراه ناس محتاجاها وناس عايزة تحسن ظروف معيشتها
يعنى بيستغلوا حاجة الناس
ناس محترمة وناس كبيرة فى السن وناس زمان كانوا ليهم قيمتهم بين جميع الوظائف
المعلم دة زمان كان مفيش بعد كدة وكان الكل بيخاف منه ولازم تسمع كلام مدرسك

انما دلوقت الطلبة يحقلهم يهزأوا الأستاذة وخصوصا اللى بيسقط منهم
مهو لازم يسقط .. يجيب منين ذاكرة تستوعب كل المذاكرة والمواد التقيلة دى

يوم امتحان الكادر
وبعد الناس ماتعبت فى المذاكرة وتعب الأعصاب
راحوا الامتحان واتفاجئوا بتكملة المهزلة اللى موقفهاش حد

واحدة فى المستشفى وباعته بنتها تمتحن بدالها
واحد طلع من المستشفى مخصوص علشان يمتحن راح ملقالوش مكان و لا رقم جلوس
مدرج كامل بعد مخد الورق وحل فيه اتفاجئ الممتحنين ان كل واحد بيحل فى كود مش كوده وبالتالى تم تغيير الورق
وطبعا فى ناس خدت الورق محلول جاهز
الامتحان معاده الساعة من 3 الى 6 تم توزيع الورق بعد خناقة الساعة 3 ونص وطبعا بعد لخبطة الأكواد بدأوا حل الساعة 4 وعشرة وتم سحب الورق الساعة 5 وتلت
يعنى ساعة ونص للحل فقط مش حرام دة
الغش كان رهيب فى اللجان وبصوت عالى يعنى اللى مذاكر يستعوض ربنا فى تعب الليالى

وكانت الخاتمة بعد انتهاء الامتحان وأخذ الورق من الممتحنين ؟؟؟؟؟؟
ناس جت بعد انتهاء الوقت وخدت ورق امتحان وورق محلول وقعدت ظللت مكان الاجابة من ورق الغلبان اللى حل وطلعت عينه فى المذاكرة والحل

وبعد كدة ينجحوا ناس ويسقطوا ناس؟؟؟؟؟؟؟؟؟؟؟؟؟؟
وبعد كدة يتساوى اللى اجتهد واللى مجتهدش ؟؟؟؟؟؟؟؟؟؟

( الكادر نظام فاشل )